Вести
Украина ги обвини сепаратистите дека се обидуваат да ги уништат доказите
Владата на Украина денеска ги обвини про-руските бунтовници дека се обидуваат да ги уништат доказите на местото на падот Малезискиот авион.Владата на оваа земја наведува дека про-руските бунтовници со помош на Русија се обидуваат да го уништат доказите на местото на несреќата на Малезискиот авион.
Украинската влада соопшти дека сепаратистите однелее 38 тела во мртовечница во Доњецк и оти се обидуваат да ги транспортираат остатоците на авионот.
Тимот на меѓународни набљудувачи потврди дека про руските сепаратисти им го ограничуваат пристапот до урнатиот авион.Портпаролот на Организацијата за европска безбедност и соработка рече дека местото на падот го контролираат вооружени мажи кои дури и пукаат во воздух. Претседателот на САД Барак Обама кажа дека постојат индиции оти леталото било погодено од ракета земја-воздух, лансирана од областа која е под контрола на руските сепаратисти.
види ги сите денешни вести
Претседателските кандидати со последни пораки пред првиот круг од изборите
Претседателските кандидати денеска (22 април) ги испратија последните пораки во пресрет на настапувањето на изборниот молк кој започнува вечерва на полноќ. Денот на гласањето во првиот круг од изборите е 24 април кога во 19 часот треба да се затворат гласачките места со што ќе заврши и молкот.
Кандидатот за претседател поддржан од СДСМ и коалицијата „За европска иднина“, Стево Пендаровски, кампањата за првиот круг ја заврши вечерва со митинг во Битола, а претходно имаше средби со граѓани во Демир Хисар и Ресен.
На нив, тој им порача дека ако во среда излезат масовно и гласаат за него, ќе го одредат и победникот на 8 мај.
„Сега на 24 април, да им покажеме дека знаеме која е вистинската опција, опцијата 1 и да го одредиме победникот на 8 мај и на претседателските и на парламентарните избори“ рече Пендаровски кој на митинзите зборуваше дека неговата опција нуди чекорење напред наместо противниците за кои давањето глас би значело враќање назад.
На излезност повика и Гордана Сиљановска Давкова која е поддржана од ВМРО-ДПМНЕ и коалицијата „Твоја Македонија“. Таа кампањата ја финишираше со митинг во Штип.
„Да си ја обединиме нацијата, да градиме консензус, само единството може да нè одведе напред, само заедно можеме и вас да ве направиме горди и себе да се почувствуваме горди. А, најмногу, од оваа мала држава да направиме почитувана европска држава“, порача Сиљановска Давкова.
Кандидатот на ДУИ и „Европскиот фронт“, Бујар Османи, пак, на последниот ден од кампањата одржа средба со младите порачувајќи им дека од нивната одлука ќе зависи „кој ќе ја води државата и каква иднина нуди со себе“.
„Гласањето не е само право, гласањето е столб на демократијата но и голема одговорност којашто посебно на овие избори, кога земјата ќе одлучи дали ќе ја одбереме изолацијата или ќе ја одбереме интеграцијата“, рече Османи.
На мобилизација за гласање повикуваше и Арбен Таравари кој е кандидат на албанската опозициска коалиција „Вреди“. Тој вчера имаше централен митинг во Гостивар, чиј градоначалник е, од каде побара поддршка за, како што рече, „да се направи разлика од 7.000 гласови“ во однос на ДУИ.
Кандидатот на ЗНАМ, Максим Димитриевски, пак, кампањските активности за првиот круг ги заврши со посети на Василево, Босилово, Ново Село и митинг во Струмица.
„Ние сакаме Македонија да ја гледаме таму каде што и е местото – во Евроатлантскиот сојуз, но притоа почитувајќи го нашето достоинство, интегритет, македонскиот јазик, култура, континуитет, самобитност, сопствената историја и се она што е македонско“, порача Димитриевски пред струмичани.
Кандидатката на Левица, Билјана Ванковска, пак, на последниот ден од кампањата дел од активностите ги имаше во Гостивар од каде искажа задоволство од текот на кампањата која, според неа, поминала во „пријатна атмосфера“.
Очекувањата на нејзиниот штаб се дека таа ќе влезе во вториот круг каде ќе се соочи со кандидатката на ВМРО-ДПМНЕ, Гордана Сиљановска Давкова.
Поддршка од гласачите на последниот ден од кампањата побара и Стевчо Јакимовски од коалицијата „Храбро за Македонија“.
„Немој да кажете дека не сте имале избор. Секој работи за тој што го плаќа. Мене ме плаќате вие, јас работам за вас! Нив ги плаќаат странците, тие работат за нив!“, порача Јакимовски преку социјалните мрежи.
Доколку никој од седуммината кандидати не освои мнозинство гласови, двајцата најдобропласирани ќе се соочат во вториот круг што ќе се одржи на 8 мај заедно со парламентарните избори.
Во Избирачкиот список за овие претседателски избори се запишани 1.814.317 граѓани.
Ова ќе бидат претседателски избори на кои граѓаните по седми пат со непосредно гласање ќе го изберат шефот на државата.
Министрите од ЕУ се согласија да ги заострат санкциите кон Иран
На состанокот во Луксембург денеска (22 април) министрите за надворешни работи од земјите-членки на ЕУ начелно се согласија да ги заострат санкциите кон Иран по ракетниот и нападот со дронови врз Израел, изјави шефот на европската дипломатија, Жозеп Борел.
ЕУ веќе има повеќекратни програми за санкции против Иран, кои беа воведени поради неговите резерви на оружје за масовно уништување, кршење на човековите права и снабдување на Русија со беспилотни летала.
Сепак, неколку земји од ЕУ повикаа на проширување на санкциите кои се однесуваат на дроновите.
„Постигнавме политички договор дека постојниот режим на санкции, кој се однесува на беспилотни летала, ќе ги опфати и ракетите и нивниот потенцијален трансфер во Русија“, им рече Борел на новинарите по состанокот на шефовите на дипломатиите од ЕУ.
Тој појасни дека санкциите ќе бидат проширени со цел да се опфатат испораките на дронови и ракети не само за Русија, туку и за нејзините сојузници во регионот.
Сепак, како што пренесува Ројтерс, ќе биде потребно повеќе работа за да се одобри правната рамка пред проширените санкции да почнат да се применуваат.
На 13 април, Иран лансираше стотици беспилотни летала и проектили кон Израел.
Со овој напад Техеран го промени својот пристап, кој дотогаш се потпираше на сојузниците и вооружените групи низ Блискиот Исток со што Иран избегнуваше директна конфронтација со Израел.
По нападот, израелскиот премиер Бенјамин Нетанјаху најави оти Израел ќе донесе одлуки за тоа како да се брани. Тоа ги поттикна повиците од западните земји тој да се воздржи од одмазда против Иран.
САД, ЕУ и групата Г7 најавија дека размислуваат за построги санкции против Иран, со цел да го смират и убедат Израел да не одговори на иранскиот напад.
Руски државјанин осуден на пет години принудна работа поради изјава за РСЕ
Рускиот државјанин Јури Коховац денеска (22 април) беше осуден од судот во Москва на пет години принудна работа бидејќи во анкета на Радио Слободна Европа (РСЕ) од јули 2022 година ја осуди руската инвазија врз Украина.
Откако ја осуди војната во Украина и рече дека руските власти се одговорни за неа, Коховац беше прогласен за виновен за ширење лажни информации за руските вооружени сили.
Исто така, судот му забрани да биде администратор на веб-страници во наредните четири години.
Претходно на рочиштето, обвинителството бараше Коховац да биде осуден на пет и пол години затворска колонија.
Казната за „принудна работа“ во Русија значи дека осудените наместо да отслужуваат затворска казна, можат да останат дома и да бидат испратени на работа во индустриски погон што ќе го одреди Федералната затворска служба.
Исто така, за време на издржувањето на казната, државна одзема одредена сума од месечната плата на осудениот.
Во јули 2022 година, новинар на РСЕ ги праша минувачите на улиците на Москва за нивниот став кон војната во Украина.
Меѓу оние кои се согласија да одговорат беше и Коховац, кој рече дека војната ја започнала руската влада и оти мора да ја прекине.
Покрај тоа, тој рече дека руските сили без никаква причина убиле цивили во киевското предградие Буча. Москва ги отфрла обвинувањата дека извршила воени злосторства во Украина.
Коховац потоа – во март 2023, беше приведен, а подоцна беше ослободен со забрана да ја напушта руската престолнина.
Коховац пред судот рече дека своето мислење го кажал во разговор со новинарите, користејќи го уставното право на слобода на говор.
Руските власти ја нарекуваат лага секоја информација за војната во Украина која се разликува од верзијата на руското Министерство за одбрана.
Делото за лажни вести за војската беше додадено во Кривичниот законик веднаш по почетокот на руската инвазија на Украина.
Казната за ова кривично дело може да биде до десет години затвор или до пет милиони рубљи (околу пет илјади евра).
Први разговори на Иран и Пакистан по прекуграничните напади
Иранскиот претседател Ебрахим Раиси и пакистанскиот премиер Шехбаз Шариф денеска (22 април) во Исламабад ја одржаа првата средба по меѓусебните ракетни напади во февруари годинава.
Тридневното патување на Раиси во соседен Пакистан е дел од напорите на двете земји да ги поправат односите што беа затегнати претходно оваа година.
Иран и Пакистан делат граница долга 900 километри, а на која дејствуваат сепаратистите кои се противат на владите во Техеран и Пакистан.
Во февруари, Иран ги нападна, како што тврди, базите што ги користат иранските сепаратисти во Пакистан.
Исламабад потоа одговори со таргетирање на локации во Иран, за кои рече дека ги користат пакистанските сепаратисти.
На денешната средба, иранскиот претседател беше пречекан на аеродромот од министерот за домување Ријаз Хосеин Пирзада, а потоа беше организиран и формален пречек од премиерот Шариф.
За да ја гарантираат безбедноста, властите распоредија стотици дополнителни полициски и паравоени сили.
Според соопштението објавено од кабинетот на премиерот, Шариф и Раиси разговарале за повеќе прашања за унапредување на билатералните односи и соработка на различни полиња и ветиле соработка во борбата против тероризмот.
Иранската државна новинска агенција ИРНА соопшти дека за време на посетата на Раиси ќе бидат потпишани осум документи за соработка.
Двете страни ќе разговараат и за проект за гасовод вреден повеќе милијарди долари, кој е во мирување од 2014 година.
Проектот, на кој Вашингтон се спротивставува поради „прекршувањето на санкциите наметнати на Техеран поради неговата нуклеарна програма“, беше започнат во 2013 година и тој треба да го снабди Пакистан со ирански природен гас.
На посетата, Раиси е придружуван од сопругата и висока делегација.
Тој планира да ги посети Карачи, најголемиот град во земјата, и Лахоре, каде ќе се сретне со новоизбраната прва министерка во Пакистан, Маријам Наваз Шариф.
По посетата на Пакистан, Раиси ќе отпатува и за Шри Ланка.
Вучиќ и Османи со меѓусебни обвинувања во ОН за „притисоци“ врз Србите од Косово
Меѓусебни обвинувањата меѓу српскиот претседател Александар Вучиќ и косовската претседателка Вјоса Османи можеа да се слушнат денеска (22 април) на седницата на Советот за безбедност (СБ) на Обединетите Нации (ОН) посветена на Косово.
Османи обвини дека Белград „ја спречува интеграцијата на Србите во институциите на Косово“.
Таа изјави дека Србија ја „заплашува“ српската заедница на северот на Косово, а како пример го наведе неодамнешното апсење на косовски полицајци во Србија.
Заменик-директорот на косовската полиција Дејан Јанковиќ и четворица полицајци беа приведени на 17 април на граничните премини со Србија, а српската полиција соопшти дека се приведени за „безбедносни проверки“.
Османи обвини и оти Србија претходните денови на граница задржувала автобуси со патници од албанска националност.
Владата на Косово претходно овие постапки ги оцени како одмазда на Србија за поддршката дадена од Парламентарното собрание на Советот на Европа за членството на Косово во оваа организација.
„Србите во Косово се под притисок, но од страна на властите во Србија“, рече Османи.
Вучиќ за големото внимание на меѓународната јавност за инцидентот во Бањска
Претседателот на Србија, Александар Вучиќ, пак, на седницата се пожали дека меѓународната заедница посветува големо внимание на инцидентот во Бањска на Косово, но не и на нападите врз српското малцинство.
Станува збор за инцидент од септември лани кога група вооружени Срби ја нападнаа косовската полиција во селото Бањска на северот на Косово при што беше убиен полициски наредник.
Вучиќ посочи дека овој инцидент е „последица на репресијата“ во Косово.
„Нема да дозволиме да се користи како алиби за прогон на Србите (на Косово)“, рече тој, додавајќи дека во Косово намерно се создаваат лоши услови за живот на српското малцинство.
Вучиќ рече и дека поминале 11 години од потпишувањето на Бриселскиот договор, но оти Заедницата на општини со српско мнозинство на Косово сè уште не е формирана.
„Тоа се единаесет години неисполнети ветувања, неспособност на Европската унија да ги придвижи работите од мртва точка“, рече Вучиќ.
Основањето на Заедницата на општините со мнозинско српско население беше договорено од Косово и Србија со Бриселскиот договор во 2013 година, но властите во Косово се двоумат дали да го спроведат договорот, стравувајќи дека овластувањата што би ги имала оваа заедница би можеле да влијаат на функционалноста на државата.
Вучиќ рече дека и „укинувањето на динарот е етнички мотивирана кампања против Србите и неалбанците“ на Косово.
Централната банка на Косово донесе одлука од 1 февруари еврото да биде единствена валута за плаќања и трансакции, што во пракса значи укинување на српскиот динар.
Поради оваа одлука, на барање на Србија, Косово беше тема на седница на Советот за безбедност на ОН одржана во февруари годинава.
Денешната седница на Советот, пак, е посветена на шестмесечниот извештај на генералниот секретар на ОН Антонио Гутереш за работата на УНМИК (Мисијата на ОН на Косово).
Шефицата на УНМИК за итноста од спроведување на договорот
Специјалната претставничка на генералниот секретар на ОН и шефица на УНМИК, Каролине Зијаде, на седницата потенцираше дека една од клучните забелешки е „незадоволството од постигнатото во дијалогот“ и додаде дека тоа влијае на безбедносната состојба.
„Тензиите се зголемија во последните месеци“, рече таа.
Шефицата на УНМИК рече дека никогаш не било поитно да има „целосното спроведување на договорите постигнати под покровителство на ЕУ со цел да се помогне во решавањето на серијата кризи што се случија“.
„Ова е најважното прашање за двете страни“, посочи Зијаде.
Таа посочи дека едностраните потези само создаваат недоверба, без разлика од која страна доаѓаат.
Зијаде зборуваше и за изборите на северот на Косово, за кои вели дека не придонеле за намалување на тензиите, иако тоа била целта.
„Само 253 од околу 46.000 регистрирани гласачи го искористија своето (гласачко) право“, рече таа.
На 21 април, четири општини со српско мнозинство на северот на Косово гласаа „за“ или „против“ смена на градоначалниците Албанци. Сепак, членовите на српската заедница не беа заинтересирани за учество во гласањето. Тие претходно беа повикани на бојкот од страна на Српска листа, најголемата партија на српското малцинство во Косово.
Зијаде рече и дека вооружениот напад во Бањска е „сериозен инцидент“ и оти станува збор за „правно и политичко прашање“ кое е важно да се реши за да не се повтори таков случај.
Шефовите на дипломатии од ЕУ на состанок за поддршката за Киев
Министрите за надворешни работи од земјите-членки на Европската унија (ЕУ) се состануваат во Луксембург за да разговараат за зајакнување на поддршката на блокот за Киев. Состанокот доаѓа во период кога од Украина стигаат предупредувања дека ситуацијата во војната со Русија може да се влоши поради интензивирањето на воздушните напади.
На состанокот закажан за денеска (22 април) дипломатите од ЕУ ќе разговараат за зајакнување на воздушната одбрана на Украина додека Русија продолжува да напаѓа со дронови и ракети.
Русија ги засили воздушните напади врз енергетската инфраструктура и други цели на украинска територија со што се зголеми и притисокот врз ЕУ да помогне за воздушна одбрана на Украина.
Според шефот на украинската воена разузнавачка агенција, Кирил Буданов, кој денеска зборуваше за Би-би-си, Украина од средината на мај се соочува со „тешка ситуација“ на линијата на фронтот.
Ден претходно, украинскиот претседател Володимир Зеленски во изјава за американската телевизија „Ен-би-си“, рече дека Русија сака пред 9 мај да го окупира Часив Јар во регионот Доњецк.
Овој датум во Русија се одбележува како Ден на победата над нацизмот во Втората светска војна.
Состанокот во Луксембург на министрите од ЕУ доаѓа откако Претставничкиот дом на американскиот Конгрес го одобри пакетот помош за Украина во вредност од над 60 милијарди долари. Пакетот ќе биде испратен до Сенатот на дебата оваа недела со што се отвора и патот за претседателот Џо Бајден да го потпише законот.
Западните лидери го поздравија одобрувањето на пакетот помош од САД, а претседателката на Европската комисија Урсула фон дер Лајен на социјалната мрежа Икс порача дека „Украина ја заслужува сета поддршка што може да ја добие против Русија“.
Според Институтот за проучување на војната – тинк-тенк организација со седиште во Вашингтон, комплицираната логистика за пристигнувањето на американската помош на линијата на фронтот ќе значи дека додека чекаат „украинските сили би можеле да претрпат дополнителни неуспеси“.
Од руска страна, пак, министерот за надворешни работи Сергеј Лавров денеска (22 април) ги обвини САД, Велика Британија и Франција дека со зголемување на нивната поддршка за Украина ризикуваат „директен воен конфликт“ меѓу нуклеарните сили.
Неколку часа пред состанокот во Луксембург, Русија лансираше седум беспилотни летала Шахед камикази во Украина, од кои повеќето беа соборени.
Регионалниот гувернер на Одеса, Олех Кипер, рече дека дроновите биле насочени кон фарма и биле оштетени магацин и некои машини.
Беспилотните летала Шахед се евтини и ефикасни дронови произведени од Иран.
Техеран, пак, во јавноста уверува дека не ја снабдува Русија со беспилотни летала.
Истите беспилотни летала, над 300 од нив, ги користеше и самиот Иран на 14 април во напад врз Израел.
За време на состанокот во Луксембург, министрите за надворешни работи на ЕУ, исто така, ќе разговараат и за проширување на санкциите на блокот кон Иран поради овој напад врз Израел, за кој Техеран вели дека е одмазда за бомбардирањето на неговата амбасада во Сирија претходно овој месец.
Во нападот, за кој Иран го обвинува Израел, загинаа седум воени офицери, меѓу кои и двајца генерали.
Дел од учесниците на изборите реагираат за инциденти пред настапување на молкот
Дел од учесниците на претседателските и парламентарните избори денеска (22 април) реагираа на инциденти и незаконски постапувања во текот на кампањата.
Денеска е последен ден од кампањата за првиот круг од претседателските избори, а од полноќ ќе настапи молк кој ќе заврши вечерта на 24 април кога ќе се затворат избирачките места.
Меѓу оние кои реагираа се претставници на албанската опозициска коалиција „Вреди“ кои од пред зградата на СВР Тетово обвинија дека без конкретна причина и незаконски во полициската станица се сослушуваат членови на Младинскиот форум на Беса, партија која е дел од оваа коалиција.
„Она што го знаеме е дека во станица прво биле повикани незаконски, телефонски, итно да пријават во полиција, а многу подоцна им испратиле и писмена покана, како што треба да пристапи полицијата. Она што можеме да го кажеме е дека овие диктаторски дејствија ги врши првиот човек на СВР Тетово, Шефик Бајрами, кој на оваа функција е незаконски поставен иако има криминално досие и е осомничен за учество во потешки кривични дела. Но, со антизаконско инсистирање на ДУИ, ја извршува функцијата прв човек на СВР Тетово“, изјави Алби Ќамили од Младинскиот форум на Беса.
Пратеникот од ВМРО-ДПМНЕ и кандидат за нов пратенички мандат од изборната единица три, Миле Лефков, пак, соопшти дека му била разбиена пратеничката канцеларија во Кочани.
„На ден пред гласање, разбиена мојата пратеничка канцеларија во Кочани. Одржав пресс пред ОВР Кочани, веднаш по пресот на Бојмацалиев. Дали инсистирањето на техничката Влада и на Бојмацалиев да нема никакви кадрови поместувања во Кочани беше токму со оваа цел, односно за да се шири страв и несигурност?“, реагираше Лефков.
Митко Бојмацалиев, кој е дополнителен заменик-министер во МВР од редовите на СДСМ, пак, се огласи на Фејсбук објавувајќи дека „МВР го расчисти случајот – сторителот е пронајден“.
Меѓу инцидентите кои беа забележани на последниот ден од кампањата за првиот круг претседателски избори е и оштетен билборд на кандидатот на ДУИ и „Европскиот фронт“, Бујар Османи, во Струмица.
Билбордот е поставен во центарот на градот, а од струмичката полиција наведоа дека оштетувањето е направено со боја и е пријавено утрото околу 10 часот.
На 24 април, граѓаните на Северна Македонија ќе гласаат за еден од седумте кандидати за претседател. Ако ниту еден не освои мнозинство гласови, двајцата најдобропласирани ќе се соочат во втор круг кој ќе се одржи на 8 мај кога ќе се гласа и на парламентарни избори.
Во трката за пратенички мандати се кандидатски листи поднесени од 17 коалиции и партии.
Граѓаните ќе може да подигаат лични документи и на денот на гласањето
Министерството за внатрешни работи (МВР) соопшти дека во среда (24 април), кога ќе се одржи првиот круг од претседателските избори, граѓаните ќе може да подигаат лични документи.
„Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 24.04.2024 ќе работат за издавање на лични документи со работно време од 08 до 19 часот“, соопштија од МВР.
На денот на гласањето, скопјани, како и досега, ќе можат своите лични карти да ги подигаат во надлежните полициски станици.
Во Северна Македонија дојде до криза со издавањето лични документи уште кон средината на 2023 кога тешко успеваше закажувањето термини за сликање.
Напливот се случи во ноември лани, кога почна да наближува рокот за промена на личните документи со новото име на државата, којашто се обврза на тоа со потпишувањето на Преспанскиот договор со Грција во 2018.
Рокот од пет години почна да тече со промената на Уставот во февруари 2019 година, кога името на државата официјално беше променето во Република Северна Македонија. Со тоа личните документи на граѓаните требаше да бидат променети до 12 февруари 2024 година.
ЕУ: Изборите во Косово не придонесуваат за смирување на тензиите
Брисел ќе биде подготвен да ја разгледа можноста за укинување на санкциите кон Косово, но само откако шефот на европската дипломатија Џозеф Борел ќе поднесе извештај до земјите-членки, порача портпаролот на Европската Унија (ЕУ(Петер Стано.
„Во согласност со своите заклучоци од 12 декември 2023 година, Советот ќе разговара за мерките на ЕУ врз основа на извештајот на високиот претставник за исполнување на барањата на Унијата“, вели Стано во писмениот одговор.
По насилството на крајот на мај 2023 година на северот на Косово, кое избувна откако избраните градоначалници од албанска националност влегоа во општинските згради во општините со мнозинско српско население, ЕУ во јуни лани реши да воведе рестриктивни мерки за Приштина.
За потсетување, градоначалниците беа избрани на избори во април 2023 година, откако Србите ги напуштија косовските институции на крајот на 2022 година, во знак на незадоволство од одлуката за регистарски таблички на Владата на Косово.
Партијата Српска листа и локалното српско население ги бојкотираа изборите.
Ситуацијата ескалираше на 29 мај во Звечан кога дојде до судири меѓу демонстрантите и членовите на Мировната мисија на НАТО на Косово (КФОР).
Владата на Косово, претходно денеска (22 април) ја повика ЕУ да ги укине, како што велат, неправедните рестрикции велејќи дека ја исполниле обврската од договорот со Унијата за намалување на тензиите на северот на земјата.
Владата соопшти дека со завршувањето на изборниот процес на 21 април, за време на кое се гласаше за импичмент односно смена на албанските градоначалници во четири општини на северот на земјата, Косово „ја исполнило својата обврска кон своите граѓани и одговорноста преземена од договорот со ЕУ“.
Стано, пак, посочи дека со гласањето за импичмент на градоначалниците, Косово ја отворило можноста за почеток на нови локални избори „иако организирањето на гласањето за недоверба не било без предизвици“.
Тој нагласи и дека одлуката на политичките партии на косовските Срби да се повлечат од процесот и да повикаат на бојкот довело до низа тешкотии, вклучително и формирање на некои изборни комисии без членови од редовите на косовски Срби.
Портпаролот на ЕУ изјави и оти одлуката на директорите на училиштата од српската програма на северот на Косово да не дозволат користење на школите како избирачки места, неколку дена пред денот на гласањето, создала сериозни предизвици за Централната изборна комисија.
Сето ова, вели Стано, им го отежнало и пристапот на граѓаните до точни информации за новите локации на избирачките места.
„ЕУ жали што косовските Срби на северот на Косово ја пропуштија можноста да го искористат своето право да гласаат и да избираат градоначалници кои би биле вистински претставници“, рече Стано и подвлече дека исходот од изборите не придонесува за смирување на тензиите и поплочување на патот за враќање на Србите во косовските институции, што е неопходно за нормализирање на односите.
Доктори од Токсикологија алармираат дека на Клиниката владее хаос
Доктори од Клиниката за токсикологија денеска (22 април) на прес-конференција алармираа дека во оваа здравствена установа се случува хаос особено, како што велат, од назначувањето на организациската (економската) директрока Бесија Иљази на средината на февруари.
Наспроти нив, пак, министерот за здравство Илир Демири најави дека ќе го разреши медицинскиот директор на Клиниката за токсикологија, Данил Петровски, додека кај организациската директорка вели „нема констатирано ниту едно прекршување на правото“.
Докторот од оваа Клиниката за токсикологија на прес-конференција придружуван од други лекари, Никола Беќаровски, вели дека најголем проблем со кој во моментов се соочува институцијата е функционирањето на лабораторијата.
„Секој кој малку разбира токсикологија, знае дека токсиколошка клиника без токсиколошка лабораторија не може да функционира. Во моментов таму функционира само еден лаборант, а за минимум да работи оваа лабораторија, потребни се барем двајца дипломирани биолози и уште еден техничар со средна медицинска спрема“, појасни тој.
Тој се пожали на отпор и несоработка од страна на Иљази. Беќаровски тврди дека во неколку наврати било барано да се вработат двајца лаборанти и еден болничар, но директорката инсистирала да се вработат 18 лица кои претходно биле примени со договор на дело, а на кои им истекле договорите.
„Ставот на лекарскиот колегиум, е, дека немаме потреба од толкав број нови примања“, вели Беќаровски.
Медицинскиот директор Данил Петровски, пак, како што тврди докторот, одбива да ги потпише вработувањата бидејќи е предизборен период.
Дополнителен проблем, кој Беќаровски го истакна е и што немаат комуникација со директорката Иљази бидејќи, вели, таа не знае македонски јазик, а се обидел со неа да разговара на англиски.
Комуникацијата, посочи Беќаровски, била преку преведувач, кој бил дел од тие 18 лица, па докторот рече дека не знаат дали точно се пренесувало тоа што го зборувале и обратно, дали точно им се преведува нејзиното говорење.
Министерот за здравство, пак, зборувајќи за случувањата на оваа клиника рече дека пред извесен период бил прашан од новинар за состојбата во оваа здравствена установа каде, како што му било кажано 18 вработени не примиле плата четири месеци и дека во истата институција има за жал и навреди на национална основа. Вината тој ја лоцира кај медицинскиот директор.
„Просто не можев да поверувам, дури мислев и дека е провокација. Многу ми е жал, три недели ја испитав ситуацијата. За жал, констатацијата е вистината. Длабоко сум уверен дека луѓето кои ги користат ваквите испади и навреди не го мислат тоа. Навреди на национална основа. Не може доктор да мисли така и да се служи со таков речник. Ќе преземам сериозни мерки, директорот медицински денеска ќе го разрешам од позицијата, иако сме влезени во изборите“, изјави Демири.
Изјава за медиумите, како што пренесе државната агенција МИА, даде и организационата директорка на Клиниката за токсикологија, но зборуваше само на албански јазик.
Мултимедија
Најпосетени
Што треба да знаете