Претседателот на Собранието, Талат Џафери по третиот дијалог во рамки на Жан Моне процесот во законодавниот дом изјави дека пратениците ги приближиле ставовите и се согласиле за одредени аспекти за реформите на Деловникот.

„Направивме значајни реформи и оставаме важно наследство за новиот пратенички состав во форма на усогласен текст за измените на Деловникот, што е анектиран во овој документ, како интегрален дел на заклучоците на третиот Жан Моне дијалог, со што одредени прашања остануваат да се разгледаат во наредниот парламентарен состав“, рече спикерот Талат Џафери на прес-конференција.

Според него, во 90 проценти од прашањата за измените партиите постигнале согласност, но, новиот Деловник ќе се донесе по изборите од новиот собраниски состав. Андреас Шидер, претседател на Делегацијата во Мешовитиот парламентарен комитет ЕУ-Северна Македонија порача дека добро е што во предизборен период било возможно да се договорат со сите политички партии за суштината на Деловникот и неговата содржина.

„Исто така се обврзавме по изборите тоа да биде применето во пракса“, истакна Шидер.

Тој додаде дека по формирањето на новиот парламентарен состав ќе почне четвртиот дијалог Жан Моне, затоа што покрај Деловникот има и многу други прашања за кои треба да се дискутира.

Известувачот на ЕП за Северна Македонија, Илхан Ќучук рече дека и во иднина ќе соработуваат и со власта и со опозицијата, бидејќи има потреба од позајакната соработка кога станува збор за идните реформи поврзани со ЕУ.

Лидерот на ВМРО-ДПМНЕ Христијан Мицкоски при денешната посета на Радовиш изјави дека опозициската партија не доставила амандмани за законот за јавно обвинителство, бидејќи во него треба да се внесат забелешките од експертите дадени на дводневната јавна расправа во Собранието.

„Кажаа што мисли фелата, екпсертската јавност, како треба еден реформски закон да изгледа и што не е во согласност со Уставот. Ниту Зоран Заев, ниту Рената Дескоска се секунданти, ниту луѓе коишто поднесуваат ултиматуми, ниту пак ние сме луѓе коишто ултиматуми прифаќаат. Така што, сите оние експертски забелешки што можеше да ги слушне министерката Дескоска, господинот Зоран Заев можат едноставно преку институциите, коишто ги владеат, а тоа е предлагачот, во овој случај Министерството за правда, да ги преточат во амандмани, во содржина на законско решение и истото тоа законско решение да го поднесат во рамките на процедурите на Парламентот и ние како ВМРО- ДПМНЕ ќе ги поддржиме“, рече Мицкоски.

Средба за законот за ЈО- се чекаат амандмани од партиите

До денеска напладне политичките партии кои имаат забелешки на законот требаше да поднесат амадмани.

Српскиот претседател Александар Вучиќ порача дека германските власти ќе го имаат главниот збор во решавањето на косовското прашање.

„Мислам дека веќе знам кој ќе биде претставник на ЕУ за дијалогот (Белград и Приштина) и веројатно за Босна и Херцеговина. Ќе биде некој кој има голема поддршка од Берлин и кој има влијание во Берлин. Без разлика која е таа личност, Берлин преку Брисел фактички ќе го води главниот збор, што нема да биде лесно за нас. И ќе биде многу, многу тешко“, изјави Вучиќ за ТВ Прва.

Вучиќ за високиот претставник за надворешна и безбедносна политика на ЕУ, Жозеф Борел, кој вчера го посети Белград, изјави дека се работи за човек кој ги разбира политичките погледи и потреби на Србија, наспроти тие што мислат дека е нормално и е прашање на време кога земјата ќе ја признае независноста на Косово. Борел го најави назначувањето на посредник на ЕУ во дијалогот меѓу Србија и Косово.

Од ВМРО-ДПМНЕ денеска реагираа дека вицепремиерката за економски прашања Мила Царовска создава лажна слика за пензиите доведувајќи ја во заблуда јавноста, посебно пензионерите. Според партијата, Царовска се фали дека ги зголемува пензиите, кои претходно ги скратила со законот за нивно порамнување.

„Со промената на законот за пензиско и инвалидско осигурување, СДСМ во првите 6 месеци од 2019 одзема 445 денари месечно, а во вторите 6 месеци од 2019 одзема дополнително 705 денари месечно. Вкупно во 2019 година СДСМ на пензионерите им одзеде 6900 ден или по 575 денари месечно“, соопштуваат од опозициската партија.

Царовска денеска изјави дека јануарските пензии на 324.000 корисници на пензија се повисоки за 722 денари.

Бугарскиот вицепремиер и министер за одбрана Красимир Каракачанов за време на посетата на Битола изјави дека треба повеќе да се чита и да се развива културен дијалог, а не политички караници, осврнувајќи се на македонско-бугарските преговори и несогласувањата за револуционерот Гоце Делчев. Според него, политичарите може да се расправаат уште 200 години, а од тоа нема добивка, туку напротив губат граѓаните

„Треба решение за проблемот на тема Гоце Делчев бидејќи историјата е јасна, а и самиот Гоце Делчев напишал што е и кој е и затоа нема смисла да се спори. Државата Македонија и државата Бугарија, односно двете држави го почитуваат, двете држави имаат споменици на Гоце Делчев. И за да не спориме, најдобро е да прочитаме што тој сам напишал“, порача Каракачанов.

Ќе утврди ли Комисијата чиј е Гоце Делчев?

На прашањето дали книгите со воено-историска тематика помагаат за подобро разбирање, Каракачанов, одговори дека фактите овозможуваат решавање на проблемите.

Палестинскиот лидер Махмуд Абас денеска најави дека ќе ги прекине сите врски со Израел и САД и го отфрли мировниот план за Блискиот Исток. Тој изјави дека предлогот на администрацијата на американскиот претседател Доналд Трамп претставува прекршување на договорите меѓу Израел и Палестинците постигнати во Осло во 1993 година.

„Никогаш нема да го прифатам ова решение. Нема да биде забележано во мојата историја дека го продадов Ерусалим“, рече Абас за време на посетата на Каиро.

Студени реакции на планот на Трамп за Блискиот Исток

Мировниот план на САД кој беше објавен на 28 јануари предвидува израелска анексија на сите населби во Западен Брег, при што повеќето од нив се сметаат за нелегални од меѓународната заедница. Според планот, на Палестинците ќе им се даде ограничен суверенитет во Газа и на некои парцели на Западниот Брег, како и некои населби на периферијата на Ерусалим. Израел ќе ги контролира сите меѓународни граници и воздушниот простор и ќе има целосна одговорност за безбедноста. Со тоа би се укинало и правото на враќање на Палестинците раселени од војната во 1948 година и нивните потомци, што претставува нивно клучно барање.

Министрите за надворешни работи на земјите од Арпаската лига се состанаа во Каиро на разговори околу американскиот предлог, на барање на Палестинците.

Од Министерството за правда соопштија дека некои пратенички групи доставиле амандмани за Законот за јавно обвинителство, а некои замолиле за дополнително време за да ги формулираат заради обврските што ги имаат со дијалогот „Жан Моне“ во Собранието. Од министерството, како што навеле за МИА, нема да откријат кои пратенички групи доставиле амандмани заради доверба на процесот.

До денеска напладне политичките партии кои имаат забелешки на законот требаше да поднесат амадмани. Од ВМРО-ДПМНЕ по јавната расправа за законот го повикаа Министерството за правда да организира средба со правните експерти кои дале забелешки и заедно со нив да направат амандмани на предлог-законот.

Вицепремиерката за економски прашања Мила Царовска денеска изјави дека јануарските пензии на 324.000 корисници на пензија се повисоки за 722 денари. Според неа, покачувањето не е популизам пред избори, туку се должи на стабилизација на пензискиот систем во изминатите две години.

„Со ова добиваме просечната пензија оваа година да изнесува 15.500, а за две и пол години таа пораснала за 1.746 денари“, рече Царовска.

Претседателката на Сојузот на здруженијата на пензионерите Станка Трајкова ја поздрави одлуката и порача дека со зголемувањето се подига вредноста на просечната пензија во државата.

Кинекото министерство за финансии соопши денеска дека ослободени од данок ќе бидат увезените производи поврзани со спречување на појава на коронавирус.

„Производите кои директно се користат за контрола на епидемијата ќе бидат ослободени од тарифите за увоз од 1 јануари до 31 март“, се наведува во соопштението на министерството.

Увозот на донации, вклучувајќи амбулантни возила и производи за дезинфекција, исто така, ќе биде ослободено од даноци.

Бројката на смртни случаи од вирусот во Кина изнесува 259 лица, а има 11.791 потврдени случаи. Најмалку 25 држави пријавиле случаи на инфекција со вирусот, главно, вклучувајќи лица кои се враќале од Кина или кои имале контакт со такви луѓе.

Лидерот на ВМРО-ДПМНЕ Христијан Мицкоски изјави дека црвените линии на опозициската партија се закон кој е во согласност со Уставот, кој е применлив и ќе обезбеди независност на обвинителството и непристрасна борба против криминалот.

„Ако се на ова подготвени СДСМ може да се изгласа законот веднаш“, вели Мицкоски во интервју за Прес 24 на прашањето дали има можност новиот закон за јавно обвинителство да биде изгласан пред распуштање на Парламентот.

Според него, забелешките на ВМРО-ДПМНЕ за законот ги потврдиле и експертите и целокупната реномирана правна фела. Тој порачува дека „она што СДСМ сака да го направи од законот е да обезбеди контрола врз обвинителството за да си обезбеди неформална амнестија за криминалите за кој ќе одговараат“.

Политичките партии до денеска напладне имаа можност да поднесат амадмани на Предлог-законот за јавно обвинителство треба да поднесат амадмани.