Достапни линкови

Вести

Рохани: збогатување ураниум е на повисоко ниво од пред 2015 година

Архивска фотографија- претседателот на Иран Хасан Рохани

Претседателот на Иран Хасан Рохани рече дека Техеран сега збогатува повеќе ураниум отколку пред постигнувањето на нуклеарниот договор со светските сили во 2015 година. До ваквата ситуација дојде откако земјата почна постепено да се откажува од обврските кои требаше да ги исполни според договорот.

Рохани денеска кажа дека притисокот врз Иран е зголемен, но дека тие продолжуваат со напредокот. Земјата ги тргна сите ограничувања за производство на збогатен ураниум како одговор на санкциите од Соединетите Американски Држави кои следеа откако претседателот Доналд Трамп во 2018 година го напушти нуклеарниот договор.

Трамп бара Техеран да преговара за нов договор, а другите пет потписнички- Британија, Франција, Германија, Кина и Русија се обидуваат да го одржат постоечкиот во живот.

види ги сите денешни вести

Починаа 15 лица од корона вирус, 1039 се новозаразени

Ковид-19 центар во Скопје

Министерството за здравство информира дека во последните 24 часа се направени 3143 тестирања, а регистрирани се 1039 нови случаи на ковид-19 од кои најмногу новозаразени има во Скопје-546.

Починати се 15 лица, шест пациенти од Прилеп (65, 65, 69, 69, 69 и 72г), пациент од Скопје (73г), од Дебар (60г), пациент од Велес (71г), пациент од Битола (64г), од Кавадарци (66г), од Демир Хисар (84г), од Свети Николе (56г), од Кичево (55г) и пациент од Ресен (84г). Сите пациенти се починати во болнички услови.

Денеска Институтот за јавно здравје регистрира 998 оздравени пациенти

Вкупната бројка на ковид дијагностицирани во нашата земја од почетокот на епидемијата изнесува 56164, бројката на оздравени пациенти е 33892, на починати е 1561, а бројот на активни случаи изнесува 20711.

Вонредна инспекција во болницата во Битола

Илустрација. Клиничката болница во Битола.

Министерот за здравство, Венко Филипче најави вонреден инспекциски надзор во болницата во Битола, откако на социјалните мрежи се појавија фотографии на кои се гледа дека додека пациент прима инфузија во истата просторија на други болнички кревети лежат двајца починати пациенти.

Министерот Филипче, денеска рече дека со инспекцијата ќе утврди фактичката состојба во дневната болница.

Претходно, докторката Билјана Гагачовска, директорка на Клиничката болница во Битола, во врска со настанот што се случил вчера во битолската дневна болница кажа дека го информирала Министерството за здравство дека еден од пациентите кој бил во лоша здравствена состојба примал инфузија, а на другите два креветат за време на интервенција, пациентите починале.

„Согласно лекарските овластувања регулирани во член 272 од Законот за здравствена заштита, став 1, преглед на умреното лице се врши, по правило, најрано 2 часа по настапувањето на смртта на местото на смртта, а најдоцна 12 часа по пријавувањето. Од таа причина телото на починатиот не можело да се пренесе во болничката мртвачница, објасни директорката Гагачовска.

Министерството за здравство повторно апелираше доколку членови на семејство на пациент и лично пациенти имаат каков било сомнеж за евентуален лекарски пропуст или за начинот на лекарски третман, да се обратат до ДСЗИ.

Мухамед Зекири е нов генерален секретар на Владата

Поранешниот пратеник и актуелен потпретседател на Владата Мухамед Зекири

Поранешниот пратеник и актуелен потпретседател на Владата Мухамед Зекири е назначен за нов генерален секретар на Владата. Одлуката била донесена на последната владина седница одржана денеска.

Зекири неодамна си поднесе оставка од пратеничката функција, а Собранието веќе ја констатираше оставката. Тој доаѓа на местото на досегашниот генерален секретар на Владата Драги Рашковски.

Оставки на пратениците Зекири, Лукаревска, Бајрами и Дурловски

Мухамед Зекири од СДСМ, заедно со Сања Лукаревска која Владата ја именуваше за директорка на Управата за јавни приходи (УЈП),како и Игор Дурловски од ВМРО-ДПМНЕ и Бајрам Реџепи од ДУИ во последните денови од октомври си поднесоа оставки.

Тие не ја образложи својата оставката пред колегите пратеници.

Италија: 853 починати од корона вирус

Илустарција.Корона вирус.

Италија објави дека денеска има 853 смртни случаи поврзани со ковид 19, што претставува најголемо зголемување на починати во едно деноноќие од 28 март.

Министерството за здравство исто така регистрираше 23.232 новозаразени со коронавирус, за разлика од 22.930 претходниот ден.

Италија беше првата западна земја погодена од вирусот и забележа 51306 жртви на Ковид-19 од избувнувањето на болеста во февруари, и беше втора земја со најголем број на жртва во Европа по Британија.

Додека дневниот биланс на жртви во Италија е најголем во Европа во последните денови, приемот во болници и исполнетоста на интензивната нега се намали.

Бројот на луѓе во болница со Ковид-19 денеска изнесува 34.577, што е пад за 120 пациенти од претходниот ден.

Ковид-19: Во болниците има 1 290 пациенти

Ковид-19 центар во Скопје

Министерството за здравство информира дека бројката на хоспитализирани пациенти кои се позитивни или сомнителни на ковид-19, во земјава изнесува 1 290, а во моментов има околу 130 слободни кревети.

Најголемиот дел од пациентите се примени во болниците од внатрешноста – 814, додека останатите 476 се во Скопје.

295 војници за поддршка на полицијата во здравствените објекти

Најмногу пациенти во болниците надвор од Скопје во моментов има во Куманово – 118 и Охрид – 111, додека во Прилеп се хоспитализирани 104.

Во струмичката болница има 72 пациенти , во Битола 70, во Велес 65, во Штип 56, во Гостивар 49, во Тетово 46, во Кавадарци 44, во Струга 32, во Кочани 20, во Кичево 18, и во Гевгелија 9 пациенти кои се позитивни или сомнителни на ковид-19.

МЕПСО: Прекините на напојувањето во Скопскиот регион резултат на неможноста да се ангажираат хидроелектраните

Macedonia - MEPSO trasnformer, Stip, 23Mar2009

АД Мепсо денеска излезе со соопштение во кое информира дека прекините на напојувањето во Скопскиот регион се резултат на неможноста да се ангажираат системските резерви кои не им биле ставени на располагање од АД ЕСМ

До соопштението доаѓа откако претходно денеска делови од Скопје и Тетово нема струја поради дефект на 110 киловолтниот далекувод на МЕПСО.

"АД МЕПСО немаше можност да изврши благовремено растоварување на електропреносната мрежа и напонска поддрша со ангажирање на хидроелектраните со кои нормално секоја година се обезбедуваат системските резерви неопходни за за обезбедување на сигурна и стабилна работа на електроенергетскиот систем"се наведува во соопштението на компанијата.

Од таму информираат дека со максимален ангажман на стручните екипи на АД МЕПСО во 12:07 часот е вклучен далекуводот ТС Скопје 4 – ТС Скопје 3 со што се подобруваат напонските прилики во регионот и се нормализираат тековите на моќност.

Според информација од ЕВН Дистрибуција, регулационите преклопки на трансформаторите во ТС Запад и ТС Козле останале заглавени во положба за максимална регулација на напон, поради што операторите од ЕВН Дистрибуција не биле во можност да ги вклучат Пратени се екипи на ЕВН Дистрибуција рачно на лице место да ги ослободат регулационите преклопки во ТС Запад и ТС Козле. По интервенцијата, ТС Запад и ТС Козле постепено се обезбедени со напојување со електрична енергија од ЕВН Дистрибуција.

Вакцинација со Спутник V ќе чини помалку од 20 долари

Руската вакцина за коронавирус Спутник V

Финансиските поддржувачи и развивачи на руска вакцина за коронавирус Спутник V наведуваат дека вакцинирање на едно лице ќе чини „помалку од 20 американски долари“ на меѓународните пазари, а вакцината ќе биде бесплатна за руските граѓани.

Меѓународната пазарна цена за Спутник V, која беше претставена денеска, е поевтина од некои други западни конкуренти, како што е вакцината произведена од „Фајзер“, која чини повеќе од 18 долари за истрел. Сепак, руската вакцина е поскапа од онаа што ја произведува Астра, која во Европа ќе се продава по цена од околу 3 американски долари.

Развивачите на Спутник V објавија дека имаат капацитет да направат повеќе од милијарда дози почнувајќи од следната година, што е доволно за да вакцинираат над 500 милиони луѓе. Руското Министерство за здравство пак соопшти дека новите податоци за клиничко испитување покажуваат дека Спутник V е ефикасна од 91,4 проценти до над 95 проценти.

Русија беше првата земја што одобри нејзина вакцина за коронавирус за широко распространета употреба во јавноста, регистрирајќи го Спутник-V во август.

Бесими: Во предлог буџетот во фокусот се здравството и економијата

Министерот за финансии, Фатмир Бесими

Министерот за финансии, Фатмир Бесими денеска на првиот ден од расправата за Предлог-буџетото за 2021 пред комисијата за финсирање и буџет одговарајќи на реплика рече дека државата мора да го продава својот имот, бидејќи повеќе нема простор за големи задолжувања.

"Оние претпријатија кои ќе се понудат на продажба или како јавно-приватно партнерство сега претставуваат дополнителен товар за буџетот, а тоа значи помалку пари за развој. Формите како јавно-приватно партнерство и инвестициски фондови се нови начини на финансирање. Таков е и планот на Вархеи од 9 милијарди евра за Западен Балкан и привлекување на дополнителен финансиски капитал, рече Бесими од собраниската говорница, зборуавјќи за Предлог-буџетот за 2021.

Министерот кажа дека следната година растот и развојот нема да може да се финансира само преку задолжување.

Инаку Бесими образложувајќи го предлог буџетот рече дека тој треба да овозможи зајакнување на финансирањето на системот на здравствената заштита и зачувување на здравјето и животите на граѓаните, како и поддршка на економската стабилизација.

Од СДСМ велат дека со предложениот буџет во фокусот се ставени економијата и здравството.
„Предлог буџетот на 2021 година пред себе има три клучни цели Да обезбеди поддршка и унапредување на здравствениот сектор, пред се заштита на здравјето на сите граѓани. Да го поддржи економското заздравување, односно да се помогнат сите оние микро, мали, средни и големи компании, кои имаат потреба од помош во справување со последиците од пандемијата. И трето, да се одржат и унапредат основните функции на државата и да овозможиме ефикасно спроведување на потребните реформи“, рече Јован Митревски од СДСМ.

Опозицијата која достави 528 амандмани смета дека буџетот е расипнички, не е за граѓаните, туку за партиски потреби и цели.

Се опремува инфективното одделение во "Мала Богородица"

Илустрација. Ковид 19, станици за кислород.

Во тек е медицинско опремување на објектот на поранешната гинеколошка болница „Мала Богородица“, сегашен хотел „Ибис Стајлс“, што Клиничката болница „Аџибадем Систина“ го отстапи за хоспитализација на пациенти со Ковид-19, информираат од болницата.

Од таму наведуваат дека се подготвува и документација за станица за кислород што ќе биде поставена надвор од објектот за опслужување со кислород на пациентите. Во тек се и преговорите за начинот на функционирање овој ковид-центар, согласно договорот меѓу Министерството за здравство и приватните клиники за меѓусебна соработка во борбата со Ковид-19.

Во моментот, како што посочуваат, се бара правно решение за издавање дозвола за функционирањето на установава како ковид-центар и се очекува во објектот првите пациенти да бидат примени од почетокот на идната недела.

Во ковид центрите 48 нови пациенти, покачен бројот на смртни случаи

Со ковид-центарот ќе менаџира Министерството за здравство, односно државата, кои ќе одлучуваат кои пациенти ќе се третираат тука и каква терапија ќе добиваат. Согласно договорот ќе се третираат и хоспитализираат пред се пациенти со полесна и умерена клиничка слика, а пациентите со потешки компликации ќе се третираат во ГОБ „8 Септември“

Царовска: Европски вредности со билингвални паралелки

Мила Царовска

Билингвалното образование се покажа досега како вистински репрезент на интеркултурализам, на учење за културата на францускиот народ, но и на пошироките европски вредности. Поддршката на ваков тип проекти е поддршка за прифаќање на глобални трендови и култури што се многу важни за развојот на новите генерации млади“, изјави денеска министерката за образование и наука Мила Царовска, која денеска учествуваше на онлајн средба по повод билингвалните паралелки во државата, организиран од гимназијата „Орце Николов“ и Амбасадата на Франција.

Министерката истакна дека голем број ученици од овие паралелки, низ годините, го продолжиле своето образование во најпознатите академски центри на Франција и донеле нови практики и нов пристап во креирање општествени и образовни политики.

Царовска се заблагодари на Француската амбасада која поддржа низа проекти креирани од наставниците и учениците со кои создадоа франкофонска мрежа од активни млади лица и идеи за подобра иднина на сите. На вебинарот учествуваа и амбасадорот на Франција Сирил Бомгартнер и директорот на гимназијата „Орце Николов“ Митко Димовски.

ВМРО-ДПМНЕ: Заев на Бугарија понудил банка, ХЕЦ, дел од Телеком...?

Димче Арсовски, портпаролот на ВМРО-ДПМНЕ, денеска рече дека на Бугарија „Заев ѝ ветил и една поголема банка“.

Сакаме да прашаме, а Заев мора веднаш да одговори, што содржи таа понуда што ја дала Владата на Заев до бугарската страна, праша денеска опозициската ВМРО-ДПМНЕ, по синоќешната изјава на лидерот на ДУИ, Али Ахмети, дека на Бугарија ѝ е дадена понуда за договор по ветото што го стави на преговарачката рамка со Европската унија.

„Во прашање се сериозни бизнис-ветувања од Зоран Заев кон бугарската страна, поголем пакет кој вклучува сериозен приватен и државен капитал, кој требало да биде продаден на бугарски фирми и бугарски бизнисмени. Тука би набројале една поголема банка, државниот удел на Република Македонија во 'Телеком', што ќе значи и целосно приватизирање, железнички транспорт, ТЕЦ 'Неготино', земјоделско земјиште, кое наводно и веќе било капарисано од одредени луѓе што треба да стане градежно, и уште многу други работи“, рече на денешната прес-конференција портпаролот на ВМРО-ДПМНЕ, Димче Арсовски.

Лидерот на ДУИ, Али Ахмети, синоќа за ТВ21 изјави дека Северна Македонија и Бугарија размениле понуди и документи и дека деновиве очекувале одговор од бугарската страна, но дека во овој момент не може да открие никакви детали од понуденото.

Москва: Американски разурнувач влезе во заливот Петар Велики

Илустрација - Архивска фотографија од разурнувачот „УСС Џон С. Мекејн“ во водите на Сингапур

Руското Министерство за одбрана соопшти дека разурнувач на американската морнарица ги напуштил руските води на далечниот исток на Русија, откако бил предупреден дека може да биде нападнат. Во изјавата од Министерството се вели дека „УСС Џон С. Мекејн“ влегол на 2 километри во руските територијални води во Заливот Петар Велики, во близина на источниот руски пристанишен град Владивосток, пред да се врати назад по добивањето предупредување од бродот „Адмирал Виноградов“.

„Противподморничкиот разурнувач 'Адмирал Виноградов' на Пацифичката флота користеше меѓународен канал за комуникација за да го предупреди странскиот брод дека ваквите дејствија се неприфатливи и дека насилникот може да се истера од територијалните води на земјата со маневар за напади. По издаденото предупредување и 'Адмирал Виноградов' го смени својот правец, а 'УСС Џон С. Мекејн' се врати во меѓународните води“, се вели во соопштението на Министерството.

Во изјавата на американската пацифичка флота не се наведени детали за инцидентот, но се вели дека американскиот брод „ги истакнал навигациските права и слободи“ во околината на Петар Велики Залив „оспорувајќи ги прекумерните морски побарувања на Русија“.

295 војници за поддршка на полицијата во здравствените објекти

Стојанче Ангелов, ЦУК

Во поддршка на полицијата за обезбедување на објектите согласно потребите на Министерството за здравство ќе учествуваат вкупно 295 припадници на Армијата. Оваа бројка е еластична и тоа не значи дека утре ќе излезат на терен сите, изјави денеска в.д. директорот на Центарот за управување со кризи, Стојанче Ангелов.

Ова е дел од стратегијата по прогласувањето на 30-дневната кризна состојба во државата, за што, по предлог на државата, одлука донесе Владата како мерка за борба против ширењето на коронавирусот.

Во овој момент околу 150 полицајци и 300 припадници на Армијата ќе бидат ангажирани за обезбедување на здравствени објекти. Припадниците на Армијата нема да бидат вооружени и ќе бидат распределени само онаму каде што ќе биде тоа неопходно, но исклучиво како придружба на полициските службеници.

„Полициските службеници се оние кои што имаат полициски овластувања, додека припадниците на Армијата ќе им помагаат на нив, пред се за одржување на редот пред болниците и ковид центрите, за да се овозможи поквалитетна и непречена работа на здравствените работници“, изјави Ангелов.

Состојбата од аспект на безбедноста, нагласи тој, е целосно под контрола и инцидентите се изолирани и ретки.

Идејата не е Собранието да биде целосно онлјан, тврди Џафери

Талат Џафери

Повикот до пратениците од опозицијата е да останат вклучени во работата на Собранието. Навреме се соопштени сите идеи. Три месеци зборуваме за тоа. Собранието нема целосно да работи онлајн. Тоа не е идејата, изјави денеска претседателот на Собранието, Талат Џафери.

„Дополнувањето на Предлогот на Деловникот на Собранието се однесува на пратеници кои ќе имаат решение од соодветна институција и доколку состојбата им дозволува да се вклучат онлајн, односно ако се асимптоматски случаи или со лесни симптоми на домашно лекување“, вели Џафери во изјава за МИА.

Според него, за да се понуди соодветен одговор за функционално Собрание, треба да се има политичка волја. За најавите на опозициските пратеници дека нема да учествуваат во работата на кординациите и на некои седници, Џафери истакнува дека Собранието мора да биде функционално, она за што сите се залагале во своите кампањи. Нагласува исто така дека ова е специфична ситуација на пандемија која не треба да се користи во други цели.

Во текот на оваа недела, според собранискиот спикер Џафери, ќе се вратат на работа пратеници кои биле позитивни на Ковид-19 или во самоизолација, така што може да се очекува мнозинството да има 61 глас. Сепак, предупредува џафери, тоа никогаш не се знае имајќи ја предвид пандемијата, но и други околности.

Бочварски: Пари за капитални инвестиции има, ќе има и притисок

Благој Бочварски, министер за транспорт и врски во Владата на Северна Македонија

Министерот за транспорт и врски, Благој Бочварски, денеска изјави дека државата има пари за капитални инвестиции, тие ќе се инвестираат преку новиот систем и со сериозен притисок од страна на Министерството и Владата.

Тој најави дека на 1 декември ќе го презентира пред јавоста предвидениот буџет на Министерството за транспопрт и врски за идната година.

„Преку нашето Министерство наредната година инвестираме над 10 милиони евра во изградбата на локални улици и патишта низ државата преку Светска банка. Продолжуваме со повторно актуелизирање на пругата од Куманово – Белјаковце и Крива Паланка со што очекуваме во првиот квартал од 2021 да биде распишана новата постпака и конечно да видиме сериозен прогрес со нов и квалитетен изведувач во овој дел. Имаме проекти секако и во станбената изградба и во комуналниот дел со изградба на водоводи и канализации, како и проекти за целосен рамномерен регионален развој на општините“, рече Бочварски, кој беше на увид во активностите за обнова на патот Бигла - Трстија.

Вкупните капитални инвестиции со Предлог-буџетот за 2021 година се планирани на ниво од околу 23 милијарди денари или за 20 проценти повисоко во однос на планот за 2020 година. Владата најави нов функционален механизам за подобрување на реализацијата на капиталните инвестиции, што подразбира насочување на средствата кон проектите со поголема реализација.

Во ковид центрите 48 нови пациенти, покачен бројот на смртни случаи

Илустрација - Ковид-19 амбуланта во кругот на Клиниката за инфективни болести во Скопје

Во изминатите 24 часа во ковид центрите во Скопје хоспитализирани се 48 нови пациенти поради компликации од корона вирусот, а вкупно 476 лица сомнителни и потврдени за ковид-19 се лекуваат на инфективните оддели во главниот град, соопшти денеска Министерството за здравство (МЗ).

„Во последното деноноќие, на интерните клиники имало вкупно 25 приеми и тоа петмина пациенти биле хоспитализрани на Институтот за белодробни заболувања и ТБЦ, девет во ковид центарот на Клниката за Неврологија, тројца нови болни се хоспитализрани на Клиниката за дерматовенерологија, исто толку и на Клиниката за нефрологија и петмина болни на Клиниката за очни болести. Во ковид центарот во ГОБ 8 Септември имало 12 нови приеми на пациенти, а на Инфективната клиника 11 приеми во текот на вчерашниот ден“, соопшти МЗ, од каде додаваат дека во изминатите 24 часа дома се пуштени 19 оздравени пациенти.

Според најновиот неделен извештај на Институтот за јавно здравје (ИЈЗ), во периодот од 16 до 22 ноември, тестирани се вкупно 19.664 материјали во лабораториите, а регистрирани сe 7.486 нови позитивни случаи од 35 градови во државата со незначително зголемување во однос на минатата недела од 1,8 проценти. Во наведениот период, процентот на позитивни од тестирани лица изнесува 38 проценти.

Регистрирани се заболени лица во сите возрасни групи. Најзастапена е возрасната група на лица на возраст над 60 години. Во наведениот период пријавени се 204 смртни случаи од 24 града, што е зголемување од 18,6 отсто во однос на минатата недела, соопшти ИЈЗ.

Шахпаска: Чекаме сугестии за законот за „Недела неработен ден“

Министерката Јагода Шахпаска

Законот за прогласување на недела како нербаотен ден е всушност измена на Законот за работни односи во членот 134, каде што дефинираме дека недела е неработен ден, доколку со друг закон или колективен договор поинаку не е решено. Тоа е главана измена која е предвидена во законот за работни односи, изјави денеска министерката за труд и социјална политика, Јагода Шахпаска.

Таа на денешната прес-конференција појасни дека законот е драфтиран и дека е испратен е до сите министерства.

Предлогот недела да биде неработен ден за сите дојде на инцијатива на синдикатите и беше прифатен како идеја од Владата, но не наиде на широко одобрување од работодавците, особено од угостителскиот сектор.

Министерката Шахпаска денеска информираше дека во подготовките имале меѓусекторски и меѓуресорски консултации.

„Очекуваме повратен одговор од министерстава околу нивни сугестии и дополнувања во овој основен системски закон. Но во подготовките имавме консултации меѓусекторски, меѓуресорски, со различни министерства, и очекуваме заеднички да го изградиме ставот во делот на тоа кои дејности, кои области би биле изземени со овој закон“, рече Шахпаска.

Русија го обвинува Гугл за неотстранување забранета содржина

Илустрација

Рускиот регулатор за медиуми, Роскомнадзор, отвори постапка против американскиот технолошки гигант Гугл, за неотстранување забранета содржина од својот пребарувач. Од Роскомнадзор синоќа изјавија дека Гугл не отстранува до 30 проценти од „опасната содржина“ од својот пребарувач.

"Компанијата е обвинета за неуспехот да се усогласат со барањата на руското законодавство за отстранување на интернет ресурси кои содржат информации забранети во Русија од резултатите од пребарувањето", се вели во соопштението на Роскомнадзор и се додава дека дел од наводната опасна содржина вклучува екстремизам, порнографија и промовирање самоубиство.

Таканаречената административна постапка може да доведе до судски спор и парична казна до 5 милиони руби (65.670 американски долари). Гугл не даде коментар веднаш. Според рускиот закон, пребарувачите треба да ги отстранат страниците блокирани во Русија од резултатите од пребарувањето. За да го направите ова, тие мора да се поврзат со регистарот на забранети страници.

Гугл во минатото неколкупати доби со релативно мали казни заради одбивање да ги филтрира резултатите од пребарувањето во согласност со регистарот на забранети информации на Роскомнадзор. Гугл редовно ги отстранува врските кон забранетите страници од пребарувачите, но не автоматски и само по проучувањето на основите за забраната.

Самит „Македонија 2025“: Заздравување и реформи на економијата

Архивска фотографија

Деветиот по ред Самит Македонија 2025 годинава ќе се одржи во хибридна/дигитална форма од 1 до 3 декември, преку онлајн конференциската платформа hopin.com и на него своите знаења и искуства ќе ги споделат најдобрите имиња во бизнисот, науката и технологијата. Во фокус на самитот ќе бидат економските реформи и заздравувањето на економиите, а според најавата на Македонија 2025, се очекува вклучување на над 400 високи претставници на институции и организации, дипломати, извршни директори, претприемачи, членови на академијата и млади лидери.

„Целта е зголемен фокус кон заздравување на економиите, економските реформи, како и претставување на успешни примери и најдобри практики кај компаниите од земјава и светот. Ќе се зборува за економските реформи и меѓународните односи за време на здравствената и економска криза, за тоа како да изградите успешен бизнис во земја во развој, а ќе се дискутира и за моќта на компаниите со култура ориентирана кон луѓето“, соопштија од Македонија 2025.

Меѓу учесниците ќе бидат и Енди Пејкоф, основач на најголемата компанија за вода во светот „Нијагара ботлинг“, една од најуспешните претприемачки во Канада со македонско потекло – Сузан Ничовски, потоа Харди Пемхива, извршен директор на „Еконет Глобал Лимитед“ во Јужна Африка, групација која се залага за градење одржливи бизниси со позитивен придонес кон општеството и многу други.

За 24 часа во цела држава 615 пријави за неносење маска за лице

Илустрација

Министерството за внатрешни работи претпладнево информираше дека во текот на изминатото деноноќие, на целата територија на Северна Македонија, санкционирани се 615 лица за прекршување на мерката за носење лична заштита на лице.

Министерството за внатрешни работи и денеска апелира граѓаните да ги почитуваат мерките и протоколите донесени од Владата со цел справување со Ковид-19. Носењето заштитна маска за лице е задолжителна и на отворен јавен простор, а во сила е забраната и за групирање на повеќе од четири лица.

Италија го премина прагот на 50.000 смртни случаи од коронавирус

илустрација

Италија, првата земја во Европа погодена од епидемијата на коронавирусот во минатата пролет, вчера го премина прагот од 50.000 смртни случаи од тој вирус, објавија тамошните власти.

Карантинот ја зауздува пандемијата во Европа, САД во расчекор

Во таа земја, во последните 24 часа починаа 630 лица, така што вкупниот број на смртни случаи од почетокот на епидемијата е над 50.400. Италијанските власти наведуваат дека од 1 септември починале 15.000 луѓе, додека вкупно се заразени над 1,4 милиони.

УНХЦР: Повеќе од 40.000 бегалци од Етиопија побегнаа во Судан

Етиопјани кои бегаат од борбите во регионот Тиграј, со чамци ја преминуваат реката Сетит на границата Судан-Етиопија

Повеќе од 40 000 бегалци од Етиопија пристигнаа во Судан од 10 ноември, бегајќи од офанзива на владините сили во регионот Тиграј, соопшти Високиот комесаријат за бегалци УНХЦР. Границата со Судан ја преминале 40.277 Етиопјани, од кои 45 проценти се деца под 17 години, 51 процент се возрасни лица под 59 години и четири проценти се стари лица, соопшти УНХЦР, додавајќи дека 53 проценти од бегалците се мажи и 43 проценти се жени.

Египет, Етиопија и Судан блиску до договор за браната на Нил

Агенцијата наведува дека повеќе од 3.000 луѓе доаѓаат во Судан секој ден и оти во следните неколку месеци, бројот на бегалци може да достигне до 100.000 ако конфликтите не запрат. На 4 ноември, премиерот на Етиопија, Аби Ахмед, започна воена офанзива против силите на Ослободителниот фронт на народот на Тиграј кои управуваат со тој регион. Тиграјците се пет проценти од населението во Етиопија, но тие долго време имаат значително влијание во земјата.

Претседателот на Европскиот совет Мишел со повик до Бајден да го „обнови“ трансатлантскиот сојуз

Претседателот на Европскиот совет Шарл Мишел

Највисок претставник на Европската унија, во телефонски разговор со избраниот претседател на САД Џо Бајден упати повик за обнова на „силен трансатлантски сојуз“ и да присуствува на самитот на ЕУ следната година, соопшти неговиот кабинет. Претседателот на Европскиот совет Шарл Мишел му го честиташе изборот на Бајден и во 20-минутниот повик синоќа, го покани на специјален состанок догодина со шефовите на ЕУ во Брисел, каде што се наоѓа и седиштето на НАТО. „За време на повикот, претседателот Мишел предложи да се изгради силен трансатлантски сојуз заснован на заеднички интереси и заеднички вредности“, се вели во соопштението на канцеларијата на Мишел.

Како може да изгледа претседателството на Бајден?

„Тој ја поздрави силната посветеност на новоизбраниот претседател Бајден кон сојузниците на Америка и неговата поддршка за европската соработка. Во изјавата се Мишел ја истакнал поддршката на Бајден за зачувување на мирот и стабилноста на чувствителната ирска граница откако Британија ја напушти ЕУ. Бајден го предупреди Лондон дека мора да го почитува договорот за Брегзит, бидејќи го штити мирот на островот Ирска. Тоа доаѓа како добредојдена промена на тонот од Вашингтон за ЕУ, по пофалбите на Доналд Трамп за Брегзитот, ги извлече САД од глобалниот климатски пакт и беше отворено непријателски настроен кон НАТО.

НАТО наскоро ќе реши дали ќе се повлече од Авганистан

Шефот на НАТО Јенс Столтенберг

Шефот на НАТО Јенс Столтенберг изјави дека Алијансата ќе одлучи за судбината на својата мисија за обука во Авганистан на следниот состанок на министрите за одбрана, во февруари. „Ќе се соочиме со тежок избор“, рече Столтенберг, додавајќи: „Или ќе останеме - и ќе ја платиме цената на континуираниот воен ангажман. Или ќе заминеме - ризикувајќи да ги изгубиме придобивките што ги остваривме. И дека мировниот процес ќе попушти“.

Трамп го намалува нивото на војската во Авганистан, но не ја повлекува целосно

Неговите забелешки уследија по најавата од минатата недела на администрацијата во заминување во Вашингтон дека Соединетите држави ќе го намалат бројот на војската во Авганистан од сегашната бројка од 4500 на околу 2500. „Мисијата на НАТО ќе остане“, рече тогаш Столтенберг како одговор на намалувањето наложено од американскиот претседател Доналд Трамп кој кога дојде на функција вети дека ќе ги извлече САД од „бесконечни војни“. Вашингтон ја предводеше меѓународната инвазија на Авганистан по терористичките напади на 11.09.2001 година против САД за да ги пронајде и казни Осама бин Ладен и неговата терористичка група Ал-Каеда, со седиште таму.

Кина испрати сонда на Месечината

лансирната кула во вселенскиот центар за лансирање Венчанг во провинцијата Хаинан,

Кина денеска испрати сонда на Месечината, која се очекува да собере карпи од Месечината и да се врати на Земјата, во првата ваква операција во светот по повеќе од 40 години. Ракетата со сондата беше лансирана од вселенскиот центар Венчанг, на јужниот тропски остров Хаинан. Мисијата Чанг'e 5, именувана по божицата на Месечината во кинеската митологија, е досега најамбициозната кинеска мисија на Месечината. Доколку биде успешна, тоа ќе биде голем чекор напред за вселенската програма на Кина, а некои експерти велат дека тоа може да биде подготовка за земање примероци од Марс, па дури и за мисии на Месечината со екипаж.


Првата прашина донесена од Месечина на аукција

Ова е прв обид за пренос на лунарни примероци со сонда без екипаж од 1976 година, кога сондата на поранешниот Советски сојуз Луна 24 успешно ја изврши мисијата. Кинеското летало треба да слета на Месечината на крајот на ноември, а враќањето на примероците на Земјата треба да биде на почетокот или средината на декември. Ова не е прв пат Кина да испраќа вселенски летала на Месечината. Кина инвестира милијарди долари во својата вселенска програма за да ги достигне Европа, Русија и Соединетите држави. Таа го испрати својот прв астронаут во вселената во 2003 година, сака да изгради голема вселенска станица околу 2022 година и очекува да испрати човек на Месечината за петнаесет години.

Вчитај повеќе

XS
SM
MD
LG