Достапни линкови

Претседателот на СДСМ Зоран Заев, на денешната прес-конференција во партиското седиште, на која ја објави таканаречената седма бомба, објави, како што рече, докази за „изборните грабежи што ги прави премиерот Никола Груевски со неколкумина негови соработници“.

Во првиот сет од пет разговори, беа објавени разговорите меѓу, како што велат од СДСМ, министерката за внатрешни работи Гордана Јанкулоска со различни соговорници, потоа разговор за кои од СДСМ тврдат дека е меѓу премиерот Никола Груевски и министерот за транспорт и врски Миле Јанакиески, од кои може да се слушне како се правеле изборни нерегуларности.

„Имаме по 50 души во стан од 40 квадрати“, вели женскиот глас на една од снимките, за кој Заев тврди дека е министерката Јанкулоска.

Машкиот глас за кој се тврди дека е на Груевски за загубата во Центар вели:

„Да ни беа преспанците ќе завршевме работа во прв круг.“


Втор сет од 4 разговори зборува за притисоци врз фирми, потоа како како инспекциите на УЈП казнувале за да вршат притисоци, како се одземале лиценци за такси компани.

Третиот сет од три разговори, според Заев, ги докажуваат притисоците врз земјоделците.

Четвртиот сет од шест телефонски разговори, според Заев, ги покажуваат притисоците врз социјалните случаи кои ги координираат Јанакиески и Јанкулоска.

Во наредните четири разговори, според Заев, се разобличуваат притисоците врз администрацијата. Јанакиески им наложува на директорите да ги донесат вработените на гласање во Могила и Новаци, а и притисоци во Општина Центар.

„Треба да гласаат за нас и потврда да дадат дека гласале за нас. Со триаголниче да заокружат за да знаеме“, вели машки глас на една од снимките.

Во наредниот сет, според Заев, се покажува контролата врз медиумите.

Седмиот сет разговори го покажува, како што вели Заев, притисокот врз ДИК.

Последниот сет разговори што ги објави Заев се за различни злоупотреби на државата.

Инаку ова е седма т.н. бомба на опозицијата. Во понеделникот тие објавија единаесет телефонски разговори, како што велат, се меѓу министерката за внатрешни работи Гордана Јанкулоска и министерот за финансии Зоран Ставрески, од кои, како што рече Заев, се слуша за лошата економска состојба во која се наоѓа државава и за тоа како лично Груевски им издавал наредби на неговите министри да работат противзаконски и да прават нелогични буџетски трошења. Ставрески истиот ден оцени дека снимките биле нецелосни и со селективна природа и имале цел да внесат раздор во економскиот тим на Владата. И другите претставници на Владата, меѓу кои и премиерот Груевски досега не ја потврдија автентичноста на снимките туку нагласуваат дека е важно од каде му се тие на лидерот на опозицијата.

Покажи ги коментарите

XS
SM
MD
LG