Достапни линкови

Прекината собраниската седницата за вонредните состојби


Илустрација: Собраниска седница

Собранието денеска ја почна седницата на чиј дневен ред беа ставени петте одлуки за прогласување вонредна состојба поради пандемијата предизвикана од ковид-19, но расправата по нив не почна бидејќи седницата беше прекината по усвојувањето на две одлуки за формирање и изменување на состав на собраниски работни тела.

По усвојувањето на дневниот ред, пратениците ги усвоија предлог одлуките за раководствата и членовите на собраниските тела, пратенички групи, собраниски делегации.

По ова претседателот на Парламентот Талат Џафери ја прекина седница и рече дека пратениците дополнително ќе бидат информирани за продолжението. За попладне најави одржување седница на чиј дневен ред е и изборот за потпретседатели на Собранието.

Пред почетокот на оваа седница од Пратеничката група на ВМРО-ДПМНЕ најавија дека ќе гласаат против потврдувањето на петте одлуки за вонредна состојба што ги донесе претседателот на државата Стево Пендаровски поради пандемијата предизвикана од КОВИД-19, поради тоа што, како што рекоа, тие не биле искористени за целта за која биле донесени, туку биле злоупотребени од Владата.

Петте одлуки за вонредна состојба беа донесени на 18 март, 16 април, 16 мај, 30 мај и 15 јуни, поради пандемијата од КОВИД-19. Одлуките ги донесе претседателот на државата Стево Пендаровски, бидејќи во тој период Собранието беше распуштено заради одржување на предвремените парламентарни избори што првично беа закажани за 12 април, а потоа поради пандемијата беа презакажани и се одржаа на 15 јули. За овие одлуки потребно е да гласаат 80 пратеници. Станува збор за две одлуки за вонредна состојба во траење од по 30 дена, две од по 14 и една одлука за вонредна состојба во траење од 8 дена.

XS
SM
MD
LG