Достапни линкови

Два протести во Скопје - Илјадници луѓе на улиците


Граѓаните револтирани поради одлуката за аболиција што ја донесе претседателот Ѓорге Иванов веќе четврти ден протестираат. Денеска тие протестираа на неколку локации, а протестот заврши пред Влада. Истовремено имаше и протест пред седиштето на СДСМ.

Неколку илјади демонстранти вечерва успеаа да стигнат пред зградата на Владата откако беа блокирани прво пред Собранието, потоа на Камениот мост, па на крај во близина на Владата. Но полицискиот кордон потоа се повлече и демонстрантите стигнаа до таму, каде што извикуваа „Готово е Никола „ „Николче диктаторче“.

Граѓаните почнаа да се собираат во 18 часот пред просториите на Специјалното јавно обвинителство, а потоа заминаа кон Собранието каде што беа спречени од полициски кордон во близина на Порта Македонија. Таму извикуваа „наше е Собранието“, а во портата завршија и јајца и боја.

Од таму се обидоа да преминат и преку Камениот мост, но исто така беа спречени од полицијата, а бројот на насобрани почна да се зголемува. Иако имаше обиди дел од насобраните да фрлаат кон полицијата поголемиот дел од демонстрантите ги спречи во таквата намера.

Речиси истовремено зад трговскиот центар Рамстор почнаа да се собираат приврзаниците на владејачката партија во организација на ГДОМ. Со автобуси и комбиња од цела Македонија беа донесени на собирното место. Потоа со зурли и тапани, македонски народни песни и извици „Никој ништо не ти може, Никола“, неколку илјади луѓе, пристигнаа пред седиштето на СДСМ.

Полицискиот кордон беше поставен на крстосницата на улицата, на стотина метри од седиштето на опозициската партија, но демонстрантите не се ни обидоа да го поминат. Велат дека протестираат против аболицирањето на лидерот на СДСМ Зоран Заев и поранешениот прв разузнавач Зоран Верушевски, како и против, како што велат, обидите на СДСМ за растурање на Македонија.

Скопје цел ден под полициска блокада

Скопје уште од рано попладнето беше под силно полициско обезбедување и речиси целиот центар на градот беше блокиран.

Ова е четврта ноќ протести по одлуката на Иванов да ги аболицира сите вклучени во аферите Пуч и Прислушување. Демонстрантите во организација на некои движења и невладини организации бараат оставка од него, повлекување на аболицијата и поништување на одлуката за избори на петти јуни кои денеска претседателот на собранието Трајко Вељаноски и официјално ги распиша.

Контрадемонстрантите, пак се противат на политичките помилувања само на Заев и на Верушевски и порачуваат дека СДСМ се спасил од судот, но не и од народот. Тие велат дека ја поздравуваат ваквата одлука и даваат поддршка за одржување на избори на 5-ти јуни. Министерството за внатрешни работи неколку дена ги дели двете групи со силно полициско обезбедување.

Иванов останува на одлуката

Но и покрај жестоките реакции на голем дел граѓани што ги предизвика Иванов со аболицијата тој и денеска повтори дека останувал на својата одлука. Пред три дена донесов одлука која е исклучиво во интерес на државата и на граѓаните на Република Македонија и по сите реакции, како и тогаш, така и сега, цврсто сум убеден дека таквата одлука ќе помогне за надминување на политичката криза и намалување на тензиите меѓу политичките противници, рече тој.

„Останувам на одлуката. Уште еднаш повторувам, секој оној кој смета дека сум му одземал право, сторил лоша услуга и својата невиност сака да ја докаже на суд, го повикувам лично во писмена форма да поднесе барање за поништување на одлуката која се однесува на него. Кога ќе ги добијам таквите барања, ќе повикам правни експерти да понудат можно правно решение. И политичките партии можат со свои правни експерти да се вклучат во овој процес, потенцира шефот на државата”, рече Иванов.

Претходно ВМРО-ДПМНЕ до него упати писмено барање за како што беше наведено дда ја преиспита одлуката за прекинување на постапката за политичари од власта и од опозицијата.

И претседателот на СДСМ Зоран Заев упати писмо до Иванов наведувајќи дека имал причини без број да ја укинел како што рече таа срамна одлука којашто го урнисала уставот и законите во Република Македонија.

„Тоа го правиме континуирано и денеска го направивме на писмено. Дури го упатив на сите правни детали, согласно нашите правни тимови коишто ги знаат сите детали. Се повикува на закон од 1993-та година и член 11 што е укинат и не постои. Го упативме и го потсетивме дека ваква техничка грешка еднаш направил укинувајќи го актот за помилување на господинот Ламбе Арнаудов. Но, сега и покрај техничка има и суштествена грешката. Има причини без број да ја укине оваа срамна одлука“, рече Заев.

Инаку Заев претходно се сретна и со претседателот на ДУИ Али Ахмети кој исто така се потпиша на иницијативата за барање на одговорност од Иванов. Писмено барање до него за поништување на аболицијата поднесе и поранешниот претседател Бранко Црвенковски.

  • 16x9 Image

    Фросина Димеска

    Родена е 1980 година во Скопје. Со новинарство се занимава од 2004 година кога почнува да работи како постојан дописник на Радио Слободна Европа од Скопје.
    Во периодот од 2008 година до почетокот на 2014 година работи прво како новинар во телевизијата Алсат М а потоа во дневниот весник Нова Македонија.

Покажи ги коментарите

XS
SM
MD
LG