Околу 176,7 милиони евра од Меѓународниот монетарен фонд (ММФ), Република Северна Македонија ќе ги искористи за буџетски потреби во финансирањето на мерките за здравствена и макроекономска стабилизација и исполнување на потребите на билансот на плаќање кои произлегуваат од појавата на Ковид-19. Како што соопшти владината прес-служба, денеска на седница на Владата е донесена Уредба со законска сила за задолжување на нашата држава кај ММФ за финансиска поддршка од Инструментот за брзо финансирање за време на вонредна состојба.

• За Велигден 85 часа дома - што сè нè очекува

Владата на Република Северна Македонија на денешната 40-та седница донесе уредба со која секој македонските државјани кои влегуваат во нашата држава по 13-ти април 2020 година, а биле затекнати во земји со висок ризик од коронавирус согласно листата на Светската здравствена организација им се одредува мерката строга изолација (карантин) во времетраење од најмалку 21 ден од денот на пристигнувањето. Ова ќе важи не само за оние кои се враќаат со хуманитарните летови, туку и со конвои по копнен пат, соопшти владината прес служба.

Во однос на здравствените работници донесена уредба со која пензијата поради возраст им се одложува за време на траењето на вонредната состојба.

„Согласно оваа Уредба, започнатите постапки за престанок на договор за вработување или договор за продолжување на вработувањето на здравствен работник, односно здравствениот соработник, поради возраст, се одложуваат за време на траењето на вонредната состојба“, наведоа од Владата.

• За Велигден 85 часа дома - што сè нè очекува

Инаку на истата седница е одлучено полицискиот час за време на Велигденските празници да трае од петок од 16 часот, до вторник во 5 часот.

Директорот на Геронтолошкиот завод во српскиот град Ниш е уапсен денеска поради сомнение дека извршил тешко кривично дело против здравјето на луѓето кога се во прашање заразни болести. Во соопштението на Министерството за внатрешни работи се наведува дека акцијата за апсење ја извршиле полицајци во соработка со Безбедносно информативната агенција БИА и Вишото јавно обвинителство.

„Директорот на Геронтолошкиот завод во Ниш е уапсен поради тоа што не преземал соодветни мерки за заштита од ширењето на коронавирусот па во таа установа во моментов се заболени 140 корисници и четворица вработени“ се наведува во соопштението на српското МВР.

Инаку денеска во Србија беше регистриран најголем дневен пораст на потврдени заболени, 424 лица, со што вкупниот број се искачи на 4054 луѓе. Вкупниот број на починати,пак, изнесува 85 лица.

Бугарското обвинителство отвори истрага за лидерот на националистичката партија Атака Волен Сидеров поради повиците со кои побара од луѓето да ги прекршат мерките за зачувување на јавното здравје кои се донесени за да се забави ширењето на коронаворусот.

Тој вчера, во телевизиско обраќање ги повика Бугарите да ги игнорираат мерките за физичка дистанца и да не носат маски за време на литургијата за Велигден. Во Бугарија вонредна состојба е прогласена од 13 март поради ширењето на коронавирусот од кој досега се заболени 685 луѓе, а 32 починаа. Носењето на маска на јавни места е задолжително, а иако црквите останаа отворени властите бараа од луѓето да останат дома.

Партијата Атака е дел од Обединетата патриотска алијанса, која пак е партнер во владата предводена од премиерот Бојко Борисов. Партијата на Сидеров е проруски ориентирана и е против ЕУ и НАТО.

Архиерејскиот синод на Српската православна црква (СПЦ) побара од државниот врв да одобри привремена суспензија на забраната за движење за Велигден, за православните христијани кои не се во самоизолација да можат да учествуваат на литургијата на својот најголем празник, јави дописникот на МИА од Белград.

Како што се наведува во соопштението по седницата, Синодот предложи забраната да се укине од пет до десет часот во недела, на 19 април. Синодот исто така изрази братска љубов и солидарност со митрополитот Амфилохије, како и огорченсот поради постапките на црногорските власти кон него.

Амфилохије и неговите соработници во недела беа приведени на информативен разговор во Центарот за безбедност во Подгорица под обвинение дека служејќи литургија во манастирот Златица и пред Соборниот храм ги прекршиле мерки за спречување на ширењето на коронавирусот, а откако бил известен обвинителот, тие биле ослободени.

Британскиот премиер Борис Џонсон е негативен на тестот за присуството на новиот коронавирус Ковид-19, соопшти денеска неговиот портпарол.

Тестирањето при напуштањето на болница и стандардна медицинска пракса, наведоа од службата за односи со јавноста на Џонсон, јавува германската агенција ДПА.

• Поради влошена состојба британскиот премиер Џонсон префрлен на интензивна нега

Британскиот премиер помина една недела во болница, а неколку дена и на интензивна нега откако се зарази со коронавирусот, а по излегувањето рече дека им го должи животот на лекарите. Дека е болен од Ковид-19 беше потврдено на 27 март. До денеска пак во Велика Британија има повеќе од 85 000 заболени, а починаа над 10 000 луѓе.

Минатиот викенд заврши кризната состојба на териториите на општините Дебар и Центар Жупа. На денешната седница Владата на Република Северна Македонија, по предлог на Главниот координативен кризен штаб, реши да се укинат сите дополнителни мерки предвидени за територијата на споменатите две општини кои беа во сила спрема акцискиот план подготвен на 13 март 2020 и траеја 30 дена.

Од денеска Дебар и Центар Жупа во сила се само мерките кои важат за територијата на целата држава, изјави директорот на Центарот за управување со кризи, Агрон Буџаку.

Тој наведе дека од епидемиолошки аспект, воведувањето на кризната состојба придонело во последните десет дена, да нема нови случаи на заразени лица со коронавирус.

„Досегашниот биланс, се надеваме конечен, е следен: од 49 потврдени пациенти со КОВИД-19 – 16 се излечени, 4 починати, за 8 се чекаат резултатите од второто тестирање, 29 пациенти се на домашно лекување“, наведе Буџаку.

Министерот за здравство Венко Филипче претходно денеска соопшти дека епидемиолозите одлучиле 23 отсто од жителите во тој град да бидат тестирани за да се открие дали стекнале имунитет на коронавирусот.

• Во Дебар нема новозаразени, ќе се тестира имунитетот на дебарчани

Инаку и покрај укинатата кризна состојба во Дебар, за тој град продолжуваат да важат мерките како за цела држава, забрането движење од 16 часот до 5 часот, а од дополнително и од петок попладне до вторник наутро поради Велигденските празници.

Во Дебар повеќе нема новозаболени од коронавирусот и затоа епидемиолозите одлучиле 23% од жителите во тој град да бидат тестирани за да се открие дали стекнале имунитет на коронавирусот, информираше денеска министерот за здравство Венко Филипче.

„Со оглед на тоа што во Министерството добивме донација од 20.000 тестови за дијагностика на антитела и со оглед на тоа што ситуацијата во Дебар е таква да веќе во тој регион немаме новодијагностицирани пациенти, сите пациенти закрепнуваат, ги чекаме и вторите тестови за да се види дали се негативизирани, ќе направиме еден скрининг во бројка од дваесет до триесет отсто од вкупното население во регионите во кои досега имаше мерки за рестрикција на движење воведени уште пред вонредната состојба. Со ова сакаме да се процени имунитетот што ќе биде одличен пример за тоа што би можеле да очекуваме и на ниво на целата држава“, рече министерот Филипче.

• Филипче: Забрзано тестирање и резултати за 1 ден и уште две лаборатории

Дебар е првиот град во кој беа регистрирани заразени од коронавирус и поради ширењето на заразата, најпрвин беа воведени кризни мерки, а потоа и целосен карантин на градот.

Припадници на македонската армија од денеска се вклучуваат воодржувањето на редот во Прилеп и заедно со полицијата ќе се погрижат граѓаните доследно да ги почитуваат мерките и препораките на надлежните, информираше денеска министерката за одбрана Радмила Шекеринска.

Вклучувањето на армијата е на барање на градоначалникот Илија Јованоски, а поради драматично ширење на заразата со коронавирус во градот, а барањето било доставено до Централниот кризен штаб.

• Владата одлучи - Забрана за движење од 17 април од 16 часот до 21 април до 5 часот

„Денеска зборувавме дека ангажманот ќе биде флексибилен. Во првите неколку часа војскатаќе биде присутна пред дуќани и банки. Како минува денот војниците можеби ќе се преселат во парковите или местата за рекреација каде има одредено прекршување на мерките. Не сакаме од Скопје да се носат одлуки. Имаме доверба во нашите старешини, војници и локалните власт и убедени сме дека ќе носат мерки кои ќе го зачуваат нашето здравје“, рече министерката за одбрана Радмила Шеќеринска

Градоначалникот Илија Јованоски, рече дека ваквите мерки се преземаат поради недисциплинираноста на граѓаните и рапидниот пораст на заразани. Денес во Прилеп има три нови случаи и еден починат, со што вкупниот број на КОВИД позитивни се искачи на 75 и две починати лица.

Владата денеска донела одлука за ограничувањата на движењето за период којшто ни претстои, вклучително и велигденските празници, објави премиерот Оливер Спасовски.

За време на викендот, вклучително и понеделник, од петок 17 април во 16 часот, до вторник 21 април во 05 часот, се забранува движењето за сите граѓани. Останува активна забраната за движење за сите граѓани на ниво на целата територија, секој работен ден, од понеделник до петок, од 16:00 часот до 05:00 часот наредниот ден.

• Видео - Филипче: Забрзано тестирање и резултати за 1 ден и уште две лаборатории
• Велигден во карантин - реакции и коментари

„Дополнително, од четврток 16 април 16 часот, до вторник 21 април 05 часот, се забранува движење на сите излетнички места, паркови и шуми низ целата држава. За лицата над 67 годишна возраст останува активна забраната во текот на сите работни денови, од понеделник до петок, освен во периодот од 10:00 до 12:00 часот. Во понеделник, 21 април, за овие граѓани има целосна забрана. За сите лица до 18 години останува активна забраната за движење во текот на сите работни денови, од понеделник до петок, освен во периодот од 13:00 до 15:00 часот. Во понеделник, 21 април, за овие лица има целосна забрана“, соопшти премиерот.

Останува активна забраната за движење на граѓаните на јавни места и јавни површини во групи поголеми од две лица, при што тука не се вбројуваат лицата помали од 14 години, доколку се деца на родител кој е дел од групата од двајца.