Со танц битка започна програма со герила активности за подигање на свеста за значењето на физичката активност кај младите. Педесет млади од студијата „Break a leg“, „Eat the beat“ и „Aqua dance club“ одржаа танц битка во општина Аеродром, пред Капитол мол во саботата, покажувајќи дека покрај физичките и здравствени придобивки танцувањето им помага да откријат нов јазик на меѓусебно разбирање.
Според организаторите на оваа акција, целта е да ја зголемат свеста за придобивките од танцот и физичката активност кај децата, особено во денешно време кога младите генерации живеат пред телефоните, во вирутелен свет, не се движат доволно и не комуницираат доволно со своите врсници. Тие нагласуваат дека танцот отсекогаш бил значаен дел од човековата култура, некои археолошки откритија покажуваат дека тој постоел во Индија пред 9.000 години и Египет пред 5.300 години, а во модерно време, кога живееме динамично и брзо, кога исхраната не ни е секогаш на највисоко ниво и кога не сме активни физички, танцот може да има клучна улога, посебно кај младите.
„Танцот е еден од начините каде на детето му се овозможува да ја развие својата моторика, а во исто време да го активира мозокот преку учење на движења каде се развива логиката, памтењето преку движењата и имагинацијата и креативноста. Преку движењата и музиката кај децата се надградува и емоционалната интелигенција, посебно преку тимската игра“, вели Андријана Петковски од „Break a leg“.
Симона Веселиновска Карадаковска од „Eat the beat“ порачува дека натпреварите се многу важни за децата.
„Танцувањето пред публика, соочувањето со конкуренцијата на подиум и дружење со истата надвор од подиумот се голема мотивација за напредок во танцувањето, а истовремено децата се соочуваат со чуствата како е да се биде најдобар, како е да се биде победен, па и последен и како да се носат со секоја победа и пораз, предизвици кои се дел од секојдневниот живот“, додава таа.
Според Емилија Достинова од „Aqua Dance club“ комуникацијата игра голема улога кај децата, исто како и кај возрасните.
„Така се учиме да ги разбереме луѓето за работите што ги сакаат, што им требаат, кои се нивните соништа. Нашите млади си допишуваат и комуницираат преку екран и затоа тоа што го видовме на Танц битката беше одлично. Тоа е целосно нов јазик за нив и многу ми е драго што со толкав интерес го прават и што секој ден сѐ повеќе и повеќе деца доаѓаат во светот на танцот“, посочи Достинова.
Танцот ќе се развива и оваа година се очекува да кулминира на „Dance off“ меѓународниот танц натпревар кој ќе се одржува на 15, 16 и 17 ноември во Скопје во А1 Арена СЦ „Борис Трајковски“.