Она што првично беше само ентузијастичка идеја на неколкумина вљубеници во џезот и нивна заложба за поинакво урбано културно живеење во својот град, без нималку двојба, за само половина декада израснува во поширока придобивка. Прилеп, а со тоа и Република Македонија, добија концепциски здрав и квалитетен џез фестивал кој се издига над обичноста на уште едно културно случување и станува сцена на која својата умешност и виртуозност ја пројавуваат несомнено квалитетните имиња од Балканот. Музичари чии идеи и импровизации нималку не трпат огради и кои на тој начин стануваат незаобиколиви чинители на глобалната звучна слика и океанот од поетики.
А, во дослух со традицијата и грижата за нашето музичко наследство не случајно на првата вечер на Интернационален Прилеп џез викенд,се најде Биг Бенд-от на МРТВ, оркестарот кој е формиран во далечната 1961 година со легендарниот Драган Ѓаконовски Шпато како негов прв диригент. Биг Бенд-от со децении наназад претставува вистински стожер на македонската забавна и џез музика, а во последниве неколку години по реобновувањето се обидува, покрај класичната оркестарска џез литература, да донесе и нови свежи аранжмани на современи теми и авторски композиции на неговите солисти.
Со него, по Џамбазов, Костов и други, од 2013 година раководи Љупчо Мирковски, трубач и плоден автор на инструментална, забавна, театарска и џез музика.
Хашима е белградски состав кој соединува повеќе поранешни музички искуства и твори звучни слики кои е тешко да се категоризираат. За она што го потпишуваат гитаристот Игор Мишковиќ, Вања Тодоровиќ на контрабас, Аександар Христиќ на тапани и тенор сакасафонистот Срѓан Мијалковиќ, Томас Конрад, американски новинар и критичар, во „Џез тајмс“ ќе забележи: „Хашима е необичен спој на класицизмот со елементи на балканскиот фолклор, авангардната бучава и лиризам.
Бендот деби албумот „Tideland“ го промовираше на минатогодишното издание на Белградскиот џез фестивал, а потем рецензии за него се појавија и во „Њујорк сити џез рикордс“ и во лондонсиот „Џез вајс“.
Костас Теодору или, ако милувате Дине Донев, како што е неговото македонско име и презиме, е еден од неколкумината балкански творци кој со оградите раскрстил од раните 1980-ти од кога е активен на грчката музичка сцена. До 1990-те работел како аранжер и водач на ансамбли, продуцирајќи и снимајќи музика од истакнати грчки композитори. Напоредно патувал и снимал сопствени творби. Во 2001 година станал член на Примавера ен Салонико и соработувал со прочуената Савина Јанату.
Своите таленти ги распостилал и во театарот и на филмот, а во Македонија познати се неговите соработки со музичари како Тони Китановски, Александар Секуловски, Васил Хаџиманов...
Исклучителниот автор, басист и перкусионист во Прилеп доаѓа со Лост антрополоџи во кој се и Антонис Анисегос на пијано, Киракис Тапакос на уд и Стаматис Пасополус на хармоника.
ЧУИ, пак, е хрватско трио кое ги вкрстува современата клупска музика со џез и електроника и го претпочита бескомпромисниот рокенрол пристап. Тони Старешениќ ( клавијатури, елкетроника), Војкан Јоциќ ( саксафон, електроника) и Јанко Новоселиќ ( тапани), зад себе имаат ри одлични албумски објави ( „Dancing Bear“, „The Second Arrival“ и „Third Sun From Stone“) и силна потреба за нови предизвици.
А, точка на долгата петочна ноќ, со својот еклектичен диџејски сет, ќе стави радиоводителот, промотер, издавач, музички критичар ...Костадин Шурбановски – Шурбе, кој сцената ја делел со имиња како Ел-ти-џи Букем, Јан Пули, Џајлс Петерсон, Џазанова, КУП...и кој, патем, е чест гостина на Фестивалот.
Од друга страна почетокот на третата фестивалска вечер е предвидено да им припадне на Ансамбл Франц Кафак, шесточлениот ансамбл составен од музичари кои своите визии и лудило ги имаат во слоеви наслагано во бендови како Кил-де-сак ( лани буквално растурија), Пич пит, Хаустор, Порто Морто, Џинкс...
Својата несекојдневна звучна понуда ја потпираат на афро-битот, современиот џез и мат-рок...сето тоа обвиткано со филм-ноар атмосфера, а тој микс „луцидно, прецизно и шеговито го нарекуваат циркус-ноар жанр“.
По нив, со специјално подготвен сет и со своите верни придружници Ѓоле Максимовски на бас и Дино Милосављевиќ на тапани, на сцената во родниот Прилеп ќе се искачи гитарскиот маг Влатко Стефановски, чие шоу несомнено ќе предизвика најголемо внимание кај широката публика и ќе ја збогати звучноста на манифестацијата.
И, конечно официјалната програма ќе биде заокружена со медитативниот проект „Хиџаз 3“ на виртуозот на канун и саз м-р Џенгис Ибрахим. Големиот музичар, теоретичар и педагог, во третата потрага и чествување на древната музика и нејзината синтеза со денешницата, како свои собеседници ќе ги има Петар Христов на кларинет, Зоран Павловски на бас и вокалистката Ана Митоска.
Инаку, не треба да се заборави дека Интернационален Прилеп џез викенд 2016 ќе биде најавен со концертот на младите и агресивни Фирс, оваа среда на 24 август во 21 часот, а во рамките на оф-програмата, точно напладне, во џез клубот „Тејк-фајв“ ќе свири и тромбонистот, пијанист и композитор Филип Стевановски со своето трио.
