Достапни линкови

Што бара ДУИ, што ветуваше СДСМ?


Архивска фотографија-претседателот на СДСМ Зоран Заев во обраќање пред владата на изборната ноќ, Скопје,11.12.2016
Архивска фотографија-претседателот на СДСМ Зоран Заев во обраќање пред владата на изборната ноќ, Скопје,11.12.2016

Од партиите не откриваат многу за тоа до каде се преговорите за формирање мнозинство. Аналитичарите оценуваат дека нема многу големи разлики, но и дека ѓаволот е во деталите.

Повеќе од два месеца по изборите без влада и без транспарентни информации во јавноста што се случува во преговорите за формирање мнозинство, пред се меѓу СДСМ и ДУИ. Во тек се внатрепартиски консултации, кратко одговараат од СДСМ на прашањето дали доставиле писмени материјали до ДУИ, како што јавно побара претседателот на партијата Али Ахмети.

Навидум не изгледа дека има многу спорни прашања меѓу двете страни, но сепак ѓаволот е во деталите, вели политичкиот аналитичар Алберт Муслиу.

Употреба на албанскиот јазик

Од партијата на Заев се молчаливи за тоа што е прифатливо за нив од барањата на трите партии на Албанците, постојано повторувајќи дека ќе кажат од како ќе го добијат мандатот. По средбата со еврокомесарот Јоханес Хан, Заев изјави и дека е отворен за преговори, но оти и тие имаат црвени линии.

“Уставот на Република Македонија треба да утврди дека “македонскиот јазик и неговото кирилско писмо и албанскиот јазик со неговото писмо се официјални јазици во Република Македонија”, пишува во изјавата што ја потпишаа Беса, ДУИ и Алијансата за Албанците.

Ова, според досегашните изјави на Заев и изборната програма на СДСМ, не би требало да биде прифатливо за партијата.

„Ниту Устав ќе се менува, ниту има потреба од промена на некои законски решенија. Постојниот Устав и постојниот закон дава можност за практична реализација на потребите на граѓаните од овој аспект“ тврдеше Заев пред изборите.

Сите барања од платформата кои предвидуваат промена на Устав не зависат од СДСМ, туку од сите фактори оти за нив е потребно двотретинско мнозинство, вели Муслиу.

„Општо не гледам прашања што би биле суштински проблематични за двете страни, но секако треба да се покаже добра волја и одлучност за тоа да се сработи“ вели Муслиу.

Локална самоуправа

Во однос на зголемената моќ на општините платформата не е многу конкретна, па во неа се бара создавање на нов механизам, во форма на една Државна комисија за финансирање на општините, за донесување одлуки со право за владини грантови во корист на општините.

СДСМ во програмата, пак, ветува дека на општините ќе им бидат пренесени сите надлежности што може да ги извршуваат поуспешно односно дел од управните функции на МВР, дел од надлежностите на полицијата, јавен ред и мир и регулирање на сообраќајот на локалните патишта и улица, итна медицинска помош, социјална заштита, центри за вработување, децентрализирање на установите од областа на културата, управување со земјоделското земјиште, шумите и пасиштата.

Судство

Целосно расчистување на прашањата и судските постапки како “Сопот”, “Бродец”, “Монструм” и “Куманово” преку една анкетна комисија или меѓународен независен орган, бараат потписниците на платформата. СДСМ пак ветува обесштетување на жртвите на монтираните политички случаи. Во однос на Специјалното јавно обвинителство нема разлики - и двете страни ветуваат поддршка.​


Неотворени прашања

Во платформата на албанските партии има и прашања кои СДСМ не ги спомена досега така што не се знае како би се поставила партијата во однос на нив. Меѓу таквите теми спаѓаат сеопфатна дебата за знамето, химната и државниот грб, усвојување на Резолуција во Собранието со која се осудува геноцидот врз албанскиот народ во Македонија во периодот 1912-1956, формирање на Министерство за политички систем и односи меѓу заедниците , вклучување на Албанците во работните групи за директни преговори со Грција и со Бугарија.

  • 16x9 Image

    Фросина Димеска

    Родена е 1980 година во Скопје. Со новинарство се занимава од 2004 година кога почнува да работи како постојан дописник на Радио Слободна Европа од Скопје.
    Во периодот од 2008 година до почетокот на 2014 година работи прво како новинар во телевизијата Алсат М а потоа во дневниот весник Нова Македонија.

XS
SM
MD
LG