Достапни линкови

Музика и култура „На зајдисонце“ во Трпејца


Вечерни променади по езерото.

Вечерни променади по езерото.

Изминатиот викенд заврши првото издание на културно-забавната манифестација „На зајдисонце“ во охридското село Трпејца.

Изложба на фотографии и промоција на книга со анегдоти од Никола Павлески, вечерни променади „Со кајче по езерото“ на кои настапуваа учениците од Основното музичко училиште „Методи Патче“ од Охрид, презентации на подводните активности на нуркачкиот клуб „Амфора“ и кајакарскиот „Рибар“, курсеви по пливање и по англиски јазик... се само дел од активностите од осумдневната богата програма на првото издание на културното лето „На зајдисонце“ што, во перидот од 20 до 28 јули, го организираа Здружението за развој и промоција „За Трпејца со љубов“ и Црковниот одбор од селото.
Изненадени сме и самите ние од одзивот на посетителите, од одзивот на трпејчани и пред сè од нивната љубопитност и желба да видат нешто ново и да ја почувствуваат магијата на уметноста.

„Изненадени сме и самите ние од одзивот на посетителите, од одзивот на трпејчани и пред сè од нивната љубопитност и желба да видат нешто ново и да ја почувствуваат магијата на уметноста“, вели Милчо Јовановски, член на Здружението за развој и промоција на Трпејца.
На зајдисонце“ - културна манифестација во село Трпејца во близина на Охрид.

На зајдисонце“ - културна манифестација во село Трпејца во близина на Охрид.


Тој дополнува дека наишле на разбирање од локалната самоуправа и од спонзорите, но дека генерално манифестацијата ја замислиле како случување кое нема да подразбира ниту големи финансиски средства ниту трошоци.
Она што беше најголемата атракција можам да кажам дека беа вечерните променади по езерото, со факели и газиени ламби, дечиња веслаа во кајчињата, а музичари од основното музичко училиште во Охрид свиреа серенади и воопшто форми од класичната музика.

„Одевме на тоа да организираме нешто одржливо и нешто што може со минимални средства да биде претставено и интересно за посетителите. Не се наплаќаа влезници, сето тоа беше отворено, на отворени сцени во Трпејца кои полека и ние ги откриваме, а она што беше најголемата атракција можам да кажам дека беа вечерните променади по езерото, со факели и газиени ламби, дечиња веслаа во кајчињата, а музичари од основното музичко училиште во Охрид свиреа серенади и воопшто форми од класичната музика.“

Осоколени од позитивните реакции, организаторите велат дека нивните амбиции се манифестацијата да стане традиционална и за следната година најавуваат побогата програма која би се одвивала во најмалку 10 дена во екот на сезона. Ова подразбира дека се размислува и за ликовна или поетска колонија бидејќи, како што вели Јовановски, на тој начин тие ќе ги продолжат заложбите на Димитар Кондовски и неговата сопруга Хилда кои во средината на 1970 години, биле иницијатори на културниот туризам во Трпејца, а згора на тоа „местото е создадено како од рајот и може да биде вистинска инспирација за луѓето кои водат дијалог со музите и сакаат да се инспирираат од просторот и времето“.

„Планираме да функционираме преку целата година како здружение и да работиме на еколошки програми кои на некој начин ќе им дадат една свежина и еден нов поттик на жителите од тој крај да останат и да не се иселуваат, туку напротив да се враќаат во Трпејца.“
  • 16x9 Image

    Љупчо Јолевски

    Како новинар, водител и уредник Јолевски во новинарството е безмалку 4 децении. Кариерата ја почнал во Млад Борец на почетокот од 1980-тите. Потем долги години бил во Телевизија Скопје и во Македонското радио - Втора програма, како и во други медиуми. Во Радио Слободна Европа Јолевски е од самиот почеток на емитувањето на програмата на македонски јазик.

XS
SM
MD
LG