Од почетокот на април наредната година македонските граѓани со „Визер“ ќе можат да летаат на уште три нови дестинации Париз, Брисел и Франкфурт, најави премиерот Никола Груевски.

Тој изјави дека Владата е во преговори и со друга позната нискобуџетна авиокомпанија за отворање на уште три нови евтини авиолинии до други дестинации во Европа. Доколку преговорите успешно завршат, рече Груевски, во текот на наредната година ќе се отворат уште три дополнителни евтини авиолинии.

Владата го субвенционира авиопревозникот „Визер“ со по 8 евра по патник. Оваа година за нискобуџетните авиокомпании Владата доделуваше по 9 евра за секој патник, за следната цената на субвенцијата ќе биде 8 евра.

Известувачот за Србија во Европскиот парламент, Тонино Пицула, оцени дека реформите во земјата „значително се забавиле“ во некои сегменти и дека, како што рече, има назадување, особено видливо во областите на владеењето на правото и стандардите на демократијата како систем.

„Од усвојувањето на нашиот минатогодишен извештај за Србија до денес, ситуацијата во земјата дополнително се влоши. Ситуацијата е исклучително поларизирана и полна со тензии. Целокупното темпо на процесот на пристапување кон ЕУ е во стагнација со години“, рече Пицула во Комитетот за надворешна политика на Европскиот парламент (АФЕТ), каде што се дискутираше нацрт-верзијата на годишниот извештај за Србија.

Тој ја припишува стагнацијата на ограничениот напредок во дијалогот со Косово, континуираниот недостиг на почитување на заедничката надворешна и безбедносна политика на Европската Унија, општиот недостиг на вистинска политичка волја за движење напред, честата реторика против европските функционери, влошувањето на условите за слободна работа на медиумите и граѓанското општество, како и игнорирањето на препораките за реформа на изборниот процес.

Според Пицула, Србија како земја-кандидат мора систематски и решително да донесе стратешка одлука кон декларирано членство во Европската Унија.

„Декларативните одлуки во овие околности повеќе не можат да се сфаќаат како сериозна политика на гледање низ прсти и наметнување на стабилност како алиби од страна на некои европски актери. Тие не донесоа резултати во трансформацијата на земјата, туку, за жал, само ја оддалечија од членството“, рече тој.

„Иако Србија нагласи дека членството во Европската Унија е нејзина стратешка цел, гледаме дека преземените обврски честопати не се потврдуваат во пракса, како во случајот со неприсуство на самитот на Европската Унија и Западен Балкан во декември минатата година, но и учеството на воената парада во Москва минатиот мај“, додаде Пицула.

Осврнувајќи се на слободата на медиумите, известувачот за Србија оцени дека сликата за состојбата во оваа област е „застрашувачка на неколку нивоа“.

Тој ја осуди ескалацијата на нападите и заплашувањето на новинарите, кои, како што оценува, „ја враќаат земјата во некои мрачни времиња“.

За време на дискусијата, некои пратеници кои беа дел од мисијата што ја посети земјата во јануари го критикуваа недостигот на подготвеност на властите во Белград да се сретнат со членовите на делегацијата на Европскиот парламент.

Повеќето членови на делегацијата забележаа дека претседателот на земјата, Александар Вучиќ, и претседателката на српскиот парламент, Ана Брнабиќ, имале негативни коментари пред посетата, кои биле придружени со негативен тон во извештаите на провладините медиуми.

Европратеничката Марта Темидо која ја предводеше делегацијата што ја посети Србија во јануари, забележа дека имало „отворено непријателска реторика“ кон посетата на делегацијата на Европскиот парламент и ограничен интерес на претставниците на владејачката партија за дискусија за пристапувањето во ЕУ.

Претставниците на европските институции, Европската комисија и ЕЕАС, кои учествуваа во дискусијата, предупредија дека целокупното темпо на преговорите за пристапување на Србија ќе продолжи да биде одредено од напредокот во владеењето на правото и односите со Косово.

Во нацрт-извештајот за Србија се оценува дека земјата постигнала ограничен или никаков напредок во исполнувањето на критериумите за членство во Европската Унија.

Документот потсетува на прокламираната посветеност на Србија дека членството во ЕУ е нејзина стратешка цел, но се забележува дека декларираните посветености честопати не се одразуваат во пракса, што, како што е наведено, било видливо и кога највисоките претставници на Србија не присуствуваа на самитот ЕУ-Западен Балкан во декември 2025 година.

Европскиот парламент ја повторува својата силна осуда на нелегалното апсење и депортација на граѓани на ЕУ кои дадоа изјави во поддршка на студентите што протестираат.

Изразена е и загриженост за продлабочувањето на политичката криза во земјата во контекст на масовните протести што се одржуваат низ цела Србија од ноември 2024 година и кои „ја одразуваат реакцијата на граѓаните на системската корупција и перципираниот недостиг на одговорност и транспарентност“.

Во документот, Европскиот парламент изразува загриженост за интензивирањето на вербалните напади, кампањите за клевета и притисокот врз организациите на граѓанското општество кои се залагаат за владеење на правото, како и за влошувањето на условите за работа на новинарите и медиумите, и ја повикува Србија да го промени ситуацијата со падот на слободата на изразување.

По дискусијата во Комитетот за надворешни работи, со дополнувања и измени, овој документ треба да биде усвоен од тоа тело на Европскиот парламент во јуни.

Подоцна годинава, со гласање на една од пленарните седници, документот добива форма на резолуција на Европскиот парламент.

Израелскиот министер за одбрана, Израел Кац, тврдеше дека шефот за безбедност на Иран, Али Лариџани, е убиен во бран воздушни напади врз Техеран, во кои загинаа и други високи ирански функционери.

Не беа презентирани докази во поддршка на тврдењето, кое - доколку се потврди - би било убиството со највисок профил од атентатот врз врховниот лидер на Иран, Али Хамнеи, на 28 февруари, првиот ден кога американските и израелските сили започнаа воздушни напади врз Иран.

Техеран се обиде да ја оспори изјавата на Израел, прикажувајќи ја она што го нарече рачно напишана порака од Лариџани во спомен на иранските морнари убиени во американскиот напад, чии погреби се очекуваа подоцна на 17 март. Фотографија од пораката беше објавена и на профилот X на Лариџани.

Веста за Лариџани дојде кратко откако Израелските одбранбени сили (ИДФ) тврдеа дека го убиле Голамрез Сулејмани, командантот на иранската паравоена единица Басиџ, во истиот бран воздушни напади врз Техеран на 16 март.

„Вчера, ИДФ го таргетираа и елиминираа Голамрез Сулејмани, кој дејствуваше како командант на единицата Басиџ во последните шест години“, се вели во соопштението, објавено на 17 март.

Иранските власти сè уште не го потврдија ниту го негираа извештајот.

Кац рече дека двајцата лидери „му се придружиле на Хамнеи, раководителот на програмата за уништување, заедно со сите оние елиминирани од „Оската на злото“ во длабочините на пеколот“, додека канцеларијата на израелскиот премиер Бенјамин Нетанјаху објави фотографија од премиерот како разговара по телефон, со натпис: „Премиерот Бенјамин Нетанјаху наредува елиминација на високи функционери на иранскиот режим“.

Американско-израелската офанзива против Иран, која сега е во третата недела, не покажува знаци на смирување, а сирените за воздушни напади се огласија на неколку локации низ Блискиот Исток на 17 март.

Израелската војска соопшти дека најновиот бран напади ја таргетирал „инфраструктурата на иранскиот режим“ во Техеран, како и локациите за кои вели дека се поврзани со групата Хезболах, која е прогласена за терористичка организација од страна на САД.

Во меѓувреме, Иран продолжи да испукува ракети и беспилотни летала кон цели низ Блискиот Исток, вклучувајќи го и Израел. Клучниот Ормуски теснец, низ кој минува околу една петтина од светскиот нафтен сообраќај, е претежно затворен поради напади врз бродови.

Ирански напад со беспилотни летала и ракети ја таргетирал амбасадата на САД во Багдад, според безбедносните службеници, од кои еден за АФП изјавил дека „најмалку едно беспилотно летало“ паднало во комплексот на амбасадата.

Нов ирански напад со беспилотни летала го погодил и нафтениот комплекс Фуџаира на источниот брег на Обединетите Арапски Емирати, предизвикувајќи пожар, но без повредени, објавија локалните власти на 17 март. Експлозии беа пријавени во Доха, додека Катар соопшти дека пресретнал ракетен напад.

Американскиот претседател Доналд Трамп ги повика земјите од целиот свет да помогнат во повторното отворање на овој витален морски пат, но неколку земји го отфрлија предлогот.

Таргетирањето на Иран кон земјите производители на нафта и гас во Заливот дополнително ги зголеми цените на енергијата во многу земји.

Британскиот премиер Кир Стармер изјави дека работи со сојузниците на план за повторно отворање на Ормускиот теснец. Лидерот на Велика Британија се спротивстави на барањата на американскиот претседател Доналд Трамп да испрати воени бродови на Кралската морнарица за да помогнат во обезбедувањето на виталната транспортна рута за нафта и гас, која ефикасно беше затворена за танкери поради војната со Иран.

Тој рече дека Велика Британија работи со земјите, вклучувајќи ги и европските сојузници, на „одржлив план“ за ублажување на кризата, која ги зголеми глобалните цени на нафтата.

Премиерот, исто така, постави мерки за ублажување на притисокот врз трошоците за живот во Велика Британија, со план за помош на домаќинствата кои зависат од нафта за греење.

На прес-конференцијата на Даунинг стрит, Стармер рече дека нема да дозволи Велика Британија да биде вовлечена во „поширока војна“ на Блискиот Исток.

„Работиме со сите наши сојузници, вклучувајќи ги и нашите европски партнери, за да составиме одржлив колективен план што може да ја врати слободата на навигација во регионот што е можно побрзо и да ги ублажи економските влијанија“.

Американскиот претседател предупреди дека иднината на НАТО може да биде доведена во прашање доколку сојузниците не се согласат со неговото барање да обезбедат бродови. Велика Британија потенцијално би можела да испрати беспилотни летала за лов на мини во регионот, наместо воен брод, иако Стармер инсистираше дека не се донесени конечни одлуки.

Трамп рече дека НАТО се соочува со „многу лоша“ иднина доколку неговите земји-членки не помогнат, додавајќи: „Ќе видиме дали ќе ни помогнат, бидејќи долго време велев дека ние ќе бидеме таму за нив, но тие нема да бидат таму за нас“.

Во интервју за „Фајненшл тајмс“, Трамп го повтори својот повик за сојузничка помош во Ормутскиот теснец, велејќи: „Соодветно е луѓето кои се корисници на теснецот да помогнат за да се осигура дека ништо лошо не се случува таму“.

Тој претходно апелираше до Велика Британија, Кина, Франција, Јапонија и Јужна Кореја да испратат бродови за да ја обезбедат рутата.

Трамп повторно го нападна Стармер поради неговото одбивање да им дозволи на американските сили да ги користат британските бази во почетниот бран напади врз Иран.

„Велика Британија може да се смета за сојузник број еден, со најдолг стаж итн. и кога побарав да дојдат, тие не сакаа да дојдат“, изјави тој за Фајненшл тајмс.

Запрашан за ситуацијата со Ормускиот теснец, Стармер рече:

„Тоа е дискусија, сè уште не сме во фаза на донесување одлуки, сакам навистина да го нагласам тоа. Ќе мора да биде нешто што ќе биде договорено од што е можно повеќе партнери, тоа е мојот цврст став. Сè уште не сме во таа фаза, но работиме напорно“, изјави Стармер.

Во меѓувреме реагираше и официјален Берлин. Германската влада го отфрли повикот на Трамп до сојузниците во НАТО да помогнат во заштитата на комерцијалниот бродски превоз во Ормутскиот теснец од иранските напади кои ги зголемија цените на нафтата.

„Оваа војна нема никаква врска со НАТО. Тоа не е војна на НАТО“, изјави портпаролот на владата Стефан Корнелиус во Берлин, додека многу западни сојузници на Вашингтон сугерираат дека САД и Израел немаат никој друг освен себеси да бидат виновни за превирањата на глобалните пазари на нафта предизвикани од нивната војна против Иран.

Додека многумина во 32-члената одбранбена алијанса, вклучително и Германија, се согласија дека раководството во Техеран претставува закана, сојузниците сè повеќе го критикуваат Трамп за она што го сметаат за недостиг на стратегија за ставање крај на војната.

Премиерот на ентитетот Република Српска во Босна и Херцеговина, Саво Миниќ, денеска, 16 март, поднесе оставка.

На прес- конференција, Миниќ изјави дека се консултирал со претседателот на РС, Синиша Каран, и дека тој повторно ќе го номинира за мандатот.

Миниќ, кој е член на Сојузот на независни социјалдемократи, партијата на Милорад Додик, додаде дека има поддршка од мнозинството во Народното собрание на РС.

Тој рече дека се одлучил за овој потег за да ја обезбеди легалноста и легитимитетот на Владата и изјави дека има забелешки и од Меѓународната заедница, без да објасни на што конкретно мисли.

Ова е втор пат во последните неколку месеци Миниќ да поднесе оставка и да објави дека повторно ќе биде избран.

Претходниот министер за земјоделство на РС, Саво Миниќ, беше назначен за премиер на ентитетот на 2 септември минатата година.

На 23 јануари, Уставниот суд на Босна и Херцеговина одлучи дека оваа влада не е уставна, бидејќи Милорад Додик, кој тогаш се претстави како претседател на РС, го предложи за мандатар минатиот август.

Според Уставот на РС, мандатарот може да го номинира само претседателот на ентитетот, а таа позиција му беше одземена откако пресудата за непочитување на одлуките на високиот претставник стана правосилна, со која му се забранува вршење политички функции во период од шест години.

Неколку дена пред одлуката на Уставниот суд на Босна и Херцеговина, Миниќ поднесе оставка, па за мандатар го предложи тогашната заменик-претседателка на РС, Ана Тришиќ Бабиќ, па тој повторно беше назначен на истата позиција.

Ќамил Дураковиќ, потпретседателот на РС, побара од Уставниот суд на РС да ја оцени уставноста на изборот на Тришиќ Бабиќ на таа позиција, со оглед на тоа што Уставот на ентитетот не ја признава функцијата вршител на должноста претседател.

На 25 февруари, Уставниот суд на РС ја суспендираше постапката за оценување на уставноста на нејзиното назначување.

Израелската војска во последните денови започна „ограничени и насочени копнени операции“ на југот од соседен Либан, соопшти војската во понеделник, 16 март. Целта е да се таргетираат активните членови на милицијата Хезболах, поддржана од Иран, во областа, како и нејзината инфраструктура, соопшти војската.

Се вели дека копнените операции се „дел од пошироки одбранбени мерки“ за заштита на жителите во северен Израел.

„Тајмс оф Израел“ во текот на викендот објави дека израелските копнени трупи убиле десетици припадници на милицијата Хезболах во судирите во јужен Либан. Министерството за одбрана на Израел го потврди извештајот.

Уништени се складишта за оружје, команден центар и набљудувачки места на Хезболах.

Во Либан постои загриженост за поголема копнена офанзива од страна на Израел.

Според новинскиот портал „Аксиос“, повикувајќи се на израелски и американски претставници, Израел има намера да ја преземе контролата врз целата област јужно од реката Литани за да ја демонтира воената инфраструктура на Хезболах.

Хезболах е вооружена и политичка организација во Либан, а Израел ги напаѓа нивните објекти затоа што ги смета за воена закана и сака да го намали нивниот ракетен и воен капацитет. Израел смета дека групата е поддржана од Иран и претставува безбедносна закана.

Министрите за надворешни работи на Европската Унија в понеделник, 16 март треба да разговараат за војните во Украина и на Блискиот Исток како и за последиците од борбите.

Се очекува украинскиот министер за надворешни работи, Андриј Сибиха, да им се придружи на своите колеги од ЕУ преку видео врска за брифинг за најитните потреби на неговата земја во нејзината одбрана од Русија.

Поддршката на ЕУ за Киев претрпе неуспех минатиот месец кога 27-те земји-членки на блокот не успеаја едногласно да се договорат за нови мерки за помош на време за 4-годишнината од целосната инвазија на Русија.

Дваесеттиот пакет санкции за Русија, како и пакетот за финансиска помош во вредност од 90 милијарди евра (103 милијарди долари), сè уште се блокирани поради отпорот од Унгарија и Словачка.

ЕУ, исто така, постојано предупредува на можни последици за Украина од конфликтот на Блискиот Исток. Европската комисија вели дека Москва имала огромна корист од зголемувањето на цените на горивата откако започна војната во Иран, со дополнителни дневни заработки од 150 милиони евра од продажбата на нафта.

Ова доаѓа по години напори на ЕУ да ги ограничи приходите на Русија од фосилни горива со цел да ја ограничи нејзината способност да ја финансира војната против Украина.

Конфликтот, исто така, ги исцрпи воените ресурси, при што системите за воздушна одбрана и другите средства се повеќе се потребни надвор од воениот фронт во Украина, бидејќи Иран возвраќа на воздушните напади на САД и Израел со напади низ делови од Блискиот Исток.

Во врска со Иран, се очекува министрите на ЕУ формално да одобрат нови санкции насочени кон иранските функционери и организации, како што објави минатата недела највисокиот дипломат на блокот, Каја Калас.

Филмот „Господин Никој против Путин“ - за млад руски наставник кој тивко се спротивставува на војната на Кремљ против Украина - го освои Оскарот за најдобар документарен филм, на 98-то доделување на филмските награди „Оскар“.

Филмот, во режија на Дејвид Боренштајн и наставникот Павел Таланкин, го следи Таланкин додека работи во училиште во сиромашниот рударски град Карабаш на Урал.

Филмот користи снимки направени од Таланкин во период од две години за да покаже како руската влада на претседателот Владимир Путин ги индоктринира учениците со провоени пораки.

На барање на руското Министерство за образование, Таланкин, кој има 35 години, помогна во снимањето на провоените пропагандни напори во основно училиште во Карабаш. Но, претставниците на Министерството не се сомневаа дека тој ќе ги претвори своите снимки во документарец за руската кампања за „патриотско образование“ за учениците.

Таланкин го документира сопствениот прогон и на крајот прогон во филмот, кој The Hollywood Reporter го нарече „трогателна, интимна хроника“.

„Господин Никој против Путин“ е за тоа како ја губите вашата земја, а она што го видовме додека работевме со овој материјал е дека ја губите преку безброј мали, ситни акти на соучество“, рече режисерот Боренштајн на сцената, стоејќи до Таланкин.

„Кога сме соучесници, кога владата убива луѓе на улиците на нашите големи градови, кога не кажуваме ништо, кога олигарсите ги преземаат медиумите и го контролираат начинот на кој ги создаваме“, додаде Боренштајн.

„Нереално е“

Пред церемонијата во Лос Анџелес, Таланкин рече:

„Да ми кажевте пред две години дека работите ќе бидат вакви, ќе ви се смеев во лице. Нереално е - вакви работи едноставно не се случуваат“, рече тој.

Таланкин, познат и како Паша, избегал од Русија во летото 2024 година со хард дисковите што ќе станат основа на документарниот филм.

Таланкин се сретнал со Боренштајн преку интернет, изјавил тој за CBS, и снимал две години додека Боренштајн режирал од далечина од Европа.

Во февруари, филмот ја освои и наградата БАФТА во Лондон за најдобар документарен филм.

Папата Лав XIV, првиот папа роден во САД, упати итен повик за прекин на огнот во војната меѓу САД и Израел со Иран за време на молитвите пред десетици илјади луѓе собрани на плоштадот „Свети Петар“ во Рим, јави агенцијата ДПА.

„Во името на христијаните од Блискиот Исток и на сите жени и мажи со добра волја: Престанете со огнот! Нека се отворат повторно патиштата на дијалогот“, рече папата, цитиран од новинската веб-страница на Ватикан.

„Никогаш нема да доведат до правдата, стабилноста и мирот што ги чекаат народите“, рече папата.

Тој внимаваше да избегне директно обвинување за војната, која започна со офанзива од САД и нивниот близок сојузник Израел. Сепак, неговата критика за нападите врз „училиштата“ доаѓа во време кога САД се соочуваат со континуиран надзор поради нивната сомнителна вмешаност во бомбардирањето на иранско училиште, при што загинаа десетици млади ученички.

„Ја обновувам мојата молитвена близина до сите оние кои ги загубија своите најблиски во нападите што ги погодија училиштата, болниците и станбените области“, рече папата Лав XIV.

Осврнувајќи се на ситуацијата во Либан, тој рече: „Се надевам на патишта на дијалог што можат да ги поддржат властите во земјата во спроведувањето трајни решенија за сериозната криза што е во тек, за општото добро на целиот либански народ“.

Папата Лав XIV го посети Либан за време на својата прва посета во странство како папа минатата година.

Шест лица загинаа во руски напади со беспилотни летала и ракети, а десетици беа повредени низ цела Украина, додека Киев соопшти дека цел на нападот биле пристаниште и рафинерија за нафта во јужниот руски регион Краснодар.

Во рускиот напад, првенствено насочен кон енергетската инфраструктура на Киев, беа употребени околу 430 беспилотни летала и 68 ракети од различни типови, изјави украинскиот претседател Володимир Зеленски на 14 март, кога неговата земја го одбележа националниот ден на волонтерството.

„За жал, имаше и напади и штети врз обични домови, училишта и цивилни бизниси“, напиша Зеленски на Телеграм, повикувајќи на спроведување на договорите за воздушна одбрана со европските партнери на Украина.

Шефот на воената администрација на Киев, Микола Калашник, рече дека пет лица се убиени во регионот, а уште 15 се повредени. „Тројца од нив се во сериозна состојба, двајца моментално се на операција“, додаде тој.

Уште едно лице е пријавено за убиено во Запорожје, додека локалните власти соопштија дека најмалку пет други украински региони биле цел на руски напади.

Во меѓувреме, украинската војска на 14 март соопшти дека ги погодила рафинеријата за нафта Афипски и пристаништето Кавказ во јужниот руски регион Краснодар. Во соопштението се додава дека нападите предизвикале пожар во рафинеријата за нафта и штета за пристаништето.

Иако руските власти не го коментираа веднаш инцидентот, украинските и руските канали на Телеграм објавија видеа генерирани од корисници кои се чини дека прикажуваат експлозии и чад во областа.

Нападот следувше по одлуката на Соединетите Американски Држави привремено да ги укинат санкциите врз руската нафта за да ги стабилизираат глобалните енергетски пазари во услови на воена кампања против Иран.

Киев изјави дека овој потег би можел да додаде околу 10 милијарди долари во воениот фонд на Кремљ.

На 12 март, и Киев и Москва потврдија дека уште една рунда трилатерални разговори во кои учествуваат Русија, Украина и САД е одложена, додека на 13 март, украинската војска пријави 153 судири по линијата на фронтот во текот на денот.

„Русија ќе се обиде да ја искористи војната на Блискиот Исток за да предизвика поголемо уништување тука во Европа, во Украина“, рече Зеленски на 14 март.

Иран долго време е сојузник на Русија, снабдувајќи ја со воена опрема и технологија во воените напори на Москва против Украина.

Неколку земји од Персискиот залив, вклучувајќи ги Саудиска Арабија, Кувајт, Обединетите Арапски Емират(ОАЕ) и Катар пријавија нови напади со ракети и беспилотни летала во тековната војна со Иран.

Саудиското Министерство за одбрана соопшти дека шест балистички ракети биле пресретнати и уништени над покраината Ал-Карџ доцна на 14 март.

Официјални лица, исто така, изјавија дека претходно биле пресретнати неколку беспилотни летала, главно во источниот дел од земјата.

Во областа Ал-Карџа се наоѓа и воздухопловната база Принц Султан, која ја користат и американските сили и која била цел неколку пати од почетокот на војната.

Во Кувајт, Управата за цивилно воздухопловство соопшти дека меѓународниот аеродром бил исто така цел на неколку напади со беспилотни летала на 14 март, при што бил оштетен радарскиот систем, иако не се пријавени повредени.

Кувајт привремено го затвори својот воздушен простор.

Во ОАЕ, воздушната одбрана пресретна беспилотно летало над емиратот Фуџаира, но остатоци што паднаа на земјата предизвикаа пожар. Канцеларијата за медиуми на Фуџаира објави дека се во тек операции за гаснење на пожарот и дека е повреден еден јордански државјанин.

Пристаништето Фуџаира се смета за еден од клучните регионални центри за складирање и транспорт на нафта.

Катарското Министерство за одбрана соопшти дека во текот на денот земјата била цел на четири балистички ракети и неколку беспилотни летала, од кои сите биле пресретнати и уништени од катарските вооружени сили.

Американскиот претседател Доналд Трамп на 28 февруари соопшти дека Вашингтон почнал „големи борбени операции“ против Иран, во координација со израелските сили. Нападите во Техеран беа насочени кон највисоките нивоа на раководството на Исламската Република. Иранскиот врховен лидер, ајатолахот Али Хамнеи, беше убиен во американските и израелските воздушни напади.

Од друга страна, пак, Иран испука стотици ракети и беспилотни летала насочени кон американските воени бази, како и клучни енергетски и комерцијални локации во Саудиска Арабија, Обединетите Арапски Емирати, Кувајт, Бахреин и Катар – сите американски сојузници.