Достапни линкови

Црна Гора го отвори последното преговарачко поглавје со ЕУ


Илустративна фотографија.

Европската комисија (ЕК) одобри Црна Гора да го отвори последното преговарачко поглавје во преговорите со Европската унија, соопшти денеска црногорската Влада. Станува збор за поглавјето број 8 кое се нарекува „Конкуренција.“

Премиерот Душко Марковиќ изјави дека ова е голем ден за Црна Гора, која како што рече „потврдила дека е држава која е најперспективна и најблиску до членство во ЕУ.“

„Очекуваме утре тоа формално да биде потврдено. Ова е голем ден за Црна Гора која ќе стане прва земја кандидатка која ги отвори сите преговарачки поглавја“, наведе Марковиќ додавајќи дека со отворањето на поглавјето 8 значи завршување на првата фаза на процесот на интеграција во ЕУ.

Шефовите на држави и влади на ЕУ на Самитот во Брисел на 29 јуни 2012 година го потврдија отворањето на преговорите за членство меѓу Унијата и Црна Гора.

Со Црна Гора беше започнат нов пристап во преговорите, според кој меѓу првите отворени преговарачки поглавја беа 23 – Правосудство и основни права и 24 – Правда, слобода и безбедност, кои ќе останат отворени до крајот на преговарачкиот процес.

XS
SM
MD
LG