Вести
Груевски: Имаме две опозиции - официјалната СДСМ и платените НВО од Сорос
Имаме две опозиции. Една официјална, СДСМ со неколку сателит или човек-партии, со нив и уште една, би ја нарекол платена опозиција... Невладините, кои се финансирани од Сорос и преку секташко однесување врбуваат млади луѓе да работат против Македонија, истакнува претседателот на ВМРО-ДПМНЕ Никола Груевски во дел од интервјуто за Телеграф.мк, кое ќе биде објавувано во неколку продолженија.
Во интервјуто Груевски зборува за теми поврзани со протестите, одложувањето на изборите, работата на СЈО, политичката ситуација и начините за излез од кризата. Во првиот дел од интервјуто, Груевски се осврнува на начинот на дејствување на невладините организации под капата на Сорос и одложувањето на изборите, кои беа закажани за 5 јуни.
Телеграф: Актуелни се протестите. Обвинувањата се дека зад нив стојат НВО кои располагаат и трошат големи пари за протестите и дека има луѓе што живеат од тоа. Сепак, протести некогаш има, некогаш нема. Како тие живеат од тоа?
„Видете, НВО, кои се финансирани главно од фирмите на Сорос и од некои други странски извори имаат континуитет во своето работење, и кога има и кога нема протести. Во периоди кога нема протести, тие, пак, парите ги трошат за горе-долу истите луѓе, но во различна форма. На пример, држат разни јавни дебати против активностите и проектите на Владата, држат прес-конференции, гостуваат во телевизиски и радиоемисии, организираат т.н. пленуми од различен вид, им се вршат разни тренинзи за сето тоа.
Тренинзите најчесто ги вршат највидните лица на организациите на Сорос и од она што сум го слушал, често пати има крајно секташко однесување и предавања, обиди за врбување млади и перспективни луѓе и вршење индоктринација кон нив, а притоа давајќи им пари и многу бесплатни патувања, кој е и главниот мотив да доаѓаат на тие предавања и обиди за перење на мозокот. Оние што по некое време нема да им ја прифатат играта, кои нема да подлегнат на индоктринацијата, се информираат веќе да не доаѓаат, за парите да продолжат да ги инвестираат во други, од кои ќе имаат ефект.
Што Ви значеше тоа секташки?
Па, еве, еден пример што ми го раскажа еден од учесниците, мислам некаде во 2009 година од предавањата. Говорејќи им против политиките на Владата, побарале секој од присутните да се качи на маса и да скокне и да ја гази програмата на ВМРО-ДПМНЕ. Тотално лудо!“
Или барање во хор сите слушатели на предавањата да повторуваат: Оваа Влада не чини!!! И повеќе слични работи, кои човек го шокираат кога ги слуша.
Не се сите вакви методи, имаат и пософистицирани, но имаат и многу вакви. Слушателите доаѓаат затоа што знаат дека со сигурност ќе добијат пари, најчесто во некоја многу лесна форма, на пример давање некоја идеја, одржување некое предавање пред група студенти или слично. Голем дел од нив не подлегнуваат на индоктринацијата, но им требаат пари и слушаат и молчат. Некои од тие слушатели ми рекоа дека оделе на предавањата само заради парите, кои во тој момент им биле многу потребни, но се гаделе од она што го слушале и го гледале.
Во 2009 година, кога беше екот на кампањата на владата „Ти си Македонија“, една од основните лекции била да ги убеди слушателите дека „Ти не си Македонија“ и дека никој во оваа земја не треба да се идентификува со местото и државата на раѓање и живеење, туку да се чувствува исклучиво како човек на планетата Земја. Да нема никакво различно чувство за својот народ, традиција, историја и за својата земја во однос на која било друга.
Директна индоктринација младите луѓе да не ја чувствуваат Македонија како своја држава. И не ме чуди што денес без ниту малку совест некои млади луѓе ги сквернават спомениците на македонските херои кои ги положиле животите за денешната слобода и држава.
Истите тие предавачи и слушатели имаат задача да гостуваат по емисии и најжестоко да ги напаѓаат Владата и ВМРО-ДПМНЕ, да пишуваат колумни, некои од нив да бидат новинари или да водат некои емисии или портали, или пленуми, или протести, јавни дебати, да пишуваат негативно насекаде надвор од земјата против нас, да испраќаат илјадници писма и имејлови со оцрнување на Владата, да даваат изјави за странски медиуми или странски аналитичари, да ги дружат и убедуваат дека во нашата земја нема слобода и демократија, за потоа истите да го шират тоа.
Инаку, од она што деновиве го објавија медиумите, видовме дека некои експоненти во протестите, кои се организирани од тие НВО, земале и до 70 илјади евра годишно.
Значи, сакате да кажете дека континуирано се справувате со ваков вид противник?
Ние имаме две опозиции. Една официјална, СДСМ со неколку сателит или човек-партии со нив и уште една, би ја нарекол платена опозиција, иако индиректно и оваа првата користи од средствата на втората. Веројатно некој проценил дека, кога СДСМ е во опозиција не може со сопствени сили да се избори кај граѓаните за освојување на довербата и затоа вложува големи пари да им помага. И така е, еве повеќе од две децении.
Сите НВО, кои се финансирани од Сорос, кога е на власт ВМРО, работат, се борат повремено и протестираат против нас, а кога е на власт СДСМ, главно работат проекти што се поддржани од СДСМ. Значи, некој однадвор секогаш низ овие две и пол децении плаќа да му се помогне на СДСМ. Прво, затоа што со таков избор на кадри во раководството неспособни се самите да дојдат на власт или да се одржат на власт и второ, затоа што некој сака да се тие на власт, заради некој негов интерес. Никој не дава толку пари без да има некој интерес од тоа.
И да потсетам, ова не е само во Македонија, туку во повеќе земји, особено од Источна Европа и од Балканот.
И така две и пол децении, ВМРО-ДПМНЕ се потпира само на народот и се труди колку може повеќе да му биде сервилен и да ги исполни ветувањата кон него и неговите потреби и барања, а СДСМ се потпира на спонзорите однадвор и се сервилни кон нив, а не кон народот.
Народот за нив е само инструмент што треба да се искористи да се дојде на власт и што подолго да се остане. Додека се на власт клучно е да го задоволат неформалниот сојузник, а за народот ќе фрлат по некоја коска.
Притоа, секогаш имаат дозвола за прогон кон луѓето од ВМРО-ДПМНЕ заради забавување на враќањето на довербата кон ВМРО-ДПМНЕ од страна на гласачкото тело. Оние што непристрасно ги следат работите знаат дека секогаш во време на СДСМ имаме помалку демократија и слобода, ама тогаш тоа не е тема. Демократија и слобода е тема само кога ВМРО-ДПМНЕ е на власт. Тоа е тоа.
Зборуваат дека нема доволно демократија и слобода, а истовремено не се симнати од медиумите. Кога ние бевме опозиција, се сеќавам се боревме некој медиум да ни дојде на прес-конференција, а понекогаш не доаѓаше ниту еден. Или, пак, ќе дојдеа неколку, но ниту еден медиум во земјата немаше да ја објави прес-конференцијата. Протестираат непречено со недели, уништуваат и оштетуваат државен имот, сквернават споменици на најзначајните личности од историјата, бојадисуваат објекти, меѓу кои има и такви што не се дел од „Скопје 2014“, големата болка на СДСМ, нивното огледало на неработењето во времето кога имаа доверба од мнозинството граѓани и беа на власт.
Земјата има огромен број медиуми, секој може сѐ да каже и да критикува без какви било последици по него. И тоа се случува секој ден, секој час, цела година, со години во целиот наш мандат.
Но, како и да е, и покрај тоа што потполно е јасно дека демократија има, и тоа многу, ние ќе работиме да има уште повеќе демократија, вели Груевски.
Опозициската СДСМ излезе со реакција наведувајќи дека интервјуто е огледало на фрустрациите на лидерот на ВМРО-ДПМНЕ.
Според СДСМ, независните институции му пречат на лидерот на ВМРО-ДПМНЕ затоа што, како што се наведува во реакцијата, ја потврдуваат вистината за неговото криминално владеење, а најголеми фрустрации тој има кон лидерот на СДСМ.
„Никола Груевски и ВМРО-ДПМНЕ бегаат од фер и демократски избори. Се плашат од соочување со граѓаните и одговорноста за криминалот и корупцијата. Но, во Македонија ќе има слободни, фер, демократски и кредибилни избори, се вели во реакцијата.
види ги сите денешни вести
Уапсени две лица во Германија под сомнение дека шпионирале за Русија
Две лица со двојно германско и руско државјанство се уапсени во Германија под сомнение дека планирале саботажи, вклучително и против воени објекти на САД, со цел да ја поткопаат воената поддршка за Украина, соопштија германските обвинители.
„Властите ги претресоа домовите и работните места на двајцата осомничени, кои се обвинети дека работеле за странска разузнавачка агенција“, се вели во соопштението.
Еден од осомничените, идентификуван од властите како Дитер С., од октомври 2023 година разговарал за можни заговори со лице поврзано со руското разузнавање, се вели во соопштението. Дитер С. бил подготвен да изврши бомбашки напади и подметнување пожари врз воени објекти, вклучително и оние со кои управуваат американските сили, прецизираше обвинителството.
Според магазинот Шпигел, објектите ја вклучувале воената база Графенвоер во јужната провинција Баварија, каде што украинските војници се обучуваат да користат американски тенкови Абрамс.
Руската амбасада во Берлин не одговори веднаш на барањата за коментар.
„Акциите беа особено насочени кон поткопување на воената поддршка што Германија и ја дава на Украина против руската воена агресија“, се вели во соопштението на германските обвинители.
Украина собори 13 руски беспилотни летала, бројот на загинати во Чернихив се зголеми на 18
Воздухопловните сили на Украина соопштија дека ги собориле сите 13 беспилотни летала испукани од Русија во текот на ноќта во четврток (18 април).
Нападот се случи додека спасувачките тимови сè уште трагаат по загинатите и повредените во рускиот ракетен напад во средата врз градот Чернихив, во кој загинаа 18 лица.
Цел на нападот беше критичната инфраструктура во западниот регион Ивано-Франковск, рече регионалниот гувернер, додавајќи дека остатоците од соборените беспилотни летала предизвикале пожари.
„Нападот со руско беспилотно летало врз западниот украински регион Ивано-Франковск во четвртокот беше насочен кон критичната инфраструктура, а остатоците предизвикаа пожари“, изјави гувернерката на регионот, Свитлана Онишчук.
Украинскиот медиум „Суспилне“ претходно утринава објави дека во четвртокот се слушнале експлозии во регионот Ивано-Франковск, додека украинските воздухопловни сили соопштија дека руски беспилотни летала летаат над регионот.
Русија неодамна ги засили нападите врз критичната инфраструктура на Украина, предизвикувајќи значителна штета на енергетскиот систем на земјата во март.
Украина, исто така, ги засили нападите врз Русија во последните недели, насочени кон енергетската инфраструктура.
Во меѓувреме, Русија во четвртокот соопшти дека неутрализирала 20 беспилотни летала и две балистички проектили во областите што граничат со Украина, вклучувајќи го и Ростов, каде се наоѓа нејзиниот команден штаб за офанзивата против Украина.
„Во текот на ноќта беа спречени неколку терористички напади на режимот во Киев“, соопшти Министерството за одбрана.
По нападот во Чернихив во северна Украина, спасувачите во четвртокот отстрануваа урнатини од местото на смртоносниот руски ракетен напад.
Три руски ракети паднаа врз град во северна Украина во средата, оставајќи локви крв на улицата на местото на еден удар, каде што спасувачите бараа преживеани и ги носеа ранетите на носилки.
Официјалниот број на загинати се искачи на 18 до четврток наутро, со 77 повредени-меѓу кои четири деца, соопшти Украинскиот оддел за итни случаи.
По тој напад, претседателот Володимир Зеленски повторно апелираше за дополнителна помош од западните сојузници.
„За жал, бројот на загинати може да се зголеми. Ова немаше да се случи доколку Украина добиеше доволно опрема за противвоздушна одбрана и ако решеноста на светот да се спротивстави на рускиот терор исто така беше доволна“, рече Зеленски во средата (17 април).
Новинарката на РСЕ, Алсу Курмашева - шест месеци во руски притвор
Алсу Курмашева работеше околу 25 години како новинарка во татарско-башкирскиот сервис на Радио Слободна Европа (РСЕ). И тогаш пред шест месеци, како што вели, „тоа за миг се претвори во криминал“.
Тоа се случи на 18 октомври кога Курмашева, руско-американска двојна државјанка, беше уапсена во Казан и обвинета дека не се регистрирала како странски агент, според рускиот кривичен закон што ги таргетира новинарите, активистите на граѓанското општество и други.
Таа подоцна беше обвинета за ширење невистини за руската војска, а доколку биде осудена се соочува со казна затвор до 10 години. РСЕ и американската влада велат дека обвиненијата се одмазда за нејзината работа како новинар на тој медиум.
Таа отпатувала во Русија за да ја посети и да се грижи за нејзината мајка и првично била приведена додека го чекала нејзиниот лет за враќање на 2 јуни на аеродромот во Казан, каде и биле одземени пасошите.
„На 18 октомври минатата година бев затворена под обвиненија кои сè уште немаат смисла во мојата глава“, напиша таа во неодамнешната порака објавена од еден месечник на татарски јазик во Казан.
Курмашева, која живее во Прага со нејзиниот сопруг Павел Буторин, кој исто така работи за РСЕ во Прага и нивните две ќерки, на возраст од 12 и 15 години, ги опиша нејзините затворски услови како лоши и рече дека нејзиното здравје се влошило бидејќи немала пристап до третман.
Алсу пишува дека „некои од нејзините болести се засилиле“, но дека лековите и редовното вежбање „и даваат сила да издржи и да ја поднесе болката“.
„Ја држат во нехумани услови само поради фактот што е Американка“, рече Буторин.
„Сакам руската влада да ми објасни мене и моите деца зошто ја држат Алса како заложник. Таа не е опозициска политичарка. Таа не е активист. Таа не е криминалец. Нејзиниот притвор е незаконски. Таа не припаѓа во затвор“, вели Буторин.
Многу критичари и групи за човекови права велат дека Кремљ го користи таканаречениот закон за странски агенти за да го потисне секое несогласување.
Москва, исто така, беше обвинета за приведување Американци со цел да ги користи како договор за пазарење за Русите затворени во САД.
„Руските власти спроведуваат жална криминална кампања против незаконски притворената Алсу Курмашева“, рече претседателот на РСЕ, Стивен Капус.
Друг американски новинар, репортерот на Вол Стрит Журнал, Еван Гершкович, е во притвор од март 2023 година под обвинение за шпионажа, што тој и неговиот весник жестоко го негираат, велејќи дека 32-годишниот само ја вршел својата работа како овластен новинар кога бил уапсен.
Во февруари, 23 земји ја номинираа Курмашева за светската награда за слобода на печатот на УНЕСКО/Гилермо Кано во 2024 година.
Основана во 1997 година, таа е годишна награда која се доделува на лице или група луѓе за исклучителен придонес во одбраната и промоцијата на слободата на печатот низ целиот свет и покрај опасностите и прогонот со кои се соочуваат.
За Курмашева наградите се нешто на што нема доволно време да се фокусира.
Наместо тоа, нејзината цел, како што вели, е едноставна:
„Мојата најголема желба е да си одам жива и здрава од овде“.
Почнува кампањата за парламентарните избори
Од денеска (18 април) официјално стартува и кампањата за изборите за пратеници.
Во тек е и кампањата за претседателските избори, па двете кампањи, ќе се одвиваат паралелно во текот на следните четири дена, вклучувајќи го и денешниот, по што на 22 април настапува 48-часовниот молк за претседателските избори. И покрај молкот за претседателските, кампањата за парламентарните избори ќе продолжи и во текот на овие два дена, што е ситуација која е единствена досега во изборните циклуси.
Кампањата за изборите за пратеници ќе трае до 6 мај по што ќе започне дводневниот молк пред 8 мај-денот на одржување на парламентарните и вториот круг од претседателските избори.
Коалицијата „Европска иднина“ предводена од СДСМ ја стартува парламентарната кампања со настан „Нема откажување од иднината“ во Скопје, а ќе има и митинзи во Демир Капија и во Гевгелија. Активности ќе има и претседателскиот кандидат Стево Пендаровски.
ВМРО-ДПМНЕ и Коалицијата „Твоја Македонија“, пак, традиционално ќе ја почнат кампањата со митинг во Охрид, а ќе се претстави и кандидатката за претседател Гордана Силјановска Давкова.
Коалицијата „Европски фронт“ најави активности во Скопје за конститутивна седница на победничко собрание од Парламентарните избори на 8 мај 2024 и претставување на претседателскиот кандидат Бујар Османи, како и централен митинг во Куманово.
Во Куманово митинг ќе има и Движењето ЗНАМ и претседателскиот кандидат Максим Димитриевски.
Во Штабот на Коалиција Вреди кај плоштадот Скендербег во Скопје е најавена перс-конференција на претседателскиот кандидат Арбен Таравари и на носителите на листите на кандидати за пратеници во сите изборни единици.
Претседателскиот кандидат на Левица, Билјана Ванковска кампањата за претставување на изборната програма ја продолжува со митинг во Велес, на кој ќе се обратат и претседателот на Левица и носител на листа на ИЕ1 Димитар Апасиев и носителот на листа на ИЕ3 Борислав Крмов.
Најавени се активности и на останатите учесници на изборите со кандидатски листи Коалцијата „Храбро за Македонија“ која ја сочинуваат ГРОМ, ПЦЕР и Интегра, партиите Македонска Ера Трета, Демократи, Аваја, Твоја партија, Родина Македонија, Единствена Македонија...
Со потпишување Кодекс за фер и демократски избори претставници на повеќето од политичките партии вчера се обврзаа дека ќе го почитуваат етичкиот кодекс и нема да користат говор на омраза во предизборната кампања.
САД ги вратија енергетските санкции за Венецуела
Американската влада соопшти дека нема да ја обнови лиценцата за нафта на Венецуела која истекува денеска (18 април).
Според американски медиуми, администрацијата на претседателот Џо Бајден на тој начин одлучила повторно да воведе казнени мерки како одговор на неисполнувањето на обврските од предизборната кампања од страна на претседателот Николас Мадуро.
Мадуро ќе бара трет мандат на изборите на 28 јули годинава.
Во последниве месеци, Вашингтон постојано се закануваше дека повторно ќе воведе енергетски санкции доколку Мадуро не ги исполни ветувањата кои делумно ги ублажија американските казнени мерки.
Изборниот договор меѓу владата и венецуелската опозиција, поддржан од САД, исто така одигра улога.
Широките санкции за нафтената индустрија во Венецуела првпат беа воведени од администрацијата на претседателот Доналд Трамп во 2019 година по изборната победа на Мадуро, која САД и другите западни влади не ја признаа.
Во Брисел продолжува дијалогот меѓу Белград и Приштина за употребата на динарот во Косово
Во Брисел денеска ќе продолжат разговорите во рамки на дијалогот меѓу Белград и Приштина, а се очекува повторно главна тема да биде одлуката на Централна банка на Косово да ја забрани употребата на динарот во Косово.
Тоа е петтата рунда од дијалогот за оваа одлука на официјална Приштина.
„Одиме со надеж дека ќе најдеме решение за динарот, иако не сум оптимист, имајќи ја предвид неподготвеноста на Приштина да бара решенија преку компромис“, рече Петар Петковиќ, директор на српската владина Канцеларија за Косово и Метохија.
Специјалниот пратеник на Европската Унија за дијалог меѓу Белград и Приштина, Мирослав Лајчак, во понеделникот изјави дека ќе биде домаќин на главните преговарачи на Белград и Приштина подоцна оваа недела за нова рунда разговори, со цел да се најде привремено решение за луѓето засегнати од одлуката на Централната банка на Косово да го укине динарот.
Американскиот Конгрес на 20 април ќе гласа за помошта за Украина и Израел
Претставничкиот дом на САД на 20 април ќе го одржи долгоочекуваното гласање за помош на Украина, Израел и Индо-Пацификот, изјави претседавачот Мајк Џонсон.
Гласањето е по повеќе од два месеци откако пакетот беше одобрен во Сенатот.
Надлежниот комитет претстави закон што ќе обезбеди 60,84 милијарди долари за Украина и регионалните партнери, од кои 23,2 милијарди долари ќе бидат искористени за обнова на резервите американско оружје и објектите.
Поддршката за Израел изнесува вкупно 26,38 милијарди долари, вклучително и средства за покривање на трошоците за американските воени операции како одговор на неодамнешните напади.
Средствата наменети за Индо-пацификот изнесуваат 8,12 милијарди долари.
Грузискиот парламент го одобри првото читање на контроверзниот закон за „странски агенти“
Грузискиот парламент го одобри првото читање на контроверзниот нацрт-закон за „странски агенти“ што владејачката партија го протурка низ законодавниот дом и покрај предупредувањата од Западот и лутите протести од Грузијците кои го нарекуваат предлог-законот копија на рускиот закон за странски агенти што Москва го користеше со години за да го притисне несогласувањето.
Водачите на неколку опозициски партии го напуштија парламентот во знак на протест против нацрт-законот пред гласањето на 17 април, на кое 83 пратеници го поддржаа законот, додека немаше гласови против. За финалното читање на законот е предвидено да се расправа на 17 мај.
Стотици демонстранти се собраа пред зградата додека пратениците го одржаа гласањето барајќи од властите да го отфрлат предлог-законот кој ќе ги принуди ентитетите финансирани од странство да се регистрираат како странски агенти, потег што многумина го споредуваат со слична легислатива спроведена во Русија што е искористена за строго ограничување на несогласувањето и активноста на групите на граѓанското општество.
Законот, кој предизвика масовни протести кога првпат беше воведен минатата година, исто така ќе воведе широки надзорни овластувања од страна на властите и потенцијални кривични санкции за недефинирани кривични дела.
Грузискиот претседател Саломе Зурабишвили, пак, изјави за Би-Би-Си дека ќе стави вето на контроверзниот предлог-закон доколку биде одобрен во неговото последно читање.
Зурабишвили рече дека нејзина главна грижа е фактот што предметниот предлог-закон е „точно копија на законот на Путин“.
Сепак, Зурабишвили рече дека владејачката партија Грузиски сон има доволно пратеници за да ја поништат доколку го искористи своето вето.
Високиот претставник на ЕУ Џозеф Борел и комесарот за соседство и проширување Оливер Верхеји дадоа заедничка изјава непосредно по првото читање, нарекувајќи го потегот на пратениците „многу загрижувачки развој“ кој може „негативно да влијае на напредокот на Грузија на нејзиниот пат кон ЕУ“ доколку биде одобрен во закон.
Во Србија е приведен заменик директор на косовска полиција
Заменик директорот на косовската полиција од српска националност Дејан Јанковиќ е уапсен од српските власти, напиша на социјалната мрежа Х, Јетон Зулфај, советник на премиерот на Косово, Албин Курти.
Врз основа на информации од косовските безбедносни институции, Јанковиќ бил приведен на граничниот премин со Србија Јариње на северот на Косово и бил однесен на разговор во Рашка (град во Србија).
Јанковиќ е од општината Штрпце, една од шесте општини со српско мнозинство јужно од Ибар.
Ова не е првпат во Србија да бидат приведени или уапсени припадници на српската заедница од Косово кои учествуваат во косовските институции или не се блиски до Српската листа, која има поддршка од владејачката Српска напредна партија во Србија.
Зуљфај напиша и дека српските власти иницирале „масовни апсења“ откако Парламентарното собрание на Советот на Европа препорача членство на Косово во таа меѓународна организација и дека „сите се во заложништво“.
Министерството за надворешни работи на Косово претходно соопшти дека српските власти запреле автобуси од Косово кои транзитирале низ Србија и кои се движеле кон Косово.
Меѓутоа, Министерството за внатрешни работи на Србија на 17 април соопшти дека наводите за приведувањето на автобусот се „неосновани“ и дека полицијата „никого не привела ниту спречила влез и премин на ниту еден граѓанин“ од територијата на Косово.
Пред два дена претседателот на Србија најави апсење на Албанци кои го нарушуваат уставниот поредок на Србија, а откако косовската полиција на 13 април го уапси Среќко Софронијевиќ за кршење на уставниот поредок на Косово на протестите во Звечан и Северна Митровица во 2021 година, при акција против шверц на стока.
Нетанјаху вели дека Израел сам ќе одлучи како да се брани
Израел ќе донесе свои одлуки за тоа како да се брани, изјави во средата израелскиот премиер Бенјамин Нетанјаху, додека западните земји повторно го повикаа да се воздржи од одмазда против Иран.
Соединетите држави, Европската унија и групата Г7 најавија дека размислуваат за построги санкции против Иран, кои според нив ќе бидат воведени за да се смири Израел и да се убеди да не одговори на ирански напад.
На 13 април, Техеран лансираше стотици беспилотни летала и проектили кон Израел, извршувајќи го својот прв директен напад врз својот непријател.
Нетанјаху се состана со британскиот министер за надворешни работи Дејвид Камерон и германската министерка за надворешни работи Аналена Баербок, кои го посетија Израел во средата во обид да спречи ескалација на тензиите меѓу Израел и Иран.
Кабинетот на Нетанјаху соопшти дека тој им се заблагодарил на Камерон и на Баербок за нивната поддршка, пред да им каже: „Сакам да бидам јасен - ние самите донесуваме одлуки и државата Израел ќе направи се што е потребно за да се заштити“.
Претходно, Камерон рече дека е јасно дека Израел планира да возврати на иранскиот напад, кој Техеран го изврши како одговор на нападот во кој загинаа воени претставници во иранскиот конзулат во Сирија, за кој Иран го обвинува Израел.
По повеќе од шест месеци војна во Појасот Газа меѓу Израел и Хамас, што ги зголеми тензиите на Блискиот Исток, дипломатите бараат начини да избегнат директна војна меѓу Израел и Иран.
Повеќето од иранските беспилотни летала и проектили истрелани кон Израел во саботата беа соборени, а немаше жртви.
Израел вели дека мора да возврати за да го задржи кредибилитетот на својата одбрана. Иран, пак, вели дека прашањето е затворено, но дека ќе возврати доколку Израел го нападне.
Мултимедија
Најпосетени
Што треба да знаете