Вести
Од денеска повторно редовно пријавување на невработените
![Архивска фотографија - Агенција за вработување Скопје](https://gdb.rferl.org/623C2DD3-FEEA-4457-9A11-EE010F1E3C72_w250_r1_s.jpg)
Сите невработени лица од денеска, 15 септември 2020 година, продолжуваат со редовното пријавување на секои 30 дена, за активните баратели на работа, односно на секои 6 месеци за другите лица кои бараат работа, информираше денеска Агенцијата за вработување.
Секое невработено лице кое има оставено контакт телефонски број веќе е известено по смс порака за точниот датум кога треба да се пријави во надлежниот центар за вработување или дисперзирана канцеларија, од причина што од 15.09.2020 година повторно е ставен во функција системот за распределување на термини за редовно пријавување, согласно законските рокови за пријавување на 30 дена односно 6 месеци, соопшти Агенцијата.
„Сите невработени лица кои се пријавуваа во периодот кога беше запрено редовното приојавување, ги замолуваме да го почитуваат терминот наведен во смс пораката, кој што е системски изгенериран. Невработените лица кои немаат оставено точен контакт телефонски број и кои немаат добиено смс порака, потребно е да се пријават во наредните 30 дена. Воедно напоменуваме дека при пријавувањето задолжително треба да се почитуваат препораките на Министерството за здравство за спречување на ширење на вирусот КОВИД 19, односно задолжително носење заштитни маски и одржување соодветна дистанца од другите лица“, стои во известувањето од Агенцијата.
види ги сите денешни вести
САД подготвуваат нови санкции за Иран
![Џенет Јелен, американска министерка за финансии](https://gdb.rferl.org/3ae875e3-3e6e-4588-b971-70c907b09bdd_w250_r1_s.jpg)
На 16 април, американската министерка за финансии Џенет Јелен предупреди на глобалната економска штета од сè понапнатата ситуација на Блискиот Исток.
Таа вети дека САД и нивните сојузници нема да се двоумат да воведат санкции врз Иран за да се спротивстават на неговите „малигни и дестабилизирачки активности“.
Јелен ова го изјави пред почетокот на состанокот на Меѓународниот монетарен фонд и Светската банка, кој e закажан за оваа недела.
Новите американски санкции против Иран би можеле, како што наведе, да го намалат капацитетот на таа земја за извоз на нафта.
„Очекувам дека ќе преземеме акција против Иран во наредните денови“, рече Јелен на конференцијата во Вашингтон.
Според неа, масовниот ракетен напад на Иран врз Израел укажува на важноста од користењето на американските економски алатки, како знак на одговор „на малигната активност“ на таа земја.
„Од нападите извршени викендов до нападите на Хутите во Црвеното Море, акциите на Иран ја загрозуваат стабилноста на регионот и може да предизвикаат прелевање на „економска штета““, рече таа.
На 13 април, доцна во ноќта, Иран го нападна Израел со проектили и беспилотни летала како одмазда за нападот врз иранскиот конзулат во Сирија на 1 април, што Техеран им го припишува на израелските сили.
Израел најави дека ќе одговори на иранскиот напад, додека светските лидери повикуваат на воздржаност од Израел, стравувајќи од спирала на насилство.
Зеленски потпиша нов закон за воена мобилизација во Украина
![Војниците го слават крајот на обуката во воена база во близина на Киев, 25 септември 2023 година.](https://gdb.rferl.org/01000000-0a00-0242-74e5-08dc5aed7204_w250_r1_s.jpg)
Украинскиот претседател Володимир Зеленски на 16 април го потпиша Законот за мобилизација, со кој се очекува да се реши проблемот со недостигот на војници во Украина, поради руската инвазија на земјата.
Станува збор за закон што беше усвоен од украинскиот Парламент на 11 април, а со кој ќе се регулира начинот на регрутирање на граѓаните, по неколкумесечно одложување и откако беа поднесени илјадници амандмани за да се ублажи првичниот нацрт, кој беше непопуларен.
Законот, меѓу другото, ги обврзува Украинците на возраст од 18 до 60 години да ги информираат воените власти за нивните лични податоци, па канцелариите за регрутирање полесно ќе можат да видат кој во кој регион може да се мобилизира.
Способните мажи со закон ќе бидат обврзани постојано да носат документ за регистрација издаден од нацрт-канцеларијата, додека на службените лица ќе им биде дозволено да го побараат документот на улица.
Иако пратениците ублажија некои одредби поврзани со затајување на воена служба, Законот дозволува казнување за затајување на службата.
Законот не предвидува никакво временско ограничување за отслужување на воениот рок, што значи дека војниците кои се борат од почетокот на инвазијата, односно од февруари 2022 година, се уште не знаат кога ќе бидат демобилизирани.
Поради воена состојба, на мажите на воена возраст им е забрането да одат во странство, но нема процедура за повикување на украински мажи кои се надвор од државата.
Сепак, новиот закон предвидува дека од Украинците на кои им требаат конзуларни услуги, како што е обновувањето на пасошот, може да се бара да достават документи за воена регистрација.
Путин го повика Блискиот Исток да се воздржи од нови конфликти
![Рускиот претседател Владимир Путин и иранскиот претседател Ебрахим Раиси, во Москва, 7 декември 2023 година.](https://gdb.rferl.org/d6a0b30f-f0fc-4ac2-9ab0-2869c87ec1fc_w250_r1_s.jpg)
Рускиот претседател Владимир Путин ги повика сите страни на Блискиот Исток да се воздржат од потези кои би предизвикале нов конфликт кој би имал катастрофални последици, објави Кремљ на 16 април, пренесува Ројтерс.
Путин, кој ги зајакна врските со Иран откако испрати руски војници во Украина во 2022 година, телефонски разговараше со иранскиот претседател Ебрахим Раиси за нападот на Иран врз Израел, кој Кремљ го нарече „одмазднички мерки“.
Доцна на 13 април, Иран лансираше беспилотни летала и проектили кон Израел како одмазда за израелскиот напад врз неговиот конзулат во Сирија на 1 април, во кој загинаа седум членови на Исламската револуционерна гарда, вклучително и двајца команданти.
Иран го смета Израел како одговорен за овој напад, кој, од друга страна, ниту ја потврди ниту негираше својата вмешаност во инцидентот.
Во својот прв јавен коментар за иранскиот напад врз Израел, Путин рече дека главната причина за моменталната нестабилност на Блискиот Исток е „нерешениот конфликт меѓу Палестинците и Израел“.
Кремљ соопшти дека Путин се надева дека сите страни ќе покажат воздржаност и ќе спречат нова рунда конфликти.
Раиси, како што се наведува во соопштението, рекол дека акциите на Иран се од ограничен карактер и дека „Техеран не е заинтересиран за натамошна ескалација на тензиите“.
Русија, која воспостави блиски врски со врховниот водач Али Хамнеи и арапските лидери како саудискиот престолонаследник Мохамед бин Салман, постојано го критикуваше Западот дека ја игнорира потребата од независна палестинска држава во границите од 1967 година.
Путин и Раиси ги потврдија ставовите на Русија и Иран дека е потребен итен прекин на конфликтот во појасот Газа, како и решение за тешката хуманитарна ситуација и создавање услови за политичко и дипломатско решение на кризата.
Соединетите Американски Држави (САД) веруваат дека сè посилните партнерства меѓу Русија, Кина, Иран и Северна Кореја претставуваат еден од најопасните предизвици во последните четири децении.
Иран и достави на Русија голем број балистички ракети и беспилотни летала, кои Москва ги користеше во војната во Украина, која започна во февруари 2022 година.
Собранието на РС закажа седница за Изборниот закон и извештајот за Сребреница
![Вонредна седница на Народното собрание на Република Српска, Бања Лука, 28 март 2024 година.](https://gdb.rferl.org/01000000-0aff-0242-bd59-08dc4f2cb8d9_w250_r1_s.jpg)
Народното собрание на Република Српска (НСРС) ќе расправа за Предлог-изборниот закон на Република Српска на посебна седница закажана за четврток, 18 април.
Ова беше објавено по колегиумот на ентитетскиот Парламент во вторник, 16 април.
Нацрт-изборниот закон на РС, усвоен на крајот на март, предвидува дека ентитетската изборна комисија ќе ја преземе правната улога на државната Централна изборна комисија на БиХ во организирањето на локалните избори во тој ентитет, но и општи избори за претседател и потпретседатели на РС.
Од крајот на војната во 1995 година, ентитетите во БиХ никогаш немале јурисдикција за спроведување на изборите во земјата, ниту пак ентитетската јурисдикција над изборите е спомната во Уставот на БиХ.
Претставниците на меѓународната заедница работата на донесувањето на овој закон ја оценија како „директен напад врз државната структура на БиХ“.
И Централната изборна комисија претходно објави дека тие се единствените одговорни за одржување на изборите во Босна и Херцеговина.
Сите избори од донесувањето на Изборниот закон на БиХ во 2001 година до денес беа организирани од ЦИК, а изборите пред тоа беа организирани од Привремената изборна комисија, формирана со Дејтонскиот договор.
Локалните избори во БиХ, на кои се избираат градоначалници, шефови на општини и локални парламенти, се уште не се закажани, но законот предвидува тие да се одржат на 6 октомври.
Властите на РС ја започнаа процедурата за донесување на овој закон откако високиот претставник во БиХ Кристијан Шмит, кој не е признат од властите во РС, наметна технички измени во изборниот закон на БиХ, шест месеци пред локалните избори. закажана за октомври.
Меѓу другото, измените вклучуваат професионализација на избирачките одбори и биометриска идентификација на гласачите, како и други измени за намалување на можноста за изборни манипулации.
Пред пратениците и извештај со кој се негира геноцидот во Сребреница
На дневен ред на Парламентот на РС ќе биде и „извештајот на Независната меѓународна комисија за истражување на страдањата на сите народи во регионот на Сребреница од 1992 до 1995 година“, кој го формираше Владата на РС.
Овој извештај беше претставен на седницата на НСРС во јуни 2021 година, а во него, меѓу другото, беше наведено дека „геноцид не е извршен во Сребреница“.
Во 2007 година, Меѓународниот суд на правдата во Хаг го окарактеризира злосторството во Сребреница како геноцид, во кое во јули 1995 година беа убиени повеќе од 8.000 мажи и момчиња од енклавата под заштита на Обединетите нации.
За овие злосторства, повеќе од 50 лица беа осудени на околу 700 години затвор.
За законите за имунитет и референдум
На седницата треба да се најдат Предлог-законот за референдум и граѓанска иницијатива на РС и Предлог-законот за имунитет на Република Српска, кои во нацрт-форма беа усвоени во декември минатата година.
Предлог-законот за имунитет предвидува дека службениците во РС ќе бидат заштитени од непочитување на одлуките на високиот претставник. Во јуни, ентитетскиот парламент донесе закон според кој неговите одлуки нема да се применуваат во РС.
Инаку, одлуките на високиот претставник во Босна и Херцеговина се конечни и обврзувачки.
Предлог-законот за референдум и граѓанска иницијатива, кој е предлог на владејачките партии предводени од СНСД, предвидува дека за успех на референдумот ќе биде потребно мнозинство гласачи, а не мнозинство од вкупниот број гласачи запишани во избирачкиот список, како што вели сегашниот закон.
Украински дронови уништиле радар во Русија, тврдат официјални лица од Киев
![Наводно уништен радар „Небо - СВУ“ во Русија (илустрација)](https://gdb.rferl.org/01000000-0aff-0242-f90e-08dc5e0eb17f_w250_r1_s.png)
Беспилотните летала на Службата за безбедност на Украина (СБУ) уништиле воени радари во областа Брјанск во Русија, потврдил извор од украинската служба, пишува Радио Слободна Европа на англиски јазик.
„Радари вредни 100 милиони долари беа погодени од седум беспилотни летала“, изјави за (РСЕ) извор од СБУ кој сакаше да остане анонимен, додавајќи дека има потврда дека рускиот комплекс повеќе не е во функција.
Тој не прецизираше кога се случил наводниот напад, а информацијата не можеше да биде независно потврдена. Неодамна, Русија не спомна ниту обид за украински напад врз Брајанск.
Радарскиот комплекс „Небо-СВУ“ го надгледуваше небото на површина од околу 700 километри во Украина, нудејќи им на руските трупи подобра контрола за време на нападите и поддршка на бомбардери кои целат на украинска територија.
Руското Министерство за одбрана на 16 април објави дека руските сили „спречиле обид за напад на украинско беспилотно летало“, соборувајќи три над регионот Белгород.
Соочена со недостиг од системи за противвоздушна одбрана, оружје и муниција, украинската војска се повеќе прибегнува кон напади со беспилотни летала на руска територија, насочени кон воени инсталации и капацитети за преработка на нафта.
Болните и изнемоштени лица до полноќ можат да се пријават за гласање на претседателските избори
![Избори (архивска фотографија)](https://gdb.rferl.org/05e00000-0a00-0242-872c-08d993b70817_w250_r1_s.jpg)
Избирачот кој не е во можност да гласа на гласачкото место (немоќно или болно лице), а сака да гласа за тоа ќе ја извести ОИК најдоцна 7 дена пред денот определен за гласање, 16 април, 24:00 часот, посочуваат од Државната изборна комисија (ДИК).
Од ДИК информираат дека немоќните или болните лица гласаат во нивните домови еден ден пред денот определен за одржување на изборите.
„Ова гласање го спроведува избирачкиот одбор надлежен за спроведување на гласањето за избирачкото место каде припаѓаат овие лица, на 23 април (вторник)“, се посочува во Роковникот на институцијата.
Кампањата за претседателските избори завршува на полноќ на 22 април. Првиот круг за претседателските избори е на 24 април (среда).
Грмотевици и поплави во Пакистан - загинаа 39 лица
![Млад жител носи работи од поплавен дом по силен дожд во Пешавар, Пакистан, 15 април 2024 година.](https://gdb.rferl.org/01000000-0aff-0242-4dd0-08dc5dead0a6_w250_r1_s.jpg)
Во поројните дождови и грмотевици кои зафатија неколку делови на Пакистан загинаа 39 лица, а десетици беа повредени во изминатите неколку дена, соопштија локалните власти на 16 април.
Најпогодени се провинциите Хајбер Пахтунхва на северозапад, Пенџаб на исток и Балучистан на југозапад.
Главниот град на Белуџистан, Квета, прогласи „вонредна состојба од урбани поплави“, соопшти пакистанската агенција за управување со катастрофи.
Повеќето од жртвите се земјоделци кои биле погодени од гром додека вршеле теренска работа.
Поради обилните врнежи во 2022 година, во Пакистан се случија огромни поплави во кои загинаа 1.739 луѓе, а штетата беше проценета на 30 милијарди долари (28 милијарди евра).
Европската Комисија го одобри Планот за реформи и инвестиции во Украина
![Логото на Европската Комисија](https://gdb.rferl.org/33F10B8A-757E-4865-9901-938D9C3D57BA_w250_r1_s.png)
Европската Комисија донесе Одлука со која даде позитивна оценка за спроведување на Планот за Украина, кој претставува сеопфатната стратегија за реформи и инвестиции во земјата за следните четири години, изјави портпаролката на ЕК за соседска политика и проширување Ана Писонеро.
„Планот се базира на Украинскиот механизам и гарантира дека на Украина ќе и се овозможи финансирање за одржување на нејзината администрација во функција, за исплата на плати и пензии, за обезбедување на основни јавни услуги и за да ги поддржи обновата и реконструкцијата додека продолжува да се брани од руската агресија“, изјави Писонеро.
Таа потенцира дека исплатата на 50-те милијарди евра предвидени со Механизмот во следните четири години, ќе зависи од имплементацијата на договорените реформи и инвестиции наведени во Одлуката, како и под услов Украина да продолжи да ги поддржува и почитува демократските механизми.
„Планот, исто така, обезбедува рамка за управување со обновата, реконструкцијата и модернизацијата на Украина и содржи соодветни механизми и аранжмани за заштита на финансиските интереси на ЕУ, преку обезбедување на ефективна имплементација, следење и известување“, додаде Писонеро.
Комисијата проценува дека Планот за Украина е усогласен и избалансиран со целите на Украинскиот механизам за справување со предизвиците на Киев на патот кон членство во ЕУ и како одговор на потребите за обнова, реконструкција и модернизација на земјата, со што ќе се поттикне одржливи економски раст и ќе се привлекуваат инвестиции за засилување на потенцијалот за раст на државата на среден и подолг рок.
Планот идентификува 69 реформи и 10 инвестиции, поделени на 146 квалитативни и квантитативни показатели.
Реформите предложени во Планот за Украина опфаќаат 15 области, вклучувајќи ги енергијата, земјоделството, транспортот, зелената и дигиталната транзиција, човечкиот капитал, како и државните претпријатија, деловното опкружување, јавните финансии и децентрализацијата.
Целта на реформите е да ги подобрат макроекономската и финансиската отпорност и управувањето на Украина, да ги зголемат капацитетите и ефикасноста на администрацијата, одговорноста и интегритетот на судството, да го поддржат развојот на приватниот сектор и да создадат амбиент погоден за одржлив економски раст. Инвестициите, пак, се наменети за областите на човечкиот капитал, енергијата, транспортот, земјоделско-прехранбениот сектор, деловното опкружување и регионалните политики.
Земјите членки на ЕУ сега имаат рок од еден месец за усвојување на оваа Одлука на Европската Комисија. Усвојувањето на Одлука за спроведување на Планот ќе и овозможи на Комисијата да и исплати на Украина 1,89 милијарди евра во форма на предфинансирање, додека не започнат редовните исплати поврзани со спроведувањето на реформските и инвестициските индикатори утврдени со документот.
Сè помалку учениции и сè повеќе затворени училишта
![илустрација](https://gdb.rferl.org/01000000-0aff-0242-d6da-08db1b08e781_w250_r1_s.jpg)
Бројот на ученици во редовните основни училишта на крајот на 2022/2023 година е намален за 1,4 проценти, а бројот на ученици во средните училишта за 3,9 проценти во однос на претходната учебна година, покажуваат податоците објавени од Државниот завод за статистика.
Според статистичките податоци, во учебната 2022/2023 година во основните училишта имало вкупно 182 245 ученици, а во средните училишта 66 678 ученици.
Податоците меѓудругото, покажуваат дека за една година се затворени 14 училишта.
Драстично намален број на ученици годинава има во поголемите општини како Битола, Охрид и Прилеп. Повеќе ученици се запишани само во Аеродром и Чаир. Секоја година сè повеќе деца на македонски државјани се раѓаат во странство, а Северна Македонија е меѓу 20-те земји со најголема стапка на иселување.
Податоците на Заводот за статистика покажуваат дека на крајот од секоја година на државно ниво за стотици ученици е помал бројот на ученици кои ја завршуваат годината, во однос на оние кои се запишале на почетокот од истата, токму како последица на заминувањето во други држави.
Српската опозиција предлага локалните и белградските избори да се одржат наесен
![Илустрација од изборите во Србија, 17 декември 2023 гдина](https://gdb.rferl.org/01000000-0aff-0242-ce7e-08dbff22f39c_w250_r1_s.jpg)
Пратениците од коалицијата „Србија против насилството“ на претседателката на српскиот парламент Ана Брнабиќ и доставија предлог за измени на Уставниот закон, со кои се предлага локалните и белградските избори да се одржат истовремено, на есен оваа година.
Во документот испратен до Брнабиќ, се наведува дека Србија се наоѓа во сложена уставна криза, која има своја меѓународна димензија и дека изборите во претходните години беа систематски поделени на термини во кои се избираат собранија на единиците на локалната самоуправа и затоа нивниот предлог е сите избори за единиците на локалната самоуправа да се одржат во ист ден, во 2024 година.
Во документот што го објави Нова с, пишува дека изборите за Собранието на Град Белград и собранијата на сите општини, градови и општини во Србија треба да се одржат истиот ден шест месеци од стапувањето во сила на последен пат донесен закон најрано, а најдоцна до крајот на 2024 година.
Во документот што го објави телевизијата Нова-С, пишува дека изборите за Собранието на Град Белград и собранијата на сите општини, градови и општини во Србија треба да се одржат во ист ден, најрано шест месеци по влегувањето во сила на последниот донесен закон, а најдоцна до крајот на 2024 година.
„Народното собрание ќе донесе закони за изменување и дополнување на Законот за локални избори, Законот за избор на народни пратеници, Законот за единствен избирачки список, Законот за живеалиште и престој на граѓаните, Законот за финансирање на политичките активности, Закон за спречување на корупцијата и Закон за Уставен суд“, се наведува во предлогот.
Предвидено е властите на градот Белград, општините, градовите и градските општини кои ги извршуваа своите функции во времето на влегувањето во сила на овој Уставен закон, да продолжат да работат до денот на конституирањето на новите собранија.
Мултимедија
Најпосетени
Што треба да знаете