Достапни линкови

logo-print

Мигрантите ќе се регистрираат и на Балканот


ЕУ ја разгледува можноста за дополнителни центри во балканските земји кои не се членки на Унијата за проверка на барањата за азил од десетиците илјади мигранти кои од Грција одат на север. Брисел страхува дека некои членки на Унијата не ќе можат да го издржат големиот мигрантски прилив.

Министрите за внатрешни работи на Европската унија на состанокот во Брисел решија значително да ги заштитат надворешните граници на Унијата со јакнење на граничните контроли и со воспоставување контролни точки во Италија и Грција.

Таму ќе биде утврдувано кои се бегалци од војните, а кои се мигранти кои можат или не можат да добијат азил.

Со цел да биде запрен се поголемиот и неиздржлив мигрантски прилив министрите ја разгледале и можноста илјадниците мигрантите кои дневно пристигнуваат во Грција и кои главно недокументирани излегуваат од таа земја да бидат проверувани во дополнителни центри на Балканот.

Жан Аселборн, шефот на дипломатијата на Луксембург, кој претседава со Унијата предупреди дека некои земји не можат да го издржат бегалскиот бран.

Навистина е илузија и е невозможно да се бара од една земја, особено од Грција, да прима 10 илјади луѓе на ден и при тоа да се врши скрининг, да се земаат отпечатоци, да се слушаат животните приказни на овие луѓе и да се донесе одлука што е многу важна за нивниот живот.

„Навистина е илузија и е невозможно да се бара од една земја, особено од Грција, да прима 10 илјади луѓе на ден и при тоа да се врши скрининг, да се земаат отпечатоци, да се слушаат животните приказни на овие луѓе и да се донесе одлука што е многу важна за нивниот живот“, рече Аселборн.

Според него, концептот се уште треба да се утврдува, но во овие центри по должината на балканската рута низ која минуваат мигрантите ќе треба да се врши и процесот на испитување на валидноста на барањата за азил, односно за враќање на мигрантите.

Ако луѓето, вклучувајќи ги и сириските бегалци и Азијците што бараат работа во богатата Европа, продолжат да заминуваат на север од Грција, тоа ќе значи и делумен неуспех на планот на Брисел да и помогне на Атина да се справи со мигрантите во согласност со правилото дека барањата за азил треба да се разгледуваат во првата земја од Европската унија во која тие влегуваат.

Но, европските дипломати велат воспоставувањето дополнителни центри било мотивирано поради тоа што Германија, Шведска и другите богати европски земји велат дека повеќе немаат место за прием на бегалците.

Постои стравување дека, со доаѓањето на зимата, бегалците ќе се најдат блокирани во сиромашните балканските земји во студено време што само ќе ја влоши хуманитарна криза.

Во овие центри би работел персонал од Европската унија кој би вршел регистрација и идентификација, како и утврдување на тоа дали луѓето имаат право на азил во Европа. Оние што нема да ги исполнуваат условите ќе бидат депортирани од Европа.

Во минатиот месец, лидерите на ЕУ се согласија со балканските земји, меѓу кои и Србија и Македонија, за да се обезбеди сместување за 50 илјади луѓе.

Претставник на Унијата вчера изјави рече дека би можело да има преклопување меѓу ваквите места за засолнување со предложените центри за обработка на податоците на бегалците.

  • 16x9 Image

    Гоце Атанасов

    Со новинарство започна да се занимава за време на студиите по новинарство во Скопје. Работел во Млад борец, Нова Македонија, Македонската радио телевизија, А1 телевизијата и во Дојче Веле, а во Радио Слободна Европа е од започнувањето на емитувањето на македонски јазик.

XS
SM
MD
LG