Достапни линкови

logo-print

Се ближат избори, во игра меѓуетнички инциденти?


Архивска фотографија.

Архивска фотографија.

Национализмот е параноја поттикната од подли политичари. Тоа е најевтината карта на која се игра во Македонија пред избори или кога треба да се сврти вниманието од вистинските проблеми. Ова го велат луѓе, уметници, познавачи на македонските состојби.

Национализмот е најевтината карта на која политичарите играат во пресрет на секои избори, коментираат аналитичарите по меѓуетничките инциденти кои се случија изминатата недела. По нападите врз Албанци на плоштадот Македонија во Скопје, па потоа и на Македонци во близина на трговскиот центар Мавровка, во јавноста се појавија критики дека меѓуетничките инциденти се случуваат секогаш кога во земјава има некаква политички криза или во пресрет на избори.

Тие знаат дека ние обично сме народ, постојано тоа така го дефинирам, со врела крв, не само тука во Македонија, туку и на цел Балкан, и најлесно им е да играат на таа карта.

Музичарот Арбен Бени Шаќири, во интервју за Радио Слободна Европа што во целост ќе го емитуваме в недела, вели дека е убеден оти меѓуетничките инциденти се инструирани од политиката.

„Тие знаат дека ние обично сме народ, постојано тоа така го дефинирам, со врела крв, не само тука во Македонија, туку и на цел Балкан, и најлесно им е да играат на таа карта“, вели Шаќири.

Тоа политиката мошне го стимулира, тоа го видовме во овие неколку години дека мошне силно е стимулиран национализмот. Дури и кога го нема, дури и кога луѓето не сакаат да влезат во таа шема, тие наоѓаат начин да го стимулираат тој национализам.

Познатиот југословенски писател Данило Киш во својот есеј „За национализмот“ вели дека национализмот пред сè е параноја. Александар Цветкоски од невладината АГТИС од Прилеп вели дека токму политиката ја стимулира таа параноја. Тој потсетува дека во изминатите години националистичката реторика и меѓуетничките инциденти се засилувале секогаш кога се приближуваат избори.

„Ние сме параноични со самото тоа што немаме никаков развиен систем на самоидентификација на луѓето и им остануваат само неколку оски. Инаку, рекле дека патриотизмот е последното скривалиште на неранимајковците и обично луѓето кои немаат ништо друго, кои не можат ништо позитивно за себе да кажат обично се занимаваат со такви работи. Тоа политиката мошне го стимулира, тоа го видовме во овие неколку години дека мошне силно е стимулиран национализмот. Дури и кога го нема, дури и кога луѓето не сакаат да влезат во таа шема, тие наоѓаат начин да го стимулираат тој национализам“, вели Цветкоски.

Тепачката на скопското Кале, тепачките низ градските автобуси во главниот град, па дури и оштетувањето автомобили и палењето автобус во пресрет на локалните избори во 2013 година се само дел од меѓуетничките инциденти кои се случуваа, па стивнуваа во изминатите години. Дел од експертите и невладиниот сектор со години предупредуваат дека и покрај милионските кампањи за меѓуетничка толеранција, токму власта е таа која ги влошува меѓуетничките односи по потреба.

  • 16x9 Image

    Срѓан Стојанчов

    Новинарската кариера ја започна како новинар во внатрешно-политичката рубрика на дневниот весник Шпиц во 2008 година. Роден е на 27.10.1981г. во Скопје. Од февруари 2009 работи како постојан дописник за Радио Слободна Европа од Скопје.

XS
SM
MD
LG