Достапни линкови

Вести

Нови 30 случаи на заболени со ковид-19 и 16 починати пациенти

Инфективна клиника, ковид 19 амбуланта

Во последните 24 часа регистрирани се 30 нови случаи на ковид-19 од направени 1.658 тестирања, соопшти Министерството за здравство, согласно податоците од Институтот за јавно здравје. Во Скопје има 14 нови случаи, Куманово – 4, Тетово и Кочани – по 2, Битола, Велес, Охрид, Струмица, Кичево, Радовиш, Виница и Пробиштип - по 1.

Регистрирани се 359 оздравени пациенти.

Пријавени се вкупно 16 починати лица: 8 од Скопје (61г,62г,69г,72г, 75г,80г, 82г и 82г), две лица Битола (65г,82г) и по едно лице од Куманово (80г), Струмица (76г), Охрид (68г), Гостивар (73г), Ресен (69г) и Струга (72г). Од пријавените, еден е починат во домашни, а останатите во болнички услови.

Вкупната бројка на ковид-дијагностицирани лица во Македонија од почетокот на епидемијата изнесува 154.524, бројката на оздравени пациенти е 143.427, на починати е 5.184, а бројот на активни случаи изнесува 5.913.

види ги сите денешни вести

ООН бара ембарго на продажбата на оружје на Мјамнар

ООН повика да запре продажбата на оружје на Мјанмар, како одговор на годинашниот насилен воен удар. Генералното собрание усвои резолуција со која се осудува воената хунта, која ја собори избраната влада на земјата во февруари.

ООН исто така повика на ослободување на политичките затвореници, како што е избраната лидерка Аунг Сан Су Чи и да се стави крај на насилството врз мирните демонстранти. Иако не е законски обврзувачка, резолуцијата е политички значајна.

„Ризикот од голема граѓанска војна е реален. Времето е од суштинско значење. Можноста за пресврт се стеснува по военото преземање на земјата“, рече на Генералното собрание специјалната претставничка на ООН за Мјанмар, Кристин Шранер Бургенер.

Воената хунта во Мјанмар се заканува со распуштање на партијата на Аунг Сан Су Чи

Резолуцијата беше поддржана од 119 земји, а Белорусија единствена гласаше против. Уште 36 земји беа воздржани, вклучително и Русија и Кина - двата најголеми добавувачи на оружје во Мјанмар.

Некои од воздржаните земји коментираа дека кризата во Мјанмар е внатрешна работа на таа земја, додека други велат дека резолуцијата не зборува за бруталното воено насилство врз муслиманското население на Рохинџа пред четири години, кое принуди скоро милион луѓе да ја напуштат земјата.

Активни се 416 случаи со Ковид-19, вакцинирани 274 710 граѓани

Вакцинација против ковид-19 во Спортски центар „Борис Трајковски“ во Скопје

Активни со Ковид-19 се 416 случаи во државава, од кои 158 се во Скопје. Според вчера објавените податоци на Институтот за јавно здравје, од направени 3.680 тестирања регистрирани се 19 нови случаи со Ковид-19, двајца починати и 14 оздравени пациенти.

Вкупниот број Ковид-дијагностицирани лица во земјава од почетокот на епидемијата изнесува 155.612, бројот на оздравени пациенти е 149.722, а на починати е 5.474.

Вакцинацијата се одвива непречено на сите пунктови низ државата. Од Министерството за здравство велат дека интересот за вакцинација секојдневно се зголемува, а досега бројот на лица кои изразиле желба за вакцинација преку веб платформата vakcinacija.mk е 454.104 граѓани. На вакциналните пунктови во државата заклучно со завчера вакцинирани се вкупно 274.710 граѓани.

Викендов македонските граѓани на ревакцинација во Србија

Во меѓувреме државјаните на Северна Македонија кои викендов доаѓаат на ревакцинација во Србија и кои пред три месеци на 27 и 28 март, ја примија првата доза на „Астра Зенека“ ќе можат да се ревакцинираат само во градот во кој ја примиле првата доза.

Стоилов: Со законски измени ќе спречиме злоупотреби со бугарското државјанство

Јанаки Стоилов, министер за правда во техничката влада на Бугарија

Техничката Влада во Бугарија која е со многу ограничен мандат паралелно е и со голема амбиција добро да ги организира парламентарните избори во јули и да ги пронајде коруптивните практики со купено контролирано гласање за време на изборите. Ова во интервју за МИА го тврди министерот за правда на Република Бугарија Јанаки Стоилов. Тој уверува дека привремената Влада има цел и да ги разоткрие оние модели со кои се спроведува корупцијата, од кои, според него, дел се законски, но се крајно нецелисходни.

Според Стоилов, со направените измени во законодавството се намалуваат можностите преку Агенцијата за Бугари во странство и разни организации да се фаворизираат одредени групи, да се влијае во корист на некои партии или пак да се издадат лажни сертификати за бугарско потекло.

„Има определени правила за оспорување на веќе издадените решенија, но веќе беа направени измени во законодавството за време на Парламентот, со што се намалуваат можностите преку Агенцијата за Бугари во странство и разни организации да се фаворизираат одредени групи, да се влијае на тој начин во корист на некои партии или пак да се издадат лажни сертификати за бугарско потекло. Ние сакаме да опфатиме повеќе наши сонародници, но не со заобиколување на законот, туку со неговата стрикна примена“, вели бугарскиот министер за правда во интервјуто.

Кои се Бугарите санкционирани од САД за корупција?

Тој додава дека во однос на поднесувањето на апликациите, бидејќи тоа се прави по електронски пат, веќе се пополнети термините за една година однапред, до јуни 2022 година. Аплицирањата да се прват не само по електронски пат и бугарските граѓани и граѓаните на Европската Унија, како и лицата со постојан престој во Бугарија, да можат да аплицираат и лично, што според мене значително ќе ја забрза и целокупната постапка.

САД го поздравуваат усвојувањето на Резолуцијата за геноцид во Сребреница

Стејт департментот ја поздрави Резолуцијата за геноцид во Сребреница усвоена во Парламентот на Црна Гора.

„Ставот на Соединетите Држави во врска со ова прашање е долготраен и непоколеблив. Тоа болно поглавје од европската историја никогаш не смее да биде негирано, ниту заборавено, нагласи портпарол на Стејт департментот“, одговарајќи на прашање на Гласот на Америка за усвојувањето на Резолуцијата и смената на црногорскиот министер за правда Владимир Лепосавиќ.

Црногорското Собрание во четвртокот ја усвои Резолуцијата за геноцид во Сребреница, со поддршка на опозициската ДПС на Мило Ѓукановиќ.

Владата на Црна Гора на раб на паѓање по разрешување министер за коментари за Сребреница

Со Резолуцијата најостро се осудува „геноцидот во Сребреница“, се тврди дека „во геноцидот настрадале повеќе од 8.000 бошњачки цивили“, се забранува јавното негирање за постоење или намалување на „геноцидот во Сребреница“, а 11 јули се прогласува за Ден на сеќавање на жртвите во Сребреница.

Времето претпладне сончево, попладне пороен дожд

Времето претпладне ќе биде сончево со мала до умерена облачност. Попладне на повеќе места ќе биде нестабилно со пороен дожд, грмежи и засилен ветер, информира Управата за хидрометеоролошки работи. Утринската температура се движи од 11 до 19 степени, а дневната од 22 до 34 степени.

Во Скопје и околината времето претпладне ќе биде сончево со мала до умерена облачност, а попладне ќе биде нестабилно со пороен дожд, грмежи и засилен ветер. Утринската температура до 15 степени, а дневната до 31 степен.

Министерство за здравство- 50 отсто од луѓето над 70 години примиле барем една доза вакцина

Вакцинација против ковид-19 во Спортски центар „Борис Трајковски“ во Скопје - 5 април 2021

На вакциналните пунктови во државата заклучно со вчера вакцинирани се вкупно 274.710 граѓани. Прва доза вакцина вчера примиле 5.834 граѓани, а вкупно се вакцинирале 7.720 граѓани. Во државата вкупно се аплицирани 473.853 дози вакцини, а ревакцинирани се 199.143 граѓани, соопшти Министерството за здравство.

Вакцинацијата, како што се посочува, се одвива непречено на сите пунктови низ државата. Интересот за вакцинација секојдневно се зголемува, а досега бројот на лица кои изразиле желба за вакцинација преку веб платформата vakcinacija.mk е 454.104 граѓани.

Со последните бројки 50 отсто од населението над 70 години имаат примено барем една доза вакцина, 45 отсто од населението над 65 години е вакцинирано со барем една доза вакцина и 38 отсто од населението над 60 години е вакцинирано со барем една доза вакцина.

Масовна вакцинација се одвива во неколку градови во државата и тоа во А1 СЦ „Борис Трајковски“ во Скопје, во спортските сали во Кавадарци, Куманово, Тетово, Штип, Битола, Струмица, Охрид, Велес и Прилеп, информираат од Министерството за здравство.

Австрија ќе испрати дополнителни милион вакцини за земјите од Западен Балкан

Австрискиот канцелар Себастиан Курц

Австрија планира да испрати милион дози вакцини против Ковид19 на земјите од Западен Балкан, дополнително од дозите кои ги праќа во регионот во име на Европската унија. Канцеларот Себастиан Курц го кажа ова денеска во Виена по самитот со земјите од Западен Балкан кои не се членки на Европската унија. На него присуствуваа претставници на Босна и Херцеговина, Косово, Црна Гора, Северна Македонија, Србија и Албанија како и специјалниот претставник на ЕУ Мирослав Лајчак.

Во април Австрија се обврза дека ќе испорача 651 000 доза од вакцината на Фајзер/Бионтек за шесте балкански земји до крајот на август во име на ЕУ.

"Покрај ова ние исто така сакаме да помогнеме билатерално, како Република Австрија и како влада одлучивме дека ќе им доставиме милион вакцини на земјите од Западен Балкан“, рече Курц на прес конференција по самитот во Виена.

Овие дози ќе бидат доставувани од август до крај на годината, додаде австрискиот канцелар без да каже која држава колку вакцини ќе добие. Во почетокот, додаде тој, донираните вакцини ќе бидат главно од производителот АстраЗенека.

Гутереш доби втор мандат како генерален секретар на ОН

Генералниот секретар на Обединетите нации Антонио Гутереш

Генералното собрание на Обединетите нации денеска го назначи Антонио Гутереш за втор мандат како генерален секретар на организацијата. Со ова тој доби уште пет години да ги води Обединетите нации во кои има 193 земји членки.

Претходно месецов 15-те членки на Советот за безбедност на ОН го поддржаа Гутереш во неговиот обид да добие втор мандат.

Според правилата на организацијата Генералното собрание го именува генералниот секретар по препорака на Советот за безбедност. Новиот мандат на 72 годишниот португалски дипломат ќе почне на први јануари 2022 година.

Викендов македонските граѓани на ревакцинација во Србија

Вакцинација против Ковид19 на белградскиот саем

На Белградскиот саем и во спортскиот центар Чаир во Ниш викендов ќе се ревакцинираат околу 15 000 македонски граѓани, кои на 27 и 28 март ја примија првата доза на вакцината АстраЗенека, а продолжува и слободната вакцинација на македонските граѓани на останатите вакцинални пунктови во Србија, јави дописникот на МИА од Белград.

Директорот на пунктот за вакцинација на Белградскиот саем, Зоран Бекиќ, изјави дека 13 000 граѓани од регионот и Европа биле поканети во сабота и недела да се ревакцинираат на Белградскиот саем, бидејќи, како што кажа, поминаа 12 недели од првата доза.

„Ние сме добро подготвени за овој викенд. Во сабота очекуваме 8 000 граѓани од регионот и Европа, а во недела 5 000 и сите ќе бидат ревакцинирани на Белградскиот саем“, изјави Бекиќ за телевизијата К1.

Тој додаде дека за викендот работното време на вакциналните пунктови ќе биде продолжено до 17 часот. Бекиќ потсети дека без закажување на Саемот можат да се вакцинираат граѓаните на Србија, БиХ и Северна Македонија, како и дека вакцинирањето без регистрација се спроведува на сите 225 пунктови во Србија.

Во понеделник од здравствениот центар во Ниш наведоа дека од 18 до 21 јуни се очекува голема гужва, кога е терминот за повторна вакцинација на 5 700 македонски граѓани кои во март во Србија ја примија Астра Зенека, кога вакцинирањето беше организирано преку Регионалната стопанска комора.

Точниот број на вакцинитраните македонски граѓани во Србија, според тогашната изјава на министерот за здравство Златибор Лончар изнесува околу 15 000 лица.

Нови 19 заразени со Ковид19, двајца починати

Пункт за тестирање за коронавирус во Скопје

Министерството за здравство согласно податоците од Институтот за јавно здравје информира дека во последните 24 часа се направени 3.680 тестирања, а регистрирани се 19 нови случаи на Ковид19. Од нив седум во Скопје, четири во Куманово, три во Крива Паланка и по еден во Прилеп, Охрид, Струмица, Тетово и Кичево.

Регистрирани се две починати лица од Скопје и Куманово. Пациентите се починати во болнички услови. За истиот период регистрирани се 14 оздравени пациенти.

Со ова вкупната бројка на ковид дијагностицирани лица во нашата земја од почетокот на епидемијата изнесува 155.612, бројката на оздравени пациенти е 149.722, на починати е 5.474, а бројот на активни случаи изнесува 416.

Заев- со Јанев и Радев направивме голем европски исчекор

Софија- средба на македонскиот премиер Зоран Заев и бугарскиот службен премиер Стефан Јанев, 17.06.2021

Македонскиот премиер Зоран Заев кој денеска учествуваше на Самитот за Западен Балкан во Виена на прес конференцијата во австрискиот главен град рече дека Западен Балкан е преморен од историски недоразбирања и затоа како современи политичари треба да гледаат напред и да бидат насочени кон решенија.

„Утрово слетав во Виена од Софија. Вчера таму во Софија, со премиерот и претседателот на Бугарија, Јанев и Радев, направивме голем европски исчекор. Ја враќаме довербата меѓу двете држави и меѓу нашите многу блиски, би рекол, братски народи. Македонско-бугарскиот пријателски дијалог е повторно на сила. Верувам дека низ овој процес Западен Балкан на Европа наскоро ќе ѝ донесе нова позитивна вест и барам поддршка од сите вас на тој пат. Европската перспектива мора да го победи евроспектицизмот“, рече Заев.

Премиерот вчера придружуван од министерот за надворешни работи Бујар Османи и вицепремиерот за евроинтеграции Никола Димитров во Софија се сретнаа со бугарскиот службен премиер Стефан Јанев и претседателот Румен Радев и со претставници на политички партии.

На заедничката прес конференција Јанев рече дека делегацијата на Заев дошла со конкретен предлог, што ќе го разгледале сеопфатно и професионално во наредните денови. Заев пак зборуваше за содржината на патоказот, кој според португалскиот предлог за деблокирање на македонските европски интеграции, треба да го достави македонската страна. Тој рече дека во патоказот се содржани работи поврзани со секторската соработка во сите можни области, со конкретни рокови, конкретни институции, а дека разговарале и за интензитетот на работата на историско-образовната комисија.

Заев на Самитот за Западен Балкан во Виена учествуваше на покана на австрискиот канцелар Себастијан Курц, а беше придружуван од заменик-претседателот на Владата задолжен за европски прашања Никола Димитров.

Кремљ- за состојбата со ковид во Москва виновен е „огромниот нихилизам“ на Русите

Портпаролот на Кремљ Дмитри Песков

Кремљ денеска за актуелниот скок на новозаразените со Ковид19 рече дека е виновен „огромниот нихилизам“ меѓу Русите, додека градоначалникот на Москва Сергеј Собјанин ги продолжи рестриктивните мерки кои ги презема неделава за до 29 јуни. Портпаролот на Кремљ Дмитри Песков рече дека јасно е дека руската вакцинална кампања не била толку ефективна колку што посакувале. Тој додаде дека претседателот Владимир Путин одблиску ја следи ситуацијата.

Тој додаде дека претседателот Владимир Путин одблиску ја следи ситуацијата.
Московскиот градоначалник претходно најави затворање на фан зоните за Европското првенство и забрана за групирање на повеќе од 1000 лица.

"Времено ги стопираме сите настани за масовна забава, ги затвораме салите за танцување и фан зоните“, напиша Собјанин.

Песков, пак, на новинарите им рече дека „огромниот нихилизам“ меѓу Русите, ниската стапка на вакцинацијата и неискреноста кога се инфицирани се причините поради кои во Москва се регистрирани рекорден број новозаразени со Ковид19.

Од утре во Грција и со брз тест

Граничен премин Богородица- Евзони

Можноста за влез во Грција и со негативен антигенски рапид (брз) тест и зголемување на возраста од шест на 12 години за задолжителниот тест, се двете промени на правилата за влез во Грција, кои од утре, во 6 часот наутро стапуваат во сила, а меѓу другото важат и за државјаните на Северна Македонија, јави дописничката на МИА од Атина.

Согласно министерската одлука, Северна Македонија и понатаму е на листата држави за кои важи исклучокот од забраната за влез во Грција на државјани на трети земји.

Па така, како што пренесува МИА, за патување кај јужниот сосед задолжителен е документ поврзан со Ковид-19, односно или сертификат за вакцинација, 14 дена по примената втора доза, или негативен резултат од ПЦР тест направен 72 часа пред патувањето или негативен резултат од рапид (брз) тест до 48 часа пред пристгнувањето во Грција или потврда за прележан коронавирус, како и пополнет PLF формуларот. Овие обврски важат за лица со наполнети 12 години.
Промените вчера ги најави заменик -министерот за цивилна заштита на Грција Никос Хардаљас, кој рече дека земјите ќе бидат поделени во зелена, портокалова и црвена категорија

Заев- прашањето со ФФМ ќе се реши врз основа на Договорот од Преспа и правилата на УЕФА

Премиерот Зоран Заев

Македонскиот премиер Зоран Заев во писмена изјава за грчката новинска агенција АНА-МПА и грчката државна телевизија ЕРТ вели дека веќе го покренале конкретниот аспект со Фудбалската федерација и во наредниот период ќе го решеле прашањето врз основа на Договорот од Преспа и правилата и традицијата на европската фудбалска федерација УЕФА.

Изјавата на премиерот Заев следува по реакциите во Грција за амблемот на Фудбалската федерација на Македонија ФФМ на дресовите на нашите репрезентативци.

"Цела Европа знае дека нашата фудбалска репрезентација на првенството ја претставува Северна Македонија. Дури и Федерацијата да не е јавен ентитет, националниот тим е. Како што е во сите земји во светот. Па така, јасно е и треба да биде јасно на сите нивоа дека е репрезентација на Северна Македонија, ирелевантно од иницијалите на Федерацијата на дресовите. Веќе го покренавме конкретниот аспект со Федерацијата и во наредниот период ќе го решиме прашањето врз основа на Договорот од Преспа и правилата и традицијата на УЕФА“, вели премиерот Заев.

Претседателот на Владата на Северна Македонија во изјавата додава дека „имплементацијата на Договорот од Преспа е работа во тек и нашата цел е постепено да најдеме решенија со соседите кои го спроведуваат Договорот и да нè придвижат напред врз основа на соработката и взаемното почитување“.

Инаку Грција по почетокот на Европското првенство во фудбал бараше од УЕФА , како што јавија медумите, македонската репрезентација да ја користи кратенката НМ или РНМ во англиската верзија на уставното име, а побара и да го разгледа името на македонската фудбалска федерација, и да се сменат дресовите.

Министерот за надворешни работи Бујар Османи вели дека Фудбалската федерација на Македонија (ФФМ) нема обрвска да го прилагоди своето име според Договорот од Преспа бидејќи е независна и непрофитна организација која во централниот регистар е регистрирана како здружение кое не прима државни пари.

УЕФА потврди дека ја примила забелешката од Грција но ја одби наведувајќи дека тие го користат името Фудбалска федерација на Република Северна Македонија во целата официјална комуникација и дека ја имаат прилагодено релевантната терминологија меѓу кои и статутот на УЕФА.

Пахор- една од првите задачи на претседавањето со ЕУ ќе биде деблокирање на С. Македонија

Претседателите на Словенија и Северна Македонија, Борут Пахор и Стево Пендаровски во Скопје, 25 септември 2020

Словенечкиот претседател Борут Пахор денеска рече дека една од првите задачи при претседавањето на Словенија со ЕУ ќе биде деблокирање на почетокот на пристапните преговори со Северна Македонија. Според него, тоа е „морално прашање“.

„Мислам дека треба да најдеме начин Бугарија да и даде зелено светло на Македонија“, изјави Пахор за словенечката новинска агенција СТА.
Како што пренесува агенцијата словенечкиот претседател рекол дека „тоа сега е морално прашање за Европа, а не само политичко“.

Неговата земја го презема ротирачкото шестмесечно претседавање со Унијата на први јули. Актуелен претседавач со ЕУ е Португалија, чиј министер за надворешни работи Аугусто Сантош Силва заедно со еврокомесарот за проширување Оливер Вархеји, минатиот месец во Скопје и во Софија донесоа предлог за деблокирање на македонските европски интеграции врз чија основа се води сега дијалогот меѓу Бугарија и Македонија.

„Свесен сум дека нема да биде лесно, освен тоа, се чини дека има уште повеќе можности Албанија да добие зелено светло“, рече Пахор, но додаде дека од гледна точка на Скопје, ова би било доста трагично.

Тој додаде дека напредокот во проширувањето на ЕУ кон Западен Балкан е важен за стабилноста на регионот и дека ситуацијата сериозно ја покажува неодамнешниот указ на американскиот претседател Џо Бајден за замрзнување на имотот и забрана на секој што придонесува за дестабилизација на тоа подрачје.

Приведена опозициска советничка во Москва

Кетеван Караиџе, општинска советничка од опозициската партија Јаблоко

Полицијата во Москва притвори општинска советничка од опозициската партија Јаблоко која минатиот месец објави дека има намера да се кандидира за државната Дума на изборите кои треба да се одржат во септември.

Кетеван Караиџе беше притворена доцна вчера откако полицијата вршела претрес во нејзиниот дом, соопшти шефот на нејзината изборна кампања Екатерина Успенскаја. Таа денеска додаде дека пред да биде однесена на распит им рекла на соседите дека полицијата и го одземала телефонот, компјутерот и две банкоти од по пет илјади рубљи (околу 70 американски долари) од џебот на нејзиното палто во кое советничката рекла дека не ги ставила таа.

Властите засега не соопштија која е причината за претресот и приведувањето на опозициската кандидатка. Според групата ОВД, која ги набљудува приведувањата на политичките демонстранти и активисти, адвокатот на Караиџе неколку часа безуспешно се обидува да стапи во контакт со својот клиент.

Неколку часа пред нејзиното приведувања полицијата во Санкт Петербург го приведе оптшинскиот адвокат Максим Резник за наводна нелегална трговија со дрога откако изврши претрес во неговиот дом, викендичка и станот на неговата мајка. Тој претходно учествуваше на настани за поддршка на политичките затвореници во Русија. Резник кажа дека непознат човек му кажал дека ќе биде под истрага за трговија со дрога ако јавно не го критикува затворениот опозициски активист Алексеј Навални.

Апсењето на Резник следува и откако неговиот внук Иван Дорофејев беше обининет за трговија со дрога. Мајката на Дорофејев вели дека инспекторите го терале нејзиниот син да сведочи против Резник.

ВМРО-ДПМНЕ бара владата да објави каков предлог даде Заев во Бугарија

Софија- македонскиот премиер Зоран Заев и бугарскиот службен премиер Стефан Јанев, 17.07.2021

ВМРО-ДПМНЕ денеска преку соопштение бара Владата да објави каков предлог дал вчера премиерот Зоран Заев во Бугарија.

„Јавноста има право да знае каков предлог и каков подарок овој пат Заев нуди на официјална Софија. Нели се преговараше само португалскиот предлог? Зоран Заев со секоја нова изјава продава се повеќе и повеќе, позициите на државата со Заев се трајно разнишани. Дали предлогот на Заев содржи работи со кои ги продава и идентитетот и историјата“, наведува ВМРО-ДПМНЕ.

Премиерот вчера придружуван од министерот за надворешни работи Бујар Османи и вицепремиерот за евроинтеграции Никола Димитров во Софија се сретнаа со бугарскиот службен премиер Стефан Јанев и претседателот Румен Радев и со претставници на политички партии.

На заедничката прес конференција Јанев рече дека делегацијата на Заев дошла со конкретен предлог, што ќе го разгледале сеопфатно и професионално во наредните денови. Заев пак зборуваше за содржината на патоказот, кој според португалскиот предлог за деблокирање на македонските европски интеграции, треба да го достави македонската страна. Тој рече дека во патоказот се содржани работи поврзани со секторската соработка во сите можни области, со конкретни рокови, конкретни институции, а дека разговарале и за интензитетот на работата на историско-образовната комисија. Заев рече дека комисијата досега постигнала договор за пет историски личности, а ВМРО-ДПМНЕ денеска прашува кои се тие.

Инаку, заедничката комисија досега одржа 14 средби. Лани беше објавено дека се усогласени ставовите за заеднички чествувања на пет историски личности - Цар Самоил, Кирил и Методиј, Климент и Наум Охридски. Во меѓувреме усвоени се препораки за учебниците за историја во петти клас во Бугарија и шесто одделение во Македонија.

УНХЦР- речиси 3 милиони раселени и покрај пандемијата

Првиот човек на агенцијата за бегалци на ОН Филипо Гранди

Војна, насилство, прогон и наришување на човековите права истерале речиси три милиони луѓе од своите домови мината година и покрај пандемијата со коронавирусот која го ограничи движењето, соопшти агенцијата за бегалци на Обединетите нации УНХЦР.

Вкупната бројка на раселени луѓе достигна рекорд од 82,4 милиони, што е двојно повеќе од пред десет години, наведува УНХЦР во последниот извештај објавен денеска.

Речиси 70 отсто од раселените се од пет земји- Сирија, Венецуела, Авганистан, Јужен Судан и Мјанмар. Првиот човек на агенцијата за бегалци на ОН Филипо Гранди кој го презентираше извештајот рече дека бројката од 82,4 раселени е највисока од кога водат евиденција.

Агенцијата со седиште во Женева соопшти и дека 99 земји од повеќе од 160 кои ги затворија границите поради Ковид19 не дозволиле исклучоци за луѓето кои барале заштита како бегалци или баратели на азил.

На црната листа на САД може да се најдат и лица од Грција што работат против Договорот од Преспа

Преспа- Тогашните министри за надворешни работи на Македонија и на Грција, Никола Димитров и Никос Коѕијас, во присуство на македонскиот премиер Зоран Заев и тогашните грчки премиер Алексис Ципрас го потпишаа договорот за името, 17.07.2018

Оние што работат против Договорот од Преспа и во држави надвор од Западниот Балкан, вклучувајќи ја и Грција, ќе може да се најдат на црна листа на САД. Ова за Гласот на Америка го изјавил портпарол на Стејт департментот, одговарајќи на прашањето дали администрацијата на американскиот претседател Џо Бајден планира да ги прошири санкциите и кон лица од други држави, конкретно од Грција, која е потписник на Преспанскиот договор, поради што и подлежи на одредени обврски за негова имплементација.

„Извршната наредба 14033 дозволува санкции против оние што ја потценуваат стабилноста на Западниот Балкан, каде и да се наоѓаат, под услов да ги исполнуваат релевантните критериуми за таргетирање“, рекол портпарол на Стејт департментот.

Тој во почетокот на неделава, во одговор за Гласот на Америка, исто така, истакнал дека одлуките за додавање нови имиња на црна листа се „предмет на внимателен, дисциплиниран процес и важи само во најсериозни случаи“.
На прашањето дали извршната наредба на Бајден опфаќа и граѓани кои јавно се спротиставуваат на Договорот од Преспа на социјалните медиуми, портпаролот тогаш истакнал дека намерата на САД не е да се спречат приватни лица да изразуваат мислење и оти САД охрабруваат силна дискусија и дебата меѓу граѓаните глобално и на Западниот Балкан.

Тој нагласил дека „извршната наредба е алатка да се таргетираат оние што ја поткопуваат стабилноста на Западниот Балкан, и помага да се зацврсти основата за мир, безбедност и стабилност во регионот“.

„Извршната наредба се однесува на постапки кои ги потценуваат демократските процеси, на обиди за прекршување, опструкција или закана за имплементација на меѓународни мировни договори, учество во сериозна злоупотреба на човекови права, или корупција, меѓу други активности“, рекол за ВОА портпаролот.

Претседателот Џо Бајден во почетокот на месецов донесе извршна наредба за замрзнување имот и забрана за влез во САД на лица кои претставуваат закана по безбедноста и мирот на секоја држава на Западен Балкан.

Санкциите ќе се однесуваат и на оние лица, кои, меѓудругото, се одговорни или вклучени во попречување на имплементацијата на Договорот од Преспа од 2018 година, и Охридскиот рамковен договор од 2001 година. Извршната наредба ќе опфаќа и лица кои директно или индиректно се вклучени во корупција, злоупотреба на јавни фондови, поткуп и слично.

Макрон во Берлин на разговори со Меркел за европски прашања

Ангела Меркел и Емануел Макрон на самит на ЕУ

Германската канцеларка Ангела Меркел денеска во Берлин ќе има работна вечера со францускиот претседател Емануел Макрон посветена на европската политика. Тоа ќе биде „прв пат оваа година канцеларката да добие гостин од странство и затоа е нешто посебно“, рече неименуван портпарол на германската влада.

Макрон, Меркел, Мишел: Светот ќе се смени по пандемијата


Разговорите ќе се однесуваат на прашања од европската политика, особено на позициите на Франција и Германија, со оглед на состанокот на Европскиот совет на 24 и 25 јуни. Тие, исто така, ќе разговараат за епидемијата на коронавирус, економското закрепнување, мигрантите и односите со Турција и Русија.

Њујорк Тајмс: Словенечкиот премиер ја следи тактиката на Трамп

Јанез Јанша и Виктор Орбан

Словенечкиот премиер Јанез Јанша, чија земја е претседател на Европската унија од 1 јули, следи тактика за која медиумите пишуваа дека ја користел поранешниот американски претседател Доналд Трамп, односно употреба на Твитер како политичка алатка и медиумска критика, објави Њујорк Тајмс. Јанша не би предизвикал никаква загриженост надвор од границите на неговата земја со околу два милиони жители, но неодамна шест европски групи за слобода на медиумите ги опишаа неговите постапки како „тактики во моќта на Трамп“.
Овие групи сега внимателно слушаат и бараат знаци што да очекуваат од Јанша, чии ставови се тесно поврзани со нелибералните влади во Унгарија и Полска.

Јанша ја „преживеа“ уставната тужба за импичмент

Двете земји се обвинети за поткопување на критичките медиуми и за промовирање на какви било теории на заговор, наведува американскиот весник. Аналитичарите проценуваат дека Словенија, која ќе претседава со ЕУ до крајот на декември, нема да вложи напори да ги предводи лидерите како унгарскиот премиер Виктор Орбан да ги почитуваат слободата на медиумите и другите принципи.

Израел уште еднаш ја нападна Газа по пуштањето запаливи балони

Експлозии го осветлуваат небото во градот Газа додека израелските сили ја гранатираат палестинската енклава, 16 јуни 2021 година.

Израелски авиони денеска ја нападна Газа откако палестинските милитанти повторно пуштија запаливи балони во јужен Израел. Огнените балони и воздушните напади му се закануваат на кревкиот прекин на огнот меѓу Израел и Хамас во Газа со кој завршија 11- дневните тешки борби во минатиот месец. Израелската војска соопшти дека погодила „места за лансирање ракети“ на Хамас како одговор на огнените балони, кои предизвикуваат пожари на израелското земјоделско земјиште.

Во ОН изгласано отворање меѓународна истрага за конфликтот во Газа

Во соопштението се вели дека израелските сили се подготвуваат за „различни сценарија, вклучително и продолжување на борбените дејствија.“ Нема извештаи за жртви од Газа, густо населена енклава од 2 милиони луѓе под блокада на Израел и Египет. Воздушните напади оваа недела на Газа беа први под новата израелска влада предводена од Нафтали Бенет, ултра-националистички политичар, откако долгогодишниот премиер Бенјамин Нетанјаху не успеа да состави влада.

Владата на Црна Гора на раб на паѓање по разрешување министер за коментари за Сребреница

На седницата на парламентот се гласа за разрешување на министерот Влаадимир Лепосавиќ, Подгорица - 17 јуни 2021 година.

Парламентот на Црна Гора го разреши просрпскиот министер за правда кој се сомнева во геноцидниот карактер на масакрот во Сребреница во 1995 година, во потег што ѝ се заканува на кревката коалициска влада. Мнозинството пратеници на 17 јуни исто така усвоија резолуција со која се осудува геноцидот во Сребреница во Босна и се забранува јавно негирање на злосторството. Просрпскиот Демократски фронт (ДФ) кој доминира во владата на премиерот Здравко Кривокапиќ гласаше против двете мерки.

Министерот за правда на Црна Гора: не поднесувам оставка

Кривокапиќ го повика министерот за правда Владимир Лепосавиќ да се повлече од функцијата во април, откако тој го доведе во прашање геноцидот во Сребреница и го негираше легитимитетот на Трибуналот на ОН за воени злосторства. Лепосавиќ одби да се откаже и доби поддршка од пратениците на ДФ, кои му беа налутени со Кривокапиќ кога тој без консултации побара од пратениците да го разрешат министерот.

Црногорскиот премиер бара смена на министерот за правда заради изјавата за Сребреница

Но, премиерот доби поддршка од опозициските пратеници на Демократската партија на социјалистите (ДПС) на претседателот Мило Ѓукановиќ и други помали партии.. Еден од лидерите на ДФ, Славен Радуновиќ, изјави пред парламентот дека Кривокапиќ повеќе не може да биде премиер. Кривокапиќ стана премиер во декември по изборите во август минатата година, кои по три децении ја тргнаа од власт партијата Ѓукановиќ.

Фаучи: САД инвестираат 3,2 милијарди долари во развој на антивирусни апчиња за ковид-19

Главниот американски експерт за заразни болести, д-р Ентони Фаучи

Соединетите држави ќе инвестираат 3,2 милијарди долари за унапредување на развојот на антивирусни апчиња за ковид-19 и други опасни вируси кои можат да се претворат во пандемии. Главниот американски експерт за заразни болести, д-р Ентони Фаучи, во обраќањето во Белата куќа ја објави оваа инвестиција како дел од новата „антивирусна програма за пандемии“. Програмата е насочена кон развој на лекови за симптоми предизвикани од потенцијално опасни вируси како што е коронавирусот.

Граѓани на БиХ даваат и до 2500 евра за лекови за спас од корона

Таблетите за „ковид-19“, кои ќе се користат за ублажување на симптомите по инфекцијата, се во развој и може да почнат да пристигнуваат до крајот на годината, во зависност од завршувањето на клиничките испитувања. Средствата ќе ги забрзаат овие клинички испитувања и ќе обезбедат дополнителна поддршка за истражување, развој и производство на приватниот сектор.

Ивермектин - стар лек, нова надеж против ковид кризата

„Постојат неколку лекови за многу вируси кои имаат пандемски потенцијал“, рече Фаучи, но додаде дека вакцините остануваат клучни во арсеналот на САД против оваа болест. САД досега одобрија еден антивирусен лек, ремдесивир, против ковид-19 и дозволија итна употреба на три комбинации на антитела кои му помагаат на имунитетот да се бори против вирусот. Сепак, сите лекови мора да се администрираат интравенски во болници или клиники, а побарувачката е мала заради овие логистички бариери.

Претседателски избори во Иран

Транспарент за изборна кампања, Техеран, 17 јуни 2021 година

Иранците денеска избираат нов претседател на гласањето за кое се предвидува воздржаност на избирачитее, бидејќи се очекува победа на еден од конзервативните кандидати. Седум кандидати добија право да учествуваат на 13-ти претседателски избори од исламската револуција во 1979 година, петмина од редовите на ултраконзервативната струја и двајца од реформаторската струја. Сепак, на изборите има само четворица кандидати, бидејќи тројца се повлекоа од трката.

Во Иран кандидатите се откажуваат од претседателските избори

Претседателот во Иран има ограничени овластувања затоа што најголемиот дел од моќта е во рацете на врховниот лидер, ајатолахот Али Хамнеи. Најголем фаворит е 60 годишниот Ебрахим Раиси, инаку шеф на судските органи, кој освои 38 насто од гласовите на претходните избори во 2017 година. Доколку никој не го освои мнозинството, вториот круг од изборите ќе биде на 25 јуни.

Вчитај повеќе

XS
SM
MD
LG