Достапни линкови

Мицкоски за Денот на независноста- имаме земја потопена со криминал


Архивска фотографија- прес-конференција на претседателот на ВМРО-ДПМНЕ Христијан Мицкоски

Претседателот на ВМРО-ДПМНЕ Христијан Мицкоски денеска во видео честитка за Денот на независноста 8 септември наведува дека „имаме држава со слаби институции, земја потопена со криминал и корупција, намачен и сиромашен народ“.

„Мафија, мафија која управува со државата и сака да управува со животите на луѓето. Нашата генерација е тука и чекаме нова шанса. Македонија не успева затоа што на народот му треба пресвртница која ќе ги направи заедничките животи подобри и поуспешни. После 29 години зборуваме за истите цели како во времето кога се создаваше државата. Европска Унија, силна економија, сигурност итн“, вели Мицкоски.

Тој додава дека се потребни промени кон подобро и заедничка борба да нема веќе како што вели богата влада, а сиромашен народ, влада која има удобства а народ кој живее на вересија.

Инаку на референдумот кој се одржа на 8 септември 1991 година излегоа околу 72 отсто од запишани избирачи, а 95 отсто од нив се изјаснија потврдно на прашањето „дали сте за суверена и независна држава Македонија, со право на влез во иден сојуз на суверените држави на Југославија?“. Осми септември се празнува како Ден на независноста.

Премиерот Зоран Заев на денешната прослава пред Владата рече дека доаѓа време на ред, правда и дисциплина, а претседателот Стево Пендаровски во писмено обраќање наведе дека се потребни политичари кои носат одлуки во интерес на граѓаните, транспарентни институции, постојан дијалог меѓу власта и опозицијата, граѓански сектор кој ја преиспитува работата на секоја власт и слободни медиуми кои работат за јавниот интерес, а не под диктат на политиката или бизнисот.

XS
SM
MD
LG