Достапни линкови

Обама во прошталниот говор ја нагласи моќта на САД


Американскиот претседател Барак Обама во прошталниот говор изјави дека ја остава замјата посилна од порано, но оти Американците мора да работат да ги надминат поделбите што се закануваат да го замрсат американското единство.

Обама како најголеми постигнувања ги посочи неговиот нуклеарен договор со Иран, отворањето кон Куба и заживувањето на американската економија.

Според неговата оценка, тој постигнал повеќе за време на неговиот осум годишен мандат отколку што и неговите поддржувачи мислеле дека е можно.

„Според скоро секоја мерка, Америка е подобро и посилно место од тогаш кога започнавме. Остануваме најбогата, најмоќна и најпочитувана земја“, рече Обама.

Тој исто така наведе што според него се најсериозни закани на кои треба да работат идните претседатели и граѓаните.

Обама оцени дека растечкото одбивање на имигрантите претставува закана, потенцирајќи дека Америка од нејзиниот почеток била земја на имигранти.

Притоа тој посочи дека економската и културната сила потекнува од мешањето на раси и националности во Америка.

„Нашата младост и носечка сила, нашата различност и отвореност, нашиот безграничен капацитет за ризик и повторно откривање значат дека иднината треба да биде наша. Но, таквиот потенцијал ќе го оствариме само ако функционира нашата демократија“, рече американскиот претседател.

Обама додаде дека растечката нееднаквост, демографските промени и тероризмот и се закануваат на американската демократија која, како што рече, „бара основно чувство на солидарност, односно дека сите сме заедно и се креваме или паѓаме како еден“.

Тој побара поголема работа во надминување на поделбите, изолацијата и дискриминацијата на оние што, како што рече, изгледаат и мислат поинаку од другите.

„Ја отфрлам дискриминацијата против американските муслимани кои се патриоти исто како и ние“, рече Обама.

Според него, внтарешните поделби на општеството претставуваат исто толку голема закана како надворешните опасности од терористите и диктаторите во светот.

„Значи ајде да бидеме претпазливи, но не и да се плашиме. ИД ќе се обидува да убива невини луѓе. Но, тие не ќе можат да ја поразат Америка се додека не ги предадеме нашиот Устав и нашите принципи во борбата. Ривалите како Русија или Кина не можат да се рамнат со нашето влијание во светот се додека ние не се откажеме од она зад што стоиме и да се претвориме во уште една земја која ги застрашува помалите соседи“, изјави Обама во прошталниот говор одржан во Чикаго.

  • 16x9 Image

    Гоце Атанасов

    Со новинарство започна да се занимава за време на студиите по новинарство во Скопје. Работел во Млад борец, Нова Македонија, Македонската радио телевизија, А1 телевизијата и во Дојче Веле, а во Радио Слободна Европа е од започнувањето на емитувањето на македонски јазик.

XS
SM
MD
LG