Достапни линкови

Ново чешлање на избирачкиот список


Седница на Државната изборна комисија
Седница на Државната изборна комисија

Во ДИК велат дека работат на создавање услови за средба на работната група на избирачкиот список. СДСМ вели дека тој не е прочистен, ВМРО-ДПМНЕ подготвени списокот да се прочистува по „терк на СДСМ“.

Во тек се активности за создавање услови за средба на работната група за избирачкиот список составена од политичките партии, меѓународната заедница и невладиниот сектор, како и надлежните институции вклучени во процесот, велат од ДИК. Според нив, има шанси работната група да се состане и да продолжи со работа. Субхи Јакупи од комисијата вчера изјави дека доколку е потребно, ДИК уште еднаш ќе направи проверка на Избирачкиот список и оти се подготвени да ги разгледаат сите забелешки од партиите за да добијат точни насоки.

Една од причините за кои запнаа преговорите меѓу политичките партии е токму прочистувањето на Избирачкиот список. Од СДСМ велат дека не добиле покана од ДИК за евентуална средба и затоа е прерано да се коментира дали евентуално би учествувале. Според партијата, бараат тоа што е спорно и што e утврдено со проверката на базите на податоци, теренската и административна проверка да биде прочистено.

„Оние за кои било утврдено дека немаат право да гласаат, да бидат избришани од Избирачкиот список, а оние гласачи кои живеат во странство да бидат ставени на посебен извод. Бараме да биде сменето она што ДИК, по пат на политичко насилие и незаконски одлуки, го донесе“, велат од СДСМ.

Во ВМРО-ДПМНЕ, се повикуваат на изјавата на лидерот на партијата Никола Груевски, кој порача дека ДИК треба да направи проверка на гласачите по терк на СДСМ.

„Таква согласност се подготвени да дадат и членовите на ВМРО-ДПМНЕ во комисијата, но најпрвин од СДСМ треба да кажат што е проблемот во Избирачкиот список и како тој да се реши“, велат од владејачката партија.

Од таму посочуваат дека за нив Избирачкиот список не е спорен и затоа на потег е опозицијата. Од опозициската партија одамна тврдат дека избирачкиот список не е прочистен и сè додека тоа не биде спроведено нема да учествуваат на изборите. Вчера и двете партии, и СДСМ и ВМРО-ДПМНЕ, соопштија дека нема најава за придвижување на преговорите и одржување на нова лидерска средба.

  • 16x9 Image

    Марија Митевска

    Новинарската кариера ја започна во 2008 година во А1 телевизија како репортер во информативната програма.  Родена е на 14.04 1984 година во Скопје. Од мај 2009-та работи како постојан дописник за Радио Слободна Европа од Скопје.

XS
SM
MD
LG