Достапни линкови

Вести

СЗО: за прв пат опаѓање на бројот на заразени со ковид-19

Тедрос Аданом Гебрејезус

Шефот на Светската здравствена организација Тедрос Аданом Гебрејезус го поздрави првиот неделен пад на глобалните случаи на ковид-19 од септември, наведувајќи го влијанието на мерките главно во Европа. Но, тој предупреди дека бројот на смртни случаи сè уште се зголемува низ целиот свет и оти случаите сè уште растат надвор од Европа. „Ова не е време за самозадоволство, особено со приближувањето на сезоната на празници во многу култури и земји“, рече тој, повикувјќи ги луѓето да бидат внимателни за време на празничната сезона.

Експертите на СЗО сакаат да одат во Вухан за да го испитаат потеклото на ковид-19

Бидејќи неколку европски земји го суспендираа пристапот до скијачките патеки за да го запрат ширењето на пандемијата на коронавирусот, шефот за итни случаи на СЗО, Мајкл Рајан, рече дека ризикот од инфицирање при скијање е минимален. Тој рече дека наместо да насочуваат кон некој специфичен спорт како скијање или пешачење, владите треба да размислат како најдобро да се намали контактот помеѓу луѓето за да се спречи ширењето на ковид-19.

види ги сите денешни вести

Португалија се надева на прва меѓувладина конференција со Македонија до јули

Португалија, која е актуелен претседавач со Европската унија (ЕУ), се надева дека во првата половина од годинава ќе се деблокира спорот со Софија и оти ќе може да се одржи првата меѓувладина конференција со Северна Македонија. Португалската државна секретарка задолжена за ЕУ, Ана Паула Закариаш, изјави за МИА дека нејзината земја која претседава со ЕУ до први јули годинава се надева дека ќе се деблокира спорот со Софија и ќе може да се одржи првата меѓувладина конференција со Северна Македонија.

Закариаш порача дека проширувањето на ЕУ е приоритет за португалското претседателство, што започна на 1 јануари и трае до 30 јуни годинава. Додаде дека во тек се контакти со двете страни – Скопје и Софија – за изнаоѓање на решение за билатералниот спор кој го кочи отворањето на преговорите со ЕУ.

Во исто време македонскиот претседател Стево Пендаровски порача дека ниедна земја членка на Унијата не смее преку поставување на ирационални барања да ја доведува во прашање европската иднина на нашиот народ. Премиерот Зоран Заев, пак, рече дека фокусот во разговорите со Бугарија до изборите кај нив, ќе биде на Акцискиот план, по што ќе следи водење на разговорите на политичко ниво.

Православните го празнуваат Водици без традиционални собири

Архивска фотографија од вадењето на светитот крст од осветените води на Вардар

Православните христијани денеска го празнуваат Богојавление (Водици), еден од најголемите христијански празници, кој денеска, поради пандемијата со ковид-19, ќе биде одбележан без традиционалните големи собири за вадење на светиот крст од осветени води.

Како една од мерките за спречување на ширењето на коронавирусот, не се дозволени традиционалните собири, а министерот за внатрешни работи Оливер Спасовски, вчера рече дека за денешниот ден имаат посебен план на дејствување, за што била информирана и Македонската православна црква.

Празникот Водици или Богојавлеие се празнувал уште во вториот век од христијанската ера. Конкретно е поврзан со крштевањето на Исус Христос од свети Јован, кој оттогаш се нарекува Крстител. Православните го празнуваат како еден од најголемите христијански празници, зашто на тој ден Исус Христос е крстен од Свети Јован Крстител во реката Јордан.

Времето денеска: Сончево, но студено со температури од -4 до 8

Времето денеска ќе биде сончево студено со мала локална облачност поизразена во северните делови. Ќе дува слаб до умерен, а долж Повардарието повремено засилен северозападен ветер, информираше Управата за хидромемеоролошки работи (УХМР).

Утринската температура се движи од минус 14 до минус 4, а дневната ќе биде во интервалот од минус 4 до 8 Целзиусови степени. Во Скопје и околината ќе биде сончево со мала до умерена облачност и со слаб до умерен северен ветер. Утринската температура се спушти до минус 6, а дневната ќе достигне до 3 Целзиусови степени.

Во четврток преку денот во западните делови на планините ќе има услови за појава на снег, а на пониските места понекаде ќе започне снег кој ќе премине во дожд. Во петок во западните делови, а во сабота насекаде ќе има повремен дожд и ќе дува повремено засилен јужен ветер што ќе влијае
да започне побрзо топење на снегот, информираше УХМР.

Фејсбук ќе именува правен застапник во Турција

Илустрација

Фејсбук денеска соопшти дека почнал процес на назначување правен застапник во Турција со цел оваа социјална мрежа да се усогласи со контроверзниот Закон за социјални мрежи, што Анкара го донесе во јули минатата година.

Според законот, компаниите, како Фејсбук и Твитер, треба да назначат свои претставници за решавање на поплаките за содржината на нивните платформи.

Доколку одбијат, социјалните мрежи се соочуваат со казни и можност за намалување на нивната брзина на Интернет.

„Оваа одлука не ги менува стандардите на компанијата, ниту глобалната постапка за разгледување на владините барања и ние ќе го повлечеме претставникот доколку се соочиме со каков било притисок“, се наведува во соопштението на компанијата Фејсбук.

Според турскиот закон, локалниот застапник на компанијата ќе има задача во рок од 48 часа да одговори на индивидуалните барања за отстранување на содржина од социјалната мрежа што ги нарушува приватноста и личните права или да ја наведе причината за одбивањето.
Компанијата ќе одговара за штета доколку содржината не се отстрани или блокира во рок од 24 часа.

Законот, исто така, бара да се чуваат сите податоци за социјалните медиуми во Турција, што предизвикува загриженост во врска со сегашната цензура на земјата.

Турските власти минатата година го казнија Фејсбук најмалку 40 милиони турски лири (5,3 милиони американски долари) за непочитување на барањето за назначување претставник.

Најновата одлука на Фејсбук е донесена само еден ден пред да ѝ се воведе забраната за рекламирање во Турција.

Јапонскиот премиер: Олимписките игри ќе бидат доказ за победата над коронавирусот

Луѓе со маски во Јапонија за време на епидемија на коронавирус

Јапонскиот премиер Јошиде Суга денеска вети дека ќе ја стави пандемијата под контрола и дека летоска ќе се одржат Олимписките игри во Токио, што ќе биде доказ за победата врз коронавирусот.

Во обраќањето пред Парламентот, Суга рече дека неговата влада ќе ги промени законите за да има казни за непочитување на мерките против коронавирусот.

Јапонија на почетокот на пандемијата добро ја контролираше состојбата, немаше строги мерки против ширењето на заразата, но во последните неколку недели бројот на заразени е во пораст.

Суга рече дека вакцината е клучна и оти се надева дека вакцинацијата ќе почне кога Министерството за здравство ќе ја одобри вакцината на Вајзер, кон крајот на февруари.

Олимписките игри требаше да се одржат во Токио минатото лето, но беа одложени за една година поради пандемијата и треба да започнат на 23 јули.

Прекината пробата за инаугурацијата на Бајден поради пожар во близина

Пожар во камп за бездомници во Вашингтон

Американските безбедносни сили ги евакуираа учесниците во пробата за инаугурацијата на новоизбраниот претседател Џо Бајден пред Капитолот во Вашингтон, откако во близина избувнал пожар.

Капитолот беше накратко затворен, а пробата одложена, откако бил забележан пожар во камп за бездомници неколку блока подалеку.

Вашингтон е во состојба на готовност поради можни насилни протести во пресрет на инаугурацијата на Бајден на 20 јануари.

Повеќе од 20 илјади вооружени припадници на Националната гарда се испратени за поддршка на локалната и федералната полиција оваа недела, откако демонстрантите упаднаа во Конгресот на 6 јануари при што загинаа пет луѓе, од кои еден полицаец.

Многу улици околу Капитолот се блокирани за сообраќај, а околу зградата е подигната ограда висока 2 метри.

Кампот за бездомници во кој изби пожар е оддалечен еден километар од Капитолот. Сè уште е нејасно како почнал пожарот и дали има повредени.
Учесниците на пробата, меѓу кои и воениот оркестар, беа упатени во затворени простории на безбедна локација во Капитолот.

Пронајдени телата на четворица морнари од потонатиот украински брод кај Турција

Илустрација: Црно Море

Турските спасувачи пронајдоа четири тела на членови на посадата на украинскиот товарен брод кој потона по невреме во Црното Море. Меѓу нив е и трупот на капетанот на бродот, кој е руски државјанин.

Руската амбасада во Анкара денеска соопшти дека телото на капетанот Виталиј Галенко руски државјанин, било пронајдено.

Руската федерална агенција за поморски и речен транспорт Росморречфлот претходно соопшти дека претходно биле пронајдени три тела во вчерашната поморска катастрофа. Тие соопштија дека шестмина членови на посадата, меѓу кои еден руски државјанин, биле спасени. Двајца од 12 членови на посадата од потонатиот брод биле руски државјани, а останатите се Украинци, соопшти Росморречфлот.

Турските власти вчера соопштија дека на бродот имало 13 луѓе.

Бродот во сопственост на украинска фирма пловел под знаме на државата Палау од Грузија кон Бугарија, кога потонал во близина на турскиот брег во Црното Море, соопштија украинските власти. Црноморскиот регион во изминатите денови е погоден од поројни дождови, снег и силни ветрови.

Нови 63 заразени со ковид-19, 176 оздравени и 13 починати

Во последните 24 часа се регистрирани 63 нови случаи на ковид-19 од направени 529 тестирања, информираше Министерството за здравство. Во Скопје има 42 нови случаи, Куманово-3, Струмица, Тетово, Прилеп, Пробиштип и Велес по два нови случаи и во Гостивар, Штип, Битола, Велес, Охрид, Кавадарци, Неготино, Виница и Крушево по еден нов случај.

Денеска Институтот за јавно здравје регистрира 176 оздравени пациенти.
Починати се 13 лица, на возраст од 52 до 87 години. Пациентите се починати во болнички услови.


Вкупната бројка на ковид дијагностицирани во нашата земја од почетокот на епидемијата изнесува 88992, бројката на оздравени пациенти е 73777, на починати е 2715, а бројот на активни случаи изнесува 12500.

Русија започна масовна кампања за вакцинација против коронавирусот

Жена чека ред за вакцинација во Москва

Русија започна масовна кампања за вакцинација против коронавирусот во обид да се запре ширењето на вирусот без ново затворање на економијата.
Десетици жители на Москва денеска чекаат пред мобилната клиника поставена на Црвениот плоштад за да ја примат првата доза од вакцината Спутник V, развиена во Русија.

Русија, која е четврта земја во светот според бројот на заразени од коронавирус, ја почна вакцинацијата минатиот месец, првично за луѓе од најизложените професии, како здравствени работници и наставници, иако сè уште траеше третата фаза од клиничкото тестирање на вакцината.

Минатата недела претседателот Владимир Путин нареди програмата за вакцинација да се прошири на сите 146 милиони жители на земјата и зголемување на производството на вакцината.

Вицепремиерката Татјана Голикова денеска рече дека власта планира да вакцинира 20 милиони луѓе во првото тримесечје од годинава.
Додека вакцината е широко достапна во Москва, а вакциналните пунктови се лоцирани на истакнати места во главниот град, повеќето региони пријавиле дека досега добиле помалку од 5000 дози.

За разлика од повеќето европски земји, Русија се воздржува од ново затворање и покрај тоа што е погодена од силен бран на нови заразени.

Во земјата досега се регистрирани над 3.5 милиони случаи на коронавирус, а над 66 илјади луѓе починаа, иако се верува дека бројот на смртни случаи е поголем.

ЕУ без конкретен одговор кога ќе пристигнат ветените вакцини на Западен Балкан

Илустрација

Потпретседателот на Европската Комисија, Марош Шефчович, не беше во можност да каже кога Македонија и другите земји во регионот ќе ги добијат вакцините против ковид-19 ветени од ЕУ, јави дописничката на МИА од Брисел.

Шефчович повтори дека Европската комисија и земјите членки го „поддржуваат“ и „се солидарни“ со Западниот Балкан, како и со другите земји од источното и јужното соседство на ЕУ, во борбата против вирусот.
Потпретседателот меѓутоа не одговори јасно на прашањето на МИА кога Македонија ќе ги добие вакцините, ниту зошто не се пристигнати ветените дози од Грција и Бугарија.

Денеска министрите за европски прашања одржаа состанок во пресрет на самитот на лидерите на ЕУ кој е закажан за 21 јануари, и разговараа, меѓу другото за кампањата на вакцинација во ЕУ.

Самата ЕУ се соочува со внатрешни тензии поради неефикасна координација помеѓу земјите членки во набавката на вакцините.
Шефчович истакна дека ЕУ е „главен донатор“ на механизмот Ковакс, кој има за цел да им помогне на земјите со пониски приходи да добијат вакцини за своето население.

„ЕУ ќе стори сѐ за Ковакс да донесе резултати“, изјави Шефчович.
Денеска, премиерот Зоран Заев рече дека Србија ќе ѝ даде на Македонија 8000 дози од вакцината на Фајзер/БиоНТек. Тоа се први вакцини кои ќе пристигнат во земјава.

Мијалков - Јас не сум наредил ниедно прислушување

Архивска фотографија: Сашо Мијалков и Гордана Јанкулоска во суд за случајот Таргет - Тврдина

Поранешниот директор на Управата за безбедност и контраразузнавање (УБК), Сашо Мијалков, на денешното сведочење пред судот, за случајот „Таргет-Тврдина“, изјави дека не постои ниту еден доказ дека илјадниците снимени разговори се од УБК и дека тие го вршеле прислушкувањето.
Според него, „прислушување лесно можело да се врши и надвор од системот на УБК“ и го отфрли како неточно обвинението дека формирал злосторничко здружение за да ја злоупотреби службената положба и овластувања. Тој ги отфрли обвинувањата дека самиот влегувал во системот и прислушкувал, како и дека „немало прислушкување без судска наредба во УБК“.

„Јас никогаш не сум имал ниту техничка можност ниту привилегија да можам да дадам или да издадам наредба за следење на комуникација во системот за следење во УБК“, рече Мијалков.

Во однос на уништувањето на опремата за прислушкување, Мијалков негираше дека во 2015 година побарал од Горан Грујевски да покрене постапка за уништување на овие системи. Тој пред Судот рече дека во земјава имало други системи за прислушување, бидејќи, како што кажа, кога „во 2014 година, израелска компанија презентирала опрема во неговата канцеларија и ја вклучила опремата, детектирала дека има уште три други системи“.

Во случајот „Таргет-Тврдина“ обвинети се 12 лица, вклучувајќи ги и поранешната министерка за внатрешни работи Гордана Јанкулоска, која исто така сведочеше денеска и рече дека не знаела оти потпишува документ за уништување на опремата за прислушување, како и Сашо Мијалков и уште 10 вработени во УБК. Станува збор за обвиненија за незаконско прислушкување и за уништување на опремата за прислушкување во времето на владеење на сега опозициската ВМРО-ДПМНЕ. Судскиот процес почна на почетокот од 2018 година.

Спасовски: За Водици со посебен план за да нема собири, разговарано е и со МПЦ

Архивска фотографија од Водици во Охрид, 211 година

За време на утрешниот празник Водици, полицијата ќе има зголемена активност и има изготвено посебни планови за спречување на собири како мерка против ширењето на коронавирусот, информираше на денешната прес-конференција министерот за внатрешни работи Оливер Спасовски.

„Јас очекувам дека ќе бидеме на висина на задачата и во утрешниот ден. Секако, тој што нема да почитува ќе сноси одговорност“, наласи Спасовски и додаде дека за планираните активности и за мерки е разговарано и со Македонската православна црква (МПЦ).

Тој упати апел до верските заедници и граѓаните да ги почитуваат мерките за време на утрешниот празник. Водици во Македонија се прославува со големи народни собири во сите градови и села со вадење на светиот крст од осветените води на реките, езерата...

ЕУ го осуди приведувањето на Навални и побара ослободување

Илустрација - Алксеј Навални и неговата сопруга Јулија

Европската унија (ЕУ) го осудува притворањето на рускиот опозициски политичар Алексеј Навални по неговото враќање во Москва на 17 јануари и повика на итно ослободување.

„Политизацијата на судството е неприфатлива и правата на Навални мора да се почитуваат. Исто така, ги повикуваме руските власти веднаш да ги ослободат сите оние новинари и граѓани кои биле приведени во врска со нивното известување и поддршка на Навални по неговото враќање. Овој притвор ја потврдува континуираната негативна шема на намалување на просторот за опозицијата, граѓанското општество и независните гласови во Руската Федерација. ЕУ внимателно ќе го следи развојот на настаните на ова поле и ќе продолжи да го зема предвид тоа при обликувањето на својата политика кон Русија“, се вели во денешното соопштение од Европската унија.

Европската унија, како што се наведува во истото соопштение, најостро го осуди обидот за атентат, преку труење со воен хемиски нервен агенс од групата „Новичок“, врз Алексеј Навални, и одговори со воведување рестриктивни мерки на шест лица и еден ентитет.

Рускиот опозиционер Алексеј Навални синоќа беше приведен во Москва, веднаш по слетувањето на авионот со кој се врату од лекување во Германија по лекувањето од труењето. Покрај него, уапсени беа и негови поддржувачи. Навални е приведен од Руската затворска служба поради, како што вели тааа, „непочитување на условната казна за сторена измама од 2014 година“.

Русија ѝ возврати на Холандија и протера нејзини дипломати

Илустрација - Зградата на руското Министерство за надворешни работи во Москва

Руското Министерство за надворешни работи протера двајца холандски дипломати во потег „со иста мерка“ по протерувањето за шпионажа на двајца руски дипломати од Хаг минатиот месец. Министерството во денешното соопштение вели дека „водејќи се од принципот на реципроцитет“, холандскиот вршител на должноста должник, Јоуст Реинтјес, бил повикан на состанок каде бил информиран за одлуката за протерување на двајцата дипломати.

Кавгата започна на 10 декември кога холандската служба за општо разузнавање и безбедност (АИВД) соопшти дека протера двајца неидентификувани Руси кои барале информации за вештачка интелигенција, полупроводници и нанотехнологија. Службата додаде дека двајцата работеле за руската цивилна разузнавачка агенција, позната како СВР.

Руската амбасада во Хаг во тоа време соопшти дека Холандија не презентирала докази за незаконски дејствија на руските дипломати и Министерството за надворешни работи во својата изјава на 18 јануари рече дека наводите се „неосновани и клеветнички“. Во него се додава дека двајцата холандски дипломати имале две недели да ја напуштат Русија.

„Таргет - Тврдина“: Јанкулоска вели не знаела дека потпишува уништување опрема за прислушување

Архивска фотографија - Сашо Мијалков и Гордана Јанкулоска во суд за случајот „Таргет - Тврдина“

Поранешната министерка за внатрешни работи, Гордана Јанкулоска, во денешното нејзино сведочење пред судот за предметот „Таргет-Тврдина“ рече дека не знаела што потпишува кога во УБК била формирана комисијата што ја уништи опремата за прислушувањето. Јанкулоска, која во овој предмет е обвинета во делот од случајот „Тврдина“, кој потоа беше споен со предметот „Таргет“ за прислушувањето.

„До вакви сознанија дојдов кога Специјалното јавно обвинителство го отвори предметот ‘Тврдина’ кој се однесува на уништувањето на опремата. Од оваа перспектива, можам да кажам дека, гледајќи ги писмените документи, без да се имаат предвид изјавите на сведоците, невозможно е да се препознае за што точно станува збор во таа постапка каде што била уништена опремата“, рече денеска Јанкулоска.

Таа го потпишала таквото решение на 13 мај 2015 година, а извештај од работата на комисијата која ја уништила опремата добила на 8 мај 2015, односно ден пред настаните во Диво Насеље и пет дена пред да поднесе оставка и да биде разрешена од Собранието.

Во случајот, покрај Јанкулоска, обвинети се и поранешниот директор на УБК, Сашо Мијалков, поранешниот началник на Петтата управа во МВР, Горан Грујевски, како и вработениот во УБК, Никола Бошкоски, шефот на кабинетот на Мијалков, Тони Јакимовски и уште 6 други лица од Управата. Според обвинението, преку три системи за следење на комуникациите во УБК, во периодот од 2008 до 2015 година, незаконски биле следени 4 286 телефонски броја, за кои воопшто не биле издадени судски наредби.

Петтиот сет антикризни ковид мерки ќе се знае до крајот на месецов

Крешник Бектеши

Министерот за економија, Крешник Бектеши, денеска информираше дека кон крајот на овој месец или најдоцна во првата недела од февруари Владата ќе излезе со петтиот сет антикризни мерки. Во тек се, рече Бектеши, консулатациите со стопанските комори и со сите засегнати страни, за да се донесат што поефикасни решенија.

Министерот оцени дека досегашните четири пакети го даддоа очекуваниот резултат, и во делот на зголемување на ликвидноата на компаниите и во делот на зачувување на работните места.

„Во моментов разговараме, не се точно дизајнирани мерките. Има различни предлози, но во рамки на можностите и буџетските средства определени за КОВИД програмата и секако, по состаноците со стопанските комори, ќе излеземе и заеднички ќе ги презентираме“, рече Бектеши.

За најпогодените сектори, како туристичкиот и угостителскиот, додаде дека „секако ќе има мерки, но како ќе изгледаат, ќе треба прво да се причекаат сите предлози од стопанските комори“.

Во етнички судир во Судан убиени 83 лица

Илустрација - Безбедносни сили на контролен пункт во Судан

Во судир меѓу етничките групи во Западен Дарфур во Судан се убиени 83 лица, пренесе новинската агенција Ројтерс, повикувајќи се на болнички извори. Во судирите што почнале викендов се повредени над 160 лица.

Според „Би-би-си“, борбите во главниот град на државата Ел Генеини почнале во саботата откако едно лице било избодено до смрт, по што бил воведен полициски час, а специјален тим бил испратен да го испита случајот.

Инцидентот се случил во близина на бегалски камп по што почнале судири меѓу вооружените милиции. Минатата година беше потпишан мировен договор, но во него не беа вклучени сите спротивставени етнички групи во Дарфур.

Во скопските ковид центри 14 нови приеми и 179 слободни места

Илустрација - Ковид-19 амбуланта во Скопје

Во изминатите 24 часа во ковид центрите во Скопје се хоспитализрани 14 нови пациенти поради компликации од корона вирусот, соопшти Министерството за здравство (МЗ). Со тоа, вкупно 280 лица сомнителни и потврдени за ковид-19 се лекуваат на инфективните оддели во главниот град. Во последното деноноќие, на интерните клиники имало 6 приеми. Во ковид центарот во ГОБ 8 Септември имало 5 нови приеми на пациенти, а на Инфективната клиника 3 во текот на вчерашниот ден. Во изминатите 24 часа дома се пуштени 9 оздравени пациенти.

„Во ГОБ 8 Септември има вкупно 88 болни, а на Клиниката за инфективни болести лежат 78 пациенти, додека во Иститутот за белодробни заболувања кај деца Козле има 18 пациенти. Вкупно 287 пациенти потврдени и сомнителни за КОВИД- 19 се лекуваат на инфективните оддели во болниците во главниот град. Голем дел од пациентите се на кислородна поддршка“, соопшти денеска МЗ.

Според Министерството, бројот на приеми во изминативе денови е стабилен и утрово до 8 часот имало 179 слободни места, а се очекува во тек на денот по направените исписи на оздравените пациенти да се ослободат и дополнителни места.

Мицкоски на средби со Орбан и Јанша ќе лобира за Македонија во ЕУ

Претседателот на ВМРО-ДПМНЕ, Христијан Мицкоски

Претседателот на ВМРО-ДПМНЕ, Христијан Мицкоски, ќе се сретне со унгарскиот премиер Виктор Орбан и со словенечкиот премиер Јанез Јанша, како дел од неговата мини дипломатска офанзива кај сестринските партии во регионот и Европа, соопштија од ВМРО-ДПМНЕ.

„Независно што ВМРО-ДПМНЕ е во опозиција треба да се искористи сиот расположлив потенцијал да се направи своевиден притисок и да се придвижиме кон патот на Европската унија (ЕУ)“, вели Мицкоски, цитиран во партиското соопштение.

Тој вели дека со Орбан и Јанша ќе разговара за „можноста Унгарија и Словенија да помогнат за придвижување кон европската иднина“.

Заев: Политички преговори со Бугарија по нивните избори

Премиерот Зоран Заев пред Судот во Скопје

Премиерот Зоран Заев денеска најави дека пратениците на седницата на собраниската Комисија за надворешна политика најверојатно ќе бидат информирани за деталите од размената на идеи меѓу работните групи и министрите за надворешни работи на Македонија и Бугарија.

„За деталите од размената на идеи, за нон-пејперот, нашето последно размислување, но и нивната реакција која следуваше како одговор на нашиот акциски план“, рече денеска премиерот Заев по рочиштето за судскиот спор меѓу него и новинарот Зоран Божиновски, кого премиерот го тужи за клевета.

Во координација со претседателот на собраниската Комисија за надворешна политика ќе биде договорен точен термин за одржување на седницата, но за точната содржина на она за што ќе се разговара Заев упати на министрите. Тој само кусо најави дека процесот на официјални преговори е завршен и очекува дека сега ќе следува процес на реализација на акцискиот план, а веднаш по изборите во Бугарија ќе се почне со разговори и преговори на политички основи.

Почна сослушувањето на рускиот опозиционер Алексеј Навални

Принтскрин од видеото од Навални во судница во градот Кимки што го објави портпаролката на Налавни, Кира Јармиш

Сослушувањето во случајот на рускиот опозиционер Алексеј Навални почна денеска во градот Химки, во близина на Москва, соопшти денеска неговата портпаролка Кира Јармиш. Таа на Твитер објави повеќе видеа со изјави од Навални по приведувањето и спроведувањето во судот во Химки.

Навални доцна синоќа беше приведен веднаш по слетувањето во Москва, на враќање од Германија, каде беше на лекување по труењето со нервниот агенс новичок.

Рускиот затворски орган ФСИН го потврди притворот за Навални и во соопштение за јавноста објави дека „Навални бил во притвор поради повеќекратни прекршувања на условите од неговата условна казна во врска со пресуда за измама во 2014 година“.

ФСИН пред десетина дена објави дека Навални ќе биде приведен доколку се врати во Русија, што не ја смени одлуката на критичарот на Кремљ „да се врати дома“. На Навални му се заканува затворска казна од 3,5 години. По неговото апсење реагираа повеќе западни дипломати, премиери и претседатели со барање за негово ослободување.

Обезбедени 802 единици ковалесцентна плазма за третман на ковид позитивни

Илустрација - Ковид-19 центар во Скопје

Од Институтот за трансфузиона медицина денеска информира дека се обезбедени вкупно 802 единици конвалесцентна плазма за третман на пациенти заразени со Ковид-19, од вкупно 729 донори.

„Со крвна плазма досега се третирани 661 пациент. Со ваквиот највисок чин на хуманост, граѓаните кои се оздравени имаат можност да им помогнат на тие кои во моментот се борат со коронавирусот. Да им помогнеме на лицата кои се борат со коронавирусот, да донираме конвалесцентна крвна плазма“, стои во соопштението од Институтот за трансфузиона медицина, од каде апелираат до сите оздравени пациенти кои имале Ковид-19 дека преку даруваната конвалесцентна плазма, антителата на оздравените пациенти се користат во сузбивање на болеста кај друго лице со Ковид-19.

Лицето дарител на конвалесцентна плазма треба да има документиран лабораториски доказ дека било болно од Ковид-19 и да биде минимум 21 ден без симптоми, по што се прави дополнителен тест за потврда дека нема присуство на вирус.

Од почетокот на коронакризата во земјава се регистрирани 88.938 позитивни лица, оздравеле 73.601, починале 2.702, а активни случаи се 12.635.

Србија ќе ѝ даде на Македонија 8000 вакцини од „Фајзер“ по набавна цена

Архивска фотографија - Српскиот претседател Александар Вучиќ и македонскиот премиер Зоран Заев

Македонија ќе добие 8000 вакцини против ковид-19 како помош од Србија во снабдувањето на вакцини против корона вирусот, информираше денеска премиерот. Тој ја поздрави одлуката на српскиот претседател Александар Вучиќ за помошта, што според него е добар знак на солидарност. Премиерот Заев рече дека српскиот претседател „изустил“ дека оваа количина можат и да ни ја донираат, на што Заев му рекол дека „Македонија има пари да си ги плати вакцините“, по што Вучиќ рекол дека ќе ни ги дадат вакцините по набавна цена.

„Понудената помош од Србија ја прифативме и ќе добиеме 8000 вакцини од Фајзер. Ова е добар чин на солидарност на нашиот сосед, пријателството продолжува. Првите вакцини ќе се за здравствените работници, за семејствата кои имале член позитивен на Ковид-19, хронично болните лица“, реше премиерот Заев.

Тој додаде дека не се исклучува да добиеме помош од Србија вакцини и од други производители, како и дека во текот на денешниот ден ќе бидат утврдени деталите.

И премиерот и министерот за здравство Венко Филипче, неколку пати изминатите десетина дена информираа дека првите вакцини против ковид-19 во Македонија ќе стасаат во февруари, а дека вакцините преку системот за солидарност не се стасани се уште бидејќи земјите кои требало да ни дадат од своите вакцини не ја добиле нарачаната количина. Заев денеска потсети дека во тек е постапката на потпишување договор за 800.000 вакцини од „Фајзер“, кои ќе пристигнат во земјава во текот на оваа година и ќе бидат доволни за 400 000 граѓани.

За 24 часа во Македонија казнети 412 граѓани за неносење маска на лице

Илустрација - Граѓани со заштитни маски за лице во Скопје

Вкупно 412 прекршоци за неносење заштита на лице се изречени изминатите 24 часа на територијата на Република Северна Македонија, соопшти денеска Министерството за внатрешни работи (МВР).

МВР и денеска апелира да се почитуваат мерките и протоколите донесени од Владата, за справување со КОВИД-19. Казната за непочитување на оваа задолжителна мерка изнесува 20 евра.

Остри меѓународни осуди за приведувањето на Навални

Алексеј Навални со сопругата Јулија по пристигнувањето во Москва

Притворањето на рускиот опозициски политичар Алексеј Навални веднаш по пристигнувањето во Москва од Германија, предизвика бран од меѓународни критики.

Германскиот министер за надворешни работи Хајко Мас денеска повика на итно ослободување на Навални.

Русија е обврзана од својот устав и од меѓународните обврски спрема принципот на владеење на правото и заштитата на граѓанските права. Овие принципи, се разбира, мора да се применат и на Алексеј Навални. Тој треба веднаш да биде ослободен “, рече Мас.

Претходно и американскиот државен секретар Мајк Помпео исто така побара „итно и безусловно ослободување“ на Навални. Приведувањето на критичарот на Кремљ, Помпео го нарече „последен во серијата обиди да се замолчи Навални и другите опозициски и независни личности кои ги критикуваат руските власти.

И администрацијата на новоизбраниот американски претседател Џо Бајден повика на итно ослободување на Навални, додавајќи дека „сторителите на срамниот напад врз неговиот живот мора да одговараат“.

Претседателот на Европскиот Совет Шарл Мишел го нарече апсењето на опозицискиот политичар „неприфатливо“ и побара негово итно ослободување.

Вчитај повеќе

XS
SM
MD
LG