Достапни линкови

И во роденденскиот говор, Груевски, во стил на лидер без демократски капацитет, продолжи со оцрнување на сите кои не мислат како него, но тој нема да поттикне сценарио „народ против нарoд“.

Блед говор без идеја на човек кој не знае како да ја извлече Македонија од криза. Вака со една реченица професорот Никола Дујовски го опишува обраќањето на претседателот на ВМРО-ДПМНЕ Никола Груевски на прославата на 26 партиски роденден.

Наместо да понуди идеи како да се надмине кризата, тој уште повеќе ја продлабочува што значи дека не е свесен во каква ситуација е, смета професорот.

„Тој всушност само ја следи политиката на која што, претпоставувам, самиот е креатор, на оцрнување на сè во оваa општество што не размислува како претседателот на ВМРО-ДПМНЕ. Не гледам дека може да промени што било и дека со овој говор ќе ги поттикне неговите поддржувачи да излезат на улица наспроти другите кои не се воопшто за потценување“, вели Дујовски кој е убеден дека немало да се случи сценарио народ против народ.

Според Жанета Трајкоска од Институтот за комуникациски студии говорот на Груевски е говор на неодговорен политичар.

„Ваков начин на говор и вакви јавни обраќања на големи настани, како што е роденденот на неговата партија, употребуваат политичари кои имаат недостаток на демократски капацитет, кои се авторитарни и кои го гледаат народот како свое членство, но не и народ кој е различен и има плурализам на мислења“.

Груевски вчера рече дека сè повеќе како претседател на ВМРО-ДПМНЕ бил под притисок на илјадници граѓани кои на различен начин го контактираале барајќи поддршка за поодлучна народна акција. Овој дел од говорот наиде на аплауз кај насобраните и извикување „Никола, Никола“.

„Дека ако вака продолжат, колку и јас и моите соработници да сме толерантни и наколонети кон решавање на проблемите преку дијалози, демократски методи, нема да можам да ја држам ситуацијата под контрола, дека народот врие и дека во еден момент може да му дојде преку глава и да влеземе во нова фаза, која нема да е добра за земјата, а најмалку за оние кои глумат некакви револуционери за дебели пари и за туѓи интереси“, рече Груевски.

Тој го критикуваше и Специјалното јавно обвинителство нагласувајќи дека отвораат празни истраги без елементарни докази и дека вршеле притисок врз Судот. Според Трајкоска ваквото однесување е како што вели и лицемерно, бидејќи партискиот врв седи и преговара со меѓународниот фактор и за реализирање на пржинскиот договор чиј производ е обвинителството.

  • 16x9 Image

    Фросина Димеска

    Родена е 1980 година во Скопје. Со новинарство се занимава од 2004 година кога почнува да работи како постојан дописник на Радио Слободна Европа од Скопје.
    Во периодот од 2008 година до почетокот на 2014 година работи прво како новинар во телевизијата Алсат М а потоа во дневниот весник Нова Македонија.

XS
SM
MD
LG