Достапни линкови

Вести

Претставници на ЕУ на концерт за претседавањето на Хрватска

претседателката на Европската комисија Урсула фон дер Лајен и хрватскиот премиер Андреј Пленковиќ

Високи претставници на Европската унија и на Хрватска синоќа присуствуваа на концерт со кој Загреб свечено го одбележа почетокот на шестмесечното претседавање со ЕУ. На коцертот меѓу другите беа и претседателот на Европскиот совет Шарл Мишел и претседателката на Европската комисија Урсула фон дер Лајен. Хрватска од 1 јануари го презеде од Финска ротирачкото претседавање со ЕУ, а на 1 јули ќе и го предаде на Германија. „Силна Европа во светот полн со предизвици“ е слоганот што Хрватска го избра за нејзиното претседавање. Премиерот Андреј Пленковиќ потсети дека Хрватска е најмладата членка на ЕУ.

види ги сите денешни вести

Македонија и Британија склучија спогодба за партнерство и трговија

Бујар Османи и Рајчел Галовеј на потпишувањето на Спогодбата за партнерство, трговија и соработка меѓу С. Македонија и Британија

Министерот за надворешни работи, Бујар Османи и амбасадорката на Обединетото Кралство, Рајчел Галовеј, ја потпишаа Спогодбата за партнерство, трговија и соработка меѓу Северна Македонија и Обединетото Кралство, на свечена церемонија организирана по тој повод.

„Договорот значи потенцијал за бизнисите да ја зголемат економската активност меѓу двете земји, тоа ќе значи потенцијал и за останатите бизниси да оформат нови релации на соработка ослободени од бариерите на границите; ова е потенцијал и за нови британски инвестиции овде во Северна Македонија, за нови работни места, за поголема активност и на домашните компании и секако, потенцијал за севкупен економски напредок што претставува круна на одличните односи меѓу двете земји”, рече Османи.

За време на церемонијата на потпишување на Спогодбата, свое обраќање имаше и амбасадорката Рејчел Галовеј, а преку видео-линк се обрати и Мартин Викерс, специјален пратеник за трговија со Западен Балкан на британскиот премиер Борис Џонсон.

ССМ: Предлогот од МТСП не е во прилог на „недела неработен ден“

Архивска фотографија од прес-конференција на ССМ

Предложените измени во Законот за работни односи од страна на Министерството за труд и социјална политика не одат во прилог на тоа недела да биде прогласена за неработен ден, реагираше денеска Сојузот на синдикати на Македонија (ССМ).

Во реакцијата од ССМ се наведува дека предлогот на Министерството за труд и социјална политика е во насока на утврдување на постапка која треба да ја спроведуваат работодавачите за работниците да работат во недела, а не да се утврди правото неделата да е неработен ден. Сметаат дека евентуалните исклучоци од правото недела да биде неработен ден, треба да се уредат во Законот за работни односи како базичен закон, врз основа на анализа за тоа во кои дејности мора да има контиуниран процес на работа.

„Предлог на ССМ е работниците кои по исклучок се ангажирани да работат во недела задолжително да имаат право на зголемување на основната плата по час најмалку за дополнителни 50 проценти за работа во недела, како и право на слободен ден во текот на неделата“, велат од ССМ.

Ангелов: Имаме две кризни состојби, Ковид и мигрантите

В.д. директорот на Центарот за управување со кризи, Стојанче Ангелов

Во овој момент во земјава имаме две кризни состојби, едната е со ковид-19. Во тек е првиот месец и ќе биде продолжена уште шест месеци. Втората кризна состојба не е на целата територија, туку само на јужната и северната граница и е поврзана со мигрантите, со нивниот влез и транспорт низ Северна Македонија, изјави денеска в.д. директорот на Центарот за управување со кризи, Стојанче Ангелов.

„Мигрантите, покрај безбедносниот ризик, внесуваат и зараза. Имаме информации дека во одредени кампови е силно раширен ковид-19 зашто тие таму немаат никакви услови, посебно не хигиенски, а да не зборуваме за дистанца. Натрупани се особено во некои кампови во Грција каде бројката е повеќекратно поголема од дозволената и нивниот трансфер, влез и движење низ земјава може негативно да се одрази освен безбедносно и во однос на ширењето на пандемијата“, рече Ангелов.

На прашањето дали има притисок на јужната граница, тој одговори дека располага со информации, но тоа е надвор, како што истакна, од она што смее да го каже.

Трамп со ново видео во кое без докази обвинува за изборна измама

Доналд Трамп

Претседателот на САД, Доналд Трамп, објави видео во должина од 46 минути со кое ги рециклира своите неосновани тврдења за измама на гласачите на изборите што ги загуби минатиот месец од противкандидатот на демократите Џо Бајден. На видеото, објавено на Фејсбук доцна на 2 декември, Трамп го нарече говорот можеби „најважниот што некогаш сум го направил“, бидејќи тој сугерираше дека Врховниот суд треба „да го направи она што е во ред за нашата земја“ и да го поништи резултатот.

Стоејќи зад говорница со претседателскиот печат, 74-годишниот Трамп ги доведе во прашање резултатите што покажаа дека Бајден зеде рекордни 81 милиони гласови на изборите, 7 милиони повеќе отколку што беа дадени за него, уште еднаш нарекувајќи ги „наместени избори“, иако членови на неговата администрација, вклучително и блискиот сојузник, државниот обвинител Вилијам Бар, постојано изјавуваат дека нема доказ за широко распространета измама на гласачите.

Додека Фејсбук и Твитер, каде Трамп објави врска до видеото, ги етикетираа објавите како проблематични, стотици илјади негови поддржувачи го „лајкуваа“ видеото.

49 нови пациенти за 24 часа во скопските ковид центри

Илустрација - Еден од Ковид центрите во Скопје

Во изминатите 24 часа во ковид-центрите во Скопје хоспитализрани се 49 нови пациенти поради компликации од корона вирусот. Вкупно 461 лица сомнителни и потврдени за Ковид-19 се лекуваат на инфективните оддели во главниот град, соопшти Министерството за здравство (МЗ).

Во последното деноноќие, на интерните клиники имало вкупно 20 приеми и тоа на ТБЦ имало девет приеми, еден во ковид центарот на Клиниката за неврологија, двајца болни се хоспитализрани на Клиниката за дерматовенерологија, тројца пациенти на Клиниката за нефрологија и исто толку во ковид – центарот на Клиниката за уво, нос и грло. На Клиниката за очни болести имало два приеми. Во ковид – центарот во ГОБ „8 Септември“ имало 15 нови приеми на пациенти, а 14 болни биле примени на Инфективната клиника.

Во изминатите 24 часа дома се пуштени 39 оздравени пациенти, соопшти МЗ.

Битолскиот и софискиот универзитет заедно го чествуваат Св. Климент

Илустрација - Универзитетот „Св. Климент Охридски“ - Битола

Универзитетите од Софија и Битола, во рамки на заедничкото празнување на св. Климент Охридски, денеска почнаа заедничка научна конференција на тема „Димензиите на компетенциите“.

Како што соопшти Универзитетот „Св. Климент Охридски“-Битола (УКЛО), конференцијата ја отворија министерката за образование и наука Мила Царовска, заменик-министерот за образование на Бугарија Тања Михајлова, ректорот на Софискиот универзитет проф. д-р Анастас Герджиков и проректорот на УКЛО – проф.д-р Марјан Ѓуровски, а учествуваат професори од двете земји со трудови и истражувања.

Конференцијата ќе резултира со издавање заеднички зборник на трудови, за што е формиран заеднички научен, програмски и организациски комитет. Во обраќањето на свеченото отворање, информира УКЛО, министерката Царовска го поздрави заедничкото празнување на св. Климент Охридски и нагласи дека е добар знак за нас и за нашита два универзитета што во духот на европските вредности за партнерство, за поврзување и низ нов академски дискурс тежиштето е ставено на квалитетна меѓусебна соработка.

Битиќи претстави платформа „За татковината со љубов“

Вицепремиерот Фатмир Битиќи

Вицепремиерот за економски прашања, Фатмир Битиќи, објави дека вчера, заедно со 20-тина водечки економски експерти во земјава од повеќе различни области, бил одржан првиот иницијален состанок од платформата „За татковината со љубов“ чиј иницијатор за формирање е вицепремиерот за економски прашања, соопшти Кабинетот на вицепремиерот.

„Ја крстивме „За татковината со љубов“ затоа што е токму тоа, обединување и работење за заедничка мисија а тоа е - економска благосостојба на татковината и граѓаните кои живеат во неа. Идејата зад неа е на едно место да се соберат водечките економски експерти во земјава од повеќе различни области: макроекономија, јавни финансии, даноци, инвестиции, царина, претприемништво, човечки капитал, стратешко планирање... И да претставуваат советодавно тело за економски стратешки размислувања“, информираше Битиќи.

Според вицепремиерот, платформата ќе претставува своевиден тинк-тенк на државата за сите прашања поврзани со стратешкиот развој на домашната економија.

За едно деноноќие 715 пријави за неносење заштитна маска

Илустрација - Граѓани и полиција со заштитни маски за лице во Скопје

Во текот на изминатото деноноќие на територијата на Република Северна Македонија, по однос на мерката за носење лична заштита на лице, регистрирани се 715 прекршоци, соопшти Министерството за внатрешни работи (МВР).

Во денешното соопштение полицијата апелира до граѓаните да ги почитуваат мерките и протоколите донесени од Владата со цел справување со Ковид-19.

И денеска протести на ВМРО-ДПМНЕ за оставка на Заев

Архивска фотографија од минатонеделниот протест на ВМРО-ДПМНЕ пред Владата

Опозициската ВМРО-ДПМНЕ најави дека и денеска ќе одржи протест во Скопје на кој ќе побара оставка од премиерот Зоран Заев, поради, како што велат од партијата, неговата распродажба на државните и националните интереси во актуелните случувања на релација Скопје - Софија.

Протестите ќе се одржат пред Владата, МНР и пред Министерство за правда, од 17 до 18 часот.

„Народот го крена гласот за предавствата на оваа власт, денес блокада на Влада, МНР и министерство за правда. И денес продолжуваме со изразување на револтот против погрешните политики на владата предводена од Зоран Заев и СДСМ. Заедно со граѓаните денес пак да порачаме на квинслингот Заев доста е со распродавање и понижување на државата. ВМРО-ДПМНЕ го предупредува македонскиот народ, граѓаните на Македонија на будно следење на тоа што се спрема, што се подготвува, на тоа што се преговара“, се вели во најавата за протестот.

Протестите на опозицијата почнаа по интервјуто на премиерот заев во кое тој кажа дека „Бугарија не е фашизам и дека имаме заедничка историја“, а по ветото од Софија за преговарачката рамка за Македонија и Европската унија. Денеска и утре има дводневен онлајн состанок на Комисијата за историски прашања на Бугарија и Македонија.

Путин нареди „масовна“ вакцинација за коронавирус од следната недела

Претседателот на Русија Владимир Путин

Претседателот на Русија Владимир Путин и нареди на владата следната недела да започне „масовна“ вакцинација за коронавирус, бидејќи Русија се обидува да ја зголеми достапноста и вниманието за својата вакцина Спутник-V. Наредбата на Путин, издадена вчера за време на телеконференција со медицинските институции во Министерството за одбрана, доаѓа во време на постојани прашања за ефикасноста на руската вакцина.

Историски момент: Британија прва во светот ја одобри вакцината на „БиоНТек“ и „Фајзер“

До ова дојде неколку часа откако Британија соопшти дека одобрила вакцина, изработена во заедничка американско-германска соработка, откако клиничките испитувања покажале дека е 95% ефикасна и нуди значителна заштита за постарите луѓе. Путин во август го зачуди светот објавувајќи дека владата ја одобрила првата вакцина за коронавирус во светот. Но, вакцината сè уште не била подложена на клучно тестирање во третата фаза и била дадена само на неколку десетици луѓе. Истражувачите првично објавија малку податоци во јавноста што може да бидат прегледани или испитани од независни научници. Оттогаш, неколку западни биотехнички компании објавија ветувачки, проверливи резултати, вклучувајќи ги Фајзер и БиоНтек - американско-германскиот тим кој стои зад британската вакцина.

Компанијата Модерна ќе побара итно одобрување на нивната вакцина против коронавирусот

Регулаторот на САД, Администрацијата за храна и лекови, ќе размисли за одобрување на таа вакцина на 10 декември. Водечкиот производител на вакцини во Русија, московскиот центар „Гамалеја“, поддржан од државниот фонд за суверено богатство, се залагаа да покажат дека руската вакцина е подеднакво ветувачка како и западните.

ОН: 2020 година веројатно ќе биде една од трите најтопли години

илустрација

Оваа година веројатно ќе биде една од трите најтопли, предупредија ОН, додавајќи дека постои можност до 2024 година да има привремено зголемување на температурата над прагот од 1,5 Целзиусови степени што е цел на Меѓународен договор за клима во 2015 година во Париз.
Температурата соборува рекорди од година во година, а деценијата 2011-2020 ќе остане најтопла досега забележана, со шест најтопли години од 2015 година, се вели во извештајот на Меѓународната метеоролошка организација за состојбата на глобалната клима.

Граѓаните со повисока свест од партиите за климатските промени

Од јануари до октомври, глобалната просечна температура беше околу 1,2 Целзиусови степени повисока од референтниот период 1850-1900 година, така што 2020 година ќе биде една од трите најтопли години. Се додава дека екстремната топлина, пожарите, поплавите, зголемената киселост на океаните и рекордната сезона на урагани во Атлантикот сведочат за продолжување на климатските промени. Најголем пораст на температурата има во Северна Азија, особено во сибирскиот дел на Арктикот, каде што беше потопло за повеќе од пет степени од просекот. Топлината во Сибир беше најголема на крајот на јуни, со 38,0 степени во Верхојанск на 20 јуни, што во моментов е највисока температура измерена северно од Арктичкиот круг.

САД и официјално го напуштаат Парискиот договор за климата

Сезоната на шумски пожари, која опустоши големи области на Австралија, Сибир, западниот брег на САД и Јужна Америка, беше најактивна во последните 18 години. Меѓу лошите вести е дека арктичкиот морски мраз достигна годишен минимум во септември, заземајќи го второто место за време на 42-годишното сателитско набљудување. Гренланд продолжува да ја губи ледената маса, иако побавно отколку во 2019 година. И океаните, кои складираат повеќе од 90 проценти од вишокот енергија што се акумулира во климатскиот систем на Земјата, се загреваат побрзо и побрзо во последните децении, се вели во извештајот.

Бајден сака да преговара за ирански договор

Избраниот американски претседател Џо Бајден

Избраниот американски претседател Џо Бајден изрази желба за брзо започнување нови преговори со Иран, но во консултација со сојузниците на САД, и тоа откако повторно ќе се приклучи на меѓународниот договор за нуклеарната програма. Бајден во интервју за Њујорк Тајмс го потврди ставот што го искажа за време на кампањата за претседателските избори одржани на 3 ноември во САД. Тој во колумна во септември напиша дека Соединетите држави ќе се вратат на договорот доколку Техеран строго се придржува кон обврските од тој документ. Бајден за Њујорк Тајмс изјави дека тоа е сè уште негова позиција.

Иранскиот безбедносен апарат под удар по атентатот врз нуклеарниот научник

„Најдобар начин да се постигне одредена стабилност во регионот е да се разгледа иранската нуклеарна програма. Ако Иран има атомска бомба, тогаш би се создала трка на нуклеарно вооружување на Блискиот исток и тоа е последното што ни треба на тој дел од светот", рече тој. Враќањето на договорот би значело укинување на големите санкции воведени од актуелниот американски претседател Доналд Трамп по повлекувањето од договорот. Како одговор, Иран постепено започна да се повлекува од своите обврски согласно договорот.

Геј вечера што ја ослабува моќта на Орбан

Јозеф Сајер

Откритието дека соработник близок со унгарскиот премиер Виктор Орбан бил на геј забава во Брисел, предизвика бомба во Унгарија каде што опозицијата и медиумите го осудија владиното лицемерие во кое се критикуваат ЛГБТ луѓето. Оставката на европратеникот Јозеф Сајер, столб на мнозинската партија Фидес, може да ја ослабне позицијата на Унгарија, која е во судир со Европската унија околу владеењето на правото, проценува агенцијата Франс Прес. Сајер (59) во вторникот признал дека бил на сексуална забава во центарот на Брисел, што белгиските медиуми ја опишаа како „оргии“ со околу 25 голи мажи.

Унгарски европратеник поднесе оставка по полициската рација на „сексуална забава“ во Брисел

Полицијата ја прекина забавата и ги казни присутните за непочитување на мерките воведени против коронавирусот. „Сајер донесе добра одлука“ со повлекување и извинување, објави делегацијата на Фидес во Европскиот парламент. Сепак, унгарската влада не се огласи. Независната веб-страница Телекс објави дека не ја доведува во прашање приватноста на пратениците, но укажува на проблемот со „лагите и нечесноста“. Фидес напаѓа луѓе со различна сексуална ориентација во Унгарија под изговор на „заштита на нормалноста“, додека Сајер добро се забавува на геј забава во Брисел. Патем, Сајер сака да се претстави како еден од авторите на промената на Уставот во 2011 година. Една клаузула од текстот на Уставот вели дека бракот е „заедница на маж и жена“ и дека владата сака да ги брани христијанските вредности. Друга непријатност за унгарската влада е фактот што бриселската полиција пронајде дрога во близина на Сајер и дека тој е казнет за непочитување на санитарните мерки. Тоа го нарушува моралот што го промовира Орбан, изјави опозицијата.

Директор на музеј во Унгарија го нарече Сорос либерален фирер, предизвика остри критики

„Додека политичарите на Фидес ни држат лекции за христијанството и семејните вредности, тие водат сосема поинаков живот“, рече поранешниот левичарски премиер Ференц Ѓурчањ. Фидес е постојана мета на критики од Европската народна партија (ЕПП). Многу пратеници на ЕПП претходно повикаа на исклучување на унгарската партија од европската група, бидејќи смета дека се оддалечува од нејзините политички упатства.

Почина поранешниот француски претседател Д’Естен

Поранешниот француски претседател Жискар Д'Естен

Поранешниот француски претседател Жискар Д'Естен, клучен архитект на европската интеграција во 1970-тите, почина на 94-годишна возраст. Тој почина вчера во неговиот дом во регионот Лоар-ет-Шер, во централна Франција, по компликациите поврзани со ковид-19. Познат за многу Французи едноставно како Жискар или, либералниот претседател беше шеф на државата од 1974 до 1981 година. Во Европа, тој разви блиски односи со поранешниот западен германски канцелар Хелмут Шмит и заедно ги поставија темелите на заедничката валута на еврото, поставувајќи го Европскиот монетарен систем.

Франција и Германија се за ревизија на Шенген зоната

Дома, тој беше познат по воведувањето либерални политики, особено легализирање на абортусот и развод по заедничка согласност. По поразот на претседателските избори во 1981 година од социјалистот Франсоа Митеран по последиците од глобалниот економски пад во 70-тите години на минатиот век, Жискар остана активен во центристичката политика, враќајќи го своето место во парламентот и освојувајќи ја претседателската функција во регионалниот совет на Оверн. Тој исто така служеше како европски парламентарец од 1989 до 1993 година.
Во 2004 година, откако го загуби пратеничкото место во Франција, тој ја заврши својата активна политичка кариера.

НАТО изрази загриженост за руското „воено засилување“

генералниот секретар на НАТО Јенс Столтенберг

Министрите за надворешни работи на НАТО го завршија дводневниот состанок што го трасира патот кон реформите во трансатлантскиот сојуз бидејќи се соочува со двојни предизвици од Русија и Кина, како и со ситуацијата во Авганистан. На состанокот, одржан преку видео-врска како претпазливост против ширењето на коронавирусот, се дискутираше за тоа како алијансата мора да се прилагоди на новите закани, вклучително и „упорно агресивната Русија“ и „подемот на Кина“. Во извештајот на експертска група на 67 страници во кој се дадени сугестиите за тоа како да се рестартира Алијансата, е забележано дека НАТО се соочуваше со една голема закана за време на Студената војна, но оти сега се соочува со двајца „системски ривали“ - Русија и Кина - заедно со „трајната закана од тероризам“.

Османи: Ние сме е рамноправен чинител во НАТО

Говорејќи пред новинарите, генералниот секретар на НАТО Јенс Столтенберг рече дека министрите разговарале за „континуираното воено натрупување на Русија во соседството на Алијансата, како и за контролата на оружјето“. Тој рече дека НАТО го прилагодува својот став за одвраќање „за решавање на дестабилизирачките активности на Русија“, но министрите се согласуваат дека тие мора да продолжат да водат дијалог со Русија.

Дводневен онлајн состанок на македонско-бугарска комисија за историски прашања

Македонско - бугарска комисија за историја

На оваа средба на Заедничката македонско-бугарска комисија за историски и образовни прашања која ќе се одржи денеска и утре онлајн поради пандемијата со коронавирусот тема треба да бидат револуционерот Гоце Делчев, евентуалното негово заедничко чествување и македонските учебници за периодот среден век и ран османлиски период. На ден пред средбата на Комисијата ко-претседавачите од двете страни, Ангел Димитров и Драги Ѓоргиев си разменија не многу оптимистични пораки.

Искричења пред утрешната средба на историчарите

Професорот Ѓоргиев во изјава за Радио Слободна Европа изрази зачуденост од изјавата на неговиот колега, бугарскиот копретседавачот Ангел Димитров. Тој рече дека бугарската позиција е единствена и политички монолитна, за разлика од македонската повикувајќи се на интервјуто на премиерот Зоран Заев за БГНЕС во кое, според Димитров, има „нов поглед кон минатото“. Бугарскиот историчар кажаното од премиерот го доведува во релација со ставовите на македонските историчари. Ѓорѓиев пак, вели дека во пресрет на средбата очекува дека членовите на Комисијата ќе се однесуваат професионално и академски.

Мицкоски ги повика граѓаните будно да ги следат преговорите во Бугарија

Претходно, комисијата ги помина бугарските учебници за тој период. Последната средба се одржа на 15 и 16 октомври во Скопје и тогаш немаше големи поместувања во работата односно беше постигнат мал напредок за македонските учебниците, но не и за досегашната покомплицирана тема – Гоце Делчев. Во меѓувреме, откако Бугарија и официјално забележа дека Договорот за добрососедство се крши и поради тоа што комисијата работела бавно министерот за надворешни работи Бујар Османи одговори дека таа не работи бавно земајќи предвид други такви комисии кои работеле со години.

Времето денеска: значително облачно со дожд

Ќе биде значително облачно со повремени локални врнежи од дожд, претежно во западните делови. Ќе дува умерен, вдолж Повардарието повремено засилен југоисточен ветер. Дневната температура ќе биде од 4 до 10 степени. Во Скопје и околината слично време. Дневната температура ќе биде до 8 степени.

Мицкоски ги повика граѓаните будно да ги следат преговорите во Бугарија

Лидерот на ВМРО-ДПМНЕ Христијан Мицкоски на протестот во Куманово ги повика граѓаните будно да следат во наредните денови што ќе се случува и какви преговори ќе донесе Владо Бучковски со источниот сосед. Тој вели дека ја предупредува македонска јавност дека новоименувањето на Бучковски за посредник во спорот со Бугарија, човек кој е осуден па политички ослободен, а ќе го решава историскиот спор со Бугарија и историскиот спор со соседна Бугарија претставува вовед во едно ново апокалиптично сценарио, и вовед во ново предавство кое ќе биде извршено врз македонскиот народ.


Мицкоски посочи дека на маса за преговори се ставени се македонската историја, македонскиот јазик, традиција, обичаи и откажување од македонското национално малцинство во Бугарија.


„Од прилика за сето ова денеска преговара Владо Бучковски по налог на Зоран Заев и тој човек не знам дали ќе успее во овие седум дена, во период кој следи секако ќе се обиде да земе дел од срамот којшто ќе биде нанесен врз македонскиот народ. Го предупредувам македонскиот народ, граѓаните на Македонија на будно следење на тоа што се спрема, што се подготвува на тоа што се подготвува на тоа што се преговара“ изјави Мицкоски.


Тој најави дека ВМРО-ДПМНЕ како политичка партија ќе ја предводи идната влада која, како што рече, ќе биде влада на национално единство, нема да почитува ниту една реченица, ниту еден збор, од евентуално парче хартија кое ќе го потпишат, воецот Заев и Бучковски, а кое ќе биде на штета на македонскиот идентитет, јазик, традиција, обичаи.

Нови 946 заразени со ковид-19 и 33 починати

Ковид-19 центар во Скопје

Во последните 24 часа се регистрани 946 нови случаи на заразени со ковид-19 од вкупно 2564 направени тестирања. Најголемиот број на новозаразени се евидентирани во Скопје 426, потоа во Битола 61, Прилеп-56 и Тетово-46. Во изминатово деноноќие од последици од ковид 19 починале 33 пациенти од кои деветмина се од Скопје, а шест од Прилеп.

Денеска Институтот за јавно здравје регистрира 789 оздравени пациенти.

Вкупната бројка на ковид дијагностицирани во нашата земја од почетокот на епидемијата изнесува 63890, бројката на оздравени пациенти е 40977, на починати е 1825, а бројот на активни случаи изнесува 21088. Најголем број на активни случаи е забележан во Скопје изнесува 10 273, додека во внатрешноста најмногу активни случаи на заболени од коронавирус има во Прилеп 1002, па во Тетово 917, Гостивар 936 и Куманово.

Американка протерана од Русија

Илустрација, слика од интернет страницата на невладината организација во Русија

Руските власти и ја одземаа дозволата за престој на американската државјанка и директорка на невладината организација за заштита на човекови права Венеса Коган. Портпаролката на невладината организација Ксенија Бабич изјави дека Коган која живее 11 години во Русија аплицираше за руски паасош, но денеска им пристигнало известување дека барањето е одбиено затоа што „ таа претставува закана за безбедноста на земјата“. На Коган, чиј сопруг и деца се руски државјани, и е наредено да ја напушти Русија во рок од две недели. Невладината организација со која таа раководи, е вклучена во одбрана на човековите права во ситуации поврзани со вооружени конфликти, тортура и родово насилство на територија на поранешниот Советски сојуз. Организацијата ги претставува жртвите во Европскиот суд за човекови права .

Борел: ЕУ не е цела без Западен Балкан

Илустрација, средба на ерменскиот претседател Армен Саркиссин со шефот на европската дипломатија Жозеп Борел

Шефот на дипломатијата на Европска Унија, Жозеп Борел денеска изјави дека ЕУ нема да биде цела без Западен Балкан. Тој ги предупреди земјите од регионот дека ќе можат да напредуваат кон членство само ако се обединети во изнаоѓање на заеднички основи. Борел ова го посочи во видео-порака по повод дебата во Надворешнополитичкиот одбор на Европски парламент за ситуацијата во Западен Бакан по 25 години од Дејтонскиот договор.

„По 25 години од потпишувањето на Дејтон, земјите од регионот одлучно се придвижуваат, секоја со својата брзина, кон ЕУ. Помирувањето бара желба, заложби и разбирање. Тоа е порака за БиХ, но и за цел Западен Балкан и за Европа,“ изјави наведе Борел.

Штрукељ: Новите вакцини против Ковид-19 се добри, но да бидеме внимателни

Професорот на Факултетот за фармација при Универзитетот во Љубљана Борут Штрукељ на денешниот Самит Македонија 2025

Новите вакцини против Ковид-19 се многу добри. Сепак , мора да бидеме внимателни изјави денеска професорот на Факултетот за фармација при Универзитетот во Љубљана и член на тимот за развивање на вакцината за Ковид 19, Борут Штрукељ на денешниот Самит Македонија 2025.

Тој во своето обраќање на вториот ден од деветтото издание на Самитот изјави дека новите вакцини се составени од РНК И ДНК молекули, значи само од генетски материјал, па затоа може да се каже дека на некој начин поради тоа се поефикасни и побезбедни. Штрукељ рече дека основното прашање е како ќе развиеме вакцина за толку кратко време, ако земеме предвид дека за тоа реално се потребни три до четири години.

Сепак тој посочи дека се инвестирани билиони евра за најкратката можна процедура, а тоа како што рече, го олесни целокупниот процес.

„Секоја земја, секое Министерство за здравство е одговорно за вакцинацијата и ќе има можност да одбере од најмалку три различни вакцини на пазарот. Светот има повеќе опции. Но, се’ уште е тешко прецизно да се зборува за безбедноста и ефикасноста“, истакна Штрукељ.

Коѕијас: Шовинистички наратив од Бугарија за Северна Македонија

Архивска фотографија - Никос Коѕијас со Зоран Заев, Никола Димитров и Алексис Ципрас на потпишувањето на Преспанскиот договор

Сериозен проблем се создаде во нашиот регион, поради шовинистичкото откопување на македонското прашање од радикалните националисти од Бугарија, пишува поранешниот министер за надворешни работи на Грција Никос Коѕијас на почетокот од неговата колумна за „Независната балканска новинска агенција”, пренесува МИА од Атина.

Коѕијас вели дека „станува збор или за јасни радикални десничари како што е актуелниот министер за одбрана и за некои други бугарски политичари што сакаат да ги поддржат нивната предизборна битка и нивните лични стратегии”.

Поранешниот дипломат и сегашен професор по меѓународни односи Коѕијас истакнува дека со Договорот од Преспа, Грција се ослободи од проблемот, а денес „про-турски ориентираните во Бугарија сметаат дека од договорот, загубиле дел од нивниот „шовинистички наратив” и „како втор бељаџија во регионот, поставуваат два нови предуслови за европскиот тек на Северна Македонија”, пренесе МИА.

Вархеји не верува дека Македонија годинава ќе почне преговори со ЕУ

Еврокомесарот Оливер Вархеји и премиерот Зоран Заев

Европскиот комесар за проширување Оливер Вархеји предупреди дека се намалуваат шансите Северна Македонија и Албанија оваа година да започнат разговори за пристап со Европската унија (ЕУ), јави дописничката на Радио Слободна Европа од Брисел.

„Се уште се надевам, но за жал е сè помалку сигурно дека оваа година можеме да донесеме рамки за преговори. Во таа смисла правиме заеднички напори со германското претседателство со Советот на ЕУ “, рече Вархеји.

Тој зборуваше во комитетот за надворешна политика на Европскиот парламент (АФЕТ), каде предупреди дека во отсуство на решение за отворање преговори, „ЕУ ризикува да не биде веродостојна во исполнувањето на ветувањата дадени кога решивме да ги отвориме преговорите со тие земји“.

Во март, ЕУ едногласно го одобри отворањето на преговорите за членство со Северна Македонија и Албанија, со цел првиот состанок да се одржи во декември оваа година. Сепак, од септември, Бугарија ја блокира одлуката, условувајќи го процесот со решавање на билатералниот спор со официјално Скопје.

Европскиот комесар Оливер Вархеји побара од Северна Македонија да вложи дополнителни напори и „да ги исполни грижите на Бугарија“ со цел да се најде решение што е прифатливо за обете страни. Тој оцени дека станува збор за политичка волја, ангажман и решителност и изрази подготвеност на Европската комисија да помогне да се најде решение.

Последниот состанок на Советот за општи работи на ЕУ оваа година, каде треба да се одобри отворањето на преговорите, ќе се одржи на 8 декември. Сепак, пред овој состанок, потребно е да се постигне договор меѓу сите земји-членки, со цел да се направат подготовки за состанокот, а потоа да се одржи и меѓувладина конференција, која официјално ги отвора преговорите за членство.

Северна Македонија е земја кандидат за полноправно членство во ЕУ од 2005 година, а во 2009 година доби зелено светло од ЕК за да може да ги отвори пристапните преговори. Цела деценија државата беше блокирана од соседна Грција, што го услови почетокот на овој процес со решавање на спорот за името. Со постигнувањето на Договорот од Преспа во 2018 година, отстранувањето, како што се сметаше во тоа време, беше последната политичка блокада.

Бугарија и Северна Македонија долго време дебатираа за името на македонскиот јазик, а меѓу другото, Бугарија одбива да го користи терминот „македонски јазик“ во официјалните документи на ЕУ, но приговорите на официјална Софија се појавија само оваа есен, кога требаше земјите од ЕУ се согласуваат за рамка за преговори.

Нов Зеланд прогласи вонредна климатска состојба

Илустрација - Муриваи плажата во Нов Зеланд

Новозеландската влада денеска прогласи вонредна климатска состојба во земјата. Декларацијата се темели на истражувањата на Меѓувладин панел за климатски промени за потребите за драстично намалување на глобалните емисии, за да се избегне затоплувањето од 1,5 степени Целзиусови.

„Ова е научна декларација. Оваа декларација е потврда за идните генерации. Потврда за товарот кој ќе го носат ако веднаш нешто не преземеме“ изјави премиерката Џакинда Ардерн во Парламентот.

Нов Зеланд им се придружи на 32 земји, вклучително и Канада, Франција и Велика Британија, кои прогласија вонредна состојба поради климатските промени.

Вчитај повеќе

XS
SM
MD
LG