Достапни линкови

Ден на жалост во Франција и потрага по терористите


Франција обединета против тероризмот. Полицијата спроведува акции во неколку градови во земјата, во потрага по осомничени исламисти.

Светот е шокиран од терористичкиот акт во Париз во кој најмалку 12 луѓе, меѓу кои двајца полицајци и најмалку четворица новинари, беа убиени вчера во канцелариите на францускиот сатиричен магазин Шарли Ебдо во Париз.

И денеска во јужен Париз имаше напад. Француската полицијата соопшти дека една полицајка почина откако беше застрелана во предградието. При овој напад е рането уште едно лице службеник на градските власти. Напаѓачот носел панцир и стрелал од автоматско оружје.

Францускиот министер за внатрешни работи изјавил дека напаѓачот е во бегство, а засега не е познато дали и овој напад е поврзан со вчерашниот.

Денеска напладне во Франција, со минута молчење им беше оддадена почит на убиените во вчерашниот напад во Париз. Неколкумина осомничени се уапсени, а терористичкиот чин ги зголеми тензиите во земјата со голема муслиманска популација.

Полицијата трага по Шериф Куачи, кој бил суден во 2008-ма за вмешаност во испраќање борци во Ирак, како и по неговиот брат Саид. Властите велат дека се вооружени и опасни. Француската полиција, го подигна нивото на готовност и врши истраги во неколку градови. Францускиот премиер Мануел Валс, по денешниот состанок во Елисејската палата, изјави:

„Имаме план за безбедност, работиме со нашите колеги од политичката сфера за да го гарантираме националното единство. Ја разбираме загриженоста на јавноста и интензивно ќе ја следиме ситуацијата.“

Во Елисејската Палата денеска се состанаа и поранешниот и сегашниот претседател на Франција, Никола Саркози и Франсоа Оланд. По средбата, Саркози изјави:

„Ова е прашање на цивилизацијата и бара цивилизирани луѓе, без оглед на нивната вера, да се обединат против овој фанатичен варваризам. На цивилизацијата и е објавена војна, па одговорност на цивилизацијата е да се брани и тоа е она што решивме да го правиме.“

Главните француски муслимански организации денеска ги повикаа сите имами во земјата, за време на утрешната петочна молитва во сите џамии, да ги осудат насилството и тероризмот. Муслиманските организации во Франција изразија шокираност и го осудија вчерашниот напад во Париз.

  • 16x9 Image

    Љупчо Наќев

    Работи во Радио Слободна Европа во Прага од започнувањето на емитувањето на програмата на Македонски јазик, како уредник и водител. Со новинарство се занимава од 1988-ма година, најнапред во Македонското радио, а потоа во А1 телевизија, како и повеќе години како постојан дописник на Радио Дојче Веле. 

XS
SM
MD
LG