Достапни линкови

Бомба на СДСМ: Местење подобни судии и обвинители


Премиерот Никола Груевски, директорот на УБК Сашо Мијалков и министерката за внатрешни работи Гордана Јанкулоска, заедно со поранешниот министер за правда Блерим Беџети и десната рака на Али Ахмети, Муса Џафери, ги влечеле сите конци во правосудниот систем, рече Заев.

Тројца луѓе, премиерот Никола Груевски, директорот на УБК Сашо Мијалков и министерката за внатрешни работи Гордана Јанкулоска го контролирале целосниот правосуден систем преку местење на свои партиски кадри за судии и јавни обвинители, тврди претседателот на СДСМ Зоран Заев. Тој на денешната прес-конференција на која ги презентира телефонските разговори на високи личности, рече и дека тоа тие го правеле во соработка со поранешниот министер за правда Блерим Беџети и Муса Џафери за кој Заев нагласи дека му бил десна рака на претседателот на ДУИ Али Ахмети.

Оваа тесна група на власт се пазарела, местела судии и обвинители по подобност, нарачувале судски пресуди за себе и за свои блиски, некои од нив готвеле дури и одмазднички планови за загорчувања живот на несервилните соработници.

„Оваа тесна група на власт се пазарела, местела судии и обвинители по подобност, нарачувале судски пресуди за себе и за свои блиски, некои од нив готвеле дури и одмазднички планови за загорчувања живот на несервилните соработници“, рече Заев.

Во еден од телефонските разговори пуштени денеска, Заев тврди дека се слушаат гласовите на Јанкулоска и Мијалков, а како што рече министерката од шефот на УБК барала ургенција МВР да го изгуби спорот на Врховен суд воден против некој човек.

Женски глас: Ќе ти пратам бројче, ама да знаеш што е работава. Да не се чудиш кога ќе ти го пратам и....

Машки глас: Да де, да. Прати ми бројче и ќе го изгубиме.

Женски глас: Оти он више знаеш, ги зел парите...

Машки глас: Не кажувај да добиеме, за губење лесна работа.

Женски глас: Не бе па ти, тој ги зел парите и мислам што и да е, и говедо да е, Македонец е, ранет у војната. И да не е ваква работа, а башка ни помага у Паланка ни помогна, кумановско ни помогна, со овие знаеш инвалиди, вакви-такви...

Машки глас: Кажи му ќе му завршиме работа и готово.

Женски глас: Супер, ти праќам бројче. Толку те барам јас.

Во друг телефонски разговор, пак, Заев вели дека Јанкулоска разговарала со претседателката на судскиот совет Александра Зафировска.

Прв женски глас: Да, да. Е вака сега. Денес ми се јави Сашо.

Втор женски глас: Мхм.

Прв женски глас: И ме прашуваше во врска со списоците за изборот на стручни.

Втор женски глас: Аха.

Прв женски глас: И, ми вика: од кај ти се списоците. Па викам: од таму од каде што беше договорено.

Втор женски глас: Од партија, да, да, да.

Прв женски глас: Иии, не, вика. Вика: зачекај. Вика: да видам јас. Ама викам: ја она што беше надвор, за Штип, за Битола, тоа си поделив.

Втор женски глас: Да де, да.

Прв женски глас: И му кажав, он ми... дел од нив више даваат решенија, дел постапката ја привршуваат, знаат што-како. Е сега остана проблемот за Скопје, за 1 и 2.

Втор женски глас: Така.

Прв женски глас: И за Апелација, и за...ваљда Лидија се побунила нешто.

Втор женски глас: Па најверојатно она, мислам со него има добра релација, ама не е страшно нека ги види, па можда и негде држи тоа што се побунила.

Од аудио снимката на која претседателот на СДСМ посочи дека се слушаат гласовите на Јанкулоска и министерот за финансии Зоран Ставрески се слуша како се разговара за поранешен вработен во Министерството за финансии кој аплицирал за работа во Апелациониот суд.

Машки глас: Види, овој копиљов од кај мене што ти кажував у Апелационен суд што аплицираше, инат тера. Значи не го повлекува од кај мене барањето, игра на картата за да изминат 30 дена пошто по автоматизам нели му следува решение...

Женски глас: Да де да.

Машки глас: ...од понеделник немало да оди на работа и ме изнервира право да ти кажам, сакам таму да му го загорчам животот. Можеш ли ти, по некоја партиска линија тоа да го направите? За да не бидам јас директно, да не дигам слушалка, него Стојче, или кој ти е таму да се јави таму и да рече: не може ова да се вработи, по партиски треба да биде вработувањето, и не ни е партиски.

Покрај овие, на прес-конференцијата беа пуштени и разговори на како што беше наведено Мијалков со кандидатки за судијки и други министри. Заев рече дека премиерот се однесувал како давеник што се фаќа за сламка и повторно најави дека ќе објават сè што имаат во согласност со нивната партиска проценка кога треба да се обелоденат одредени материјали.

  • 16x9 Image

    Фросина Димеска

    Родена е 1980 година во Скопје. Со новинарство се занимава од 2004 година кога почнува да работи како постојан дописник на Радио Слободна Европа од Скопје.
    Во периодот од 2008 година до почетокот на 2014 година работи прво како новинар во телевизијата Алсат М а потоа во дневниот весник Нова Македонија.

Покажи ги коментарите

XS
SM
MD
LG