Достапни линкови

Со намалувањето на кредитниот рејтинг на Македонија од агенцијата Фич, секое ново позајмување на странските пазари ќе биде со поголеми камати од досегашните.

По последното вреднување на рејтингот на Македонија од агенцијата Фич, извесно е дека во наредниот период уште повеќе ќе поскапи позајмувањето пари од меѓународните пазари, велат економистите и додаваат дека ова ќе има последици врз економијата и врз граѓаните.

Поранешниот гувернер на Народната банка Петар Гошев потсетува дека поскапувањето на кредитите за Македонија започнало уште минатата година и оценува оти тоа е резултат на постојаното зголемување на јавниот долг и политичката криза. Исто така и економскиот раст во првиот дел од годинава падна за половина од проектираното, укажува Гошев и додава дека тоа е дополнителен ризик кој го проценуваат агенциите, а оти тоа значи натамошно зголемување на трошоците на Македонија за позајмување од надвор.

„И штом се поскапи кредитите, трошоците за економијата се поголеми и тие негативно ќе се одразат во сукцесивен период што ќе следи, врз економскиот раст и врз стандардот на граѓаните, сето тоа поврзано во еден комплетен економски циклус. Македонија ќе треба да плати многу повеќе за да добие исти износи на позајмени средства. Истовремено тоа е сигнал за недобри состојби и тоа ќе влијае и врз потенцијалните инвеститори“, вели тој.

Гошев посочува дека постои реална опасност во наредниот период во Македнија да има уште побавна стапка на економски раст и побавно подобрување на животниот стандард и негово стагнирање или намалување ако ваквиот тренд продолжи.

Зоран Витанов вели дека граѓаните најмногу треба да бидат загрижени од рангирањето на агенцијата Фич и оти тие ќе плаќаат поголеми камати. Според неговите зборови, со намалување на кредитниот рејтинг од ББ+ на ББ, Македонија покажала дека е неликвидна, но исто така дека не може да ги покрива трошоците.

„Владата само купува време додека е на власт, затоа што друг ќе ги плаќа тие долгови. Но, тој друг се граѓаните. Нека размислат граѓаните во чие име се задолжува владата и кој ќе ги отплаќа тие долгови и нека погледнат што случува во Грција“, вели тој.

Витанов подвлекува дека големата задолженост претставува реална закана за државата и нејзината економија. Тој вели дека не е чесно да се очекува оти државата нема да банкротира доколку владата веднаш не направи мораториум за задолжувањата. Тој додава дека треба да се скратат и непродуктивните трошења и оти државата треба да инвестира во енергетиката.

„И ако веќе правиме ребаланс, а не направиме за Чебрен и Галиште, ние сме изгубен случај, ние сме банкротирано претпријатие. Македонија има огромен енергетски потенцијал, а ништо не правиме“, вели тој.

  • 16x9 Image

    Мирјана Спасовска

    Родена е во Скопје 1971 година. Од 1996 та година работи во телевизиската кука А1. Од 1998 та година е во телевизијата Телма каде за централно информативната емисија известува за дневни социјално - општествени теми.  Во Радио Слободна Европа е од 2002 та година.  

XS
SM
MD
LG