Полицијата ги растера демонстрантите собрани во центарот на Белград, по инцидентите на седмиот протест на кој се бара поништување на изборите во Србија.
Десетици полицајци во опрема за разбивање на демонстрациите направија барикади околу клучните институции во центарот на градот - Собранието на Белград, Републичкото собрание, Претседателството на Србија и седиштето на Републичката изборна комисија и не пропуштаат движење на демонстрантите.
Претходно, дел од демонстрантите насилно се обидоа да влезат во зградата на белградското Собрание, додека полицијата внатре во зградата фрлаше солзавец кон нив. Искршени се прозорците и стаклото на влезот во градската куќа.
Инцидентите се случиле кога претставници на опозицијата и дел од демонстрантите почнале да ги туркаат заклучените врати. Тие се спречени да влезат во градското собрание од припадници на полицијата со опрема за разбивање на демонстрации.
Дел од демонстрантите искршиле стакла на влезот. Полицијата одговорила со солзавец.
Претходно, претставници на опозицијата од списокот „Србија против насилството“ се обидоа да влезат во белградското Собрание за да им се обратат на демонстрантите од балконот.
Опозицијата тврди дека владејачката Српска напредна партија ги украла изборите, што власта го негира.
Пред главниот влез на градското собрание претходно зборуваше еден од водачите на белградската полиција во цивилна облека. На претставниците на опозицијата им порача дека „насилно влегување не е возможно и дека тоа е кривично дело“.
Толпата од која има неколку илјади на платото пред градското собрание извикува „Победа, победа“, „Нема да ја дадеме победата“ и „Влези, влези“.
Потпретседателот на Демократската партија Срѓан Миливојевиќ ја повика полицијата да го напушти Собранието и да „застане на страната на народот“.
На инцидентите реагираше српскиот претседател Александар Вучиќ кој во вонредното обраќање рече дека „никаква револуција не се случува“.
„Сакам да ви кажам да не се грижите. Иако сцените се драматични. Нема никаква револуција во тек, ништо нема да им појде од рака“, додаде тој.
„Се трудиме да не повредиме ниту еден од демонстрантите со мирна реакција. Присутни се 2 490 луѓе, 1195 се обидуваат да влезат во Собранието. Некои покажаа дека насилството е единствениот начин за борба против противниците“, рече Вучиќ.
Протестот започна пред седиштето на Републичката изборна комисија (РИК), каде што се собраа илјадници граѓани на покана на опозициската коалиција „Србија против насилство“, која не ги признава резултатите од изборите и тврди дека владејачката српска Прогресивната партија (СНС) победи преку изборна кражба.
Барањето е откажување на изборите на сите нивоа поради „прекинување на изборната волја на граѓаните“.
„Овие избори се поништуваат“, изјави Мариника Тепиќ, носител на листата „Србија против насилството“, која од понеделник, 18 декември, на протестот штрајкува со глад.
Во штрајкот со глад во текот на неделата и се придружија уште неколку опозициски политичари со барање да се повторат изборите.
„Мораме да ги регулираме изборните закони“, рече на протестот Срѓан Миливојевиќ од Демократската партија.
„Целиот свет виде кражба каква што никогаш не е забележана. Победивме во Белград, Белград е слободен град“, додаде тој.
Пратеникот од опозицијата Александар Јовановиќ Ќута на насобраните граѓани им порача дека „до крај“ ќе ја брани нивната изборна волја.
Демонстрантите на протестот носат транспаренти, знамиња на Србија и на Европската Унија. Тие свират, а на протестот постојано извикуваат „крадци, крадци“.
На изборни нерегуларности во Србија укажаа и домашни и меѓународни набљудувачки мисии.
Дел од европратениците повикаа на независна истрага за сите пријавени неправилности.
Граѓаните на Србија на 17 декември гласаа на парламентарни, покраински и локални избори во 65 градови и општини.
СНС прогласи победа на сите нивоа.
