Достапни линкови

logo-print

Овации за Болоња чело проект во Скопје


Болоња чело проект.

Болоња чело проект.

Простум, со овации и бурни аплаузи, публиката вчеравечер во Музеј на град Скопје, го испрати „Болоња чело проект“, во кој освен Италијанци, членуваат и македонски музичари – Маја Петрушевска и Пере Јованов.

Одржан во врелината на една типична скопска ноќ, во простор во кој борбата за свеж воздух беше речиси „невозможна мисија“, сепак концертот на „Болоња чело проект“ од Италија во Музеј на град Скопје, покажа дека музиката, инспирацијата и енергијата на изведувачите можат да ги надминат сите бариери.
Познавајќи ги моите колеги мислам дека секој од нас навистина даде сè од себе, мислам дека сите можеа да го почувствуваат тоа колку бевме среќни што бевме во мојот роден град да свириме.

Маја Петрушевска, виолончелистка.

Маја Петрушевска, виолончелистка.

Едноставно, на пробраниот репертоар во кој покрај класиката се најдоа и обработки на Гершвин, „Битлси“, „Лед Цепелин“, „Јуритмикс“, а премиерно беше изведена и композицијата „On My Grave“ што младата композиторка Бојана Петровиќ ја напишала инспирирана од македонската „Со маки сум се родил јас“, публиката и не можеше да одговори поинаку освен со овации. Се случи чудна хемија која автоматски, по овој прв воодушевувачки концерт на „Болоња чело проект“ кај нас, ширум им ги отвора портите на Скопје и на Република Македонија.
Би сакала да имам можност да работам во Македонија затоа што сметам дека и тука може да се направат нови и интересни работи на музичката сцена. Би ми било чест и задоволство и јас да имам можност нешто да создадам.

„Познавајќи ги моите колеги мислам дека секој од нас навистина даде сè од себе, мислам дека сите можеа да го почувствуваат тоа колку бевме среќни што бевме во мојот роден град да свириме“, вели Маја Петрушевска, која заедно со Пере Јованов е во „Болоња чело проект“ од формирањето на овој деветчлен состав во 2009 година, како дидактички курс, инициран и развиван ор професорот Антонио Мостачи.

Репертоарот на ансамблот опфаќа оригинални композиции, како и аранжмани и обработки на познати дела од 16 до 20 век. Повеќемина современи композитори имаат напишано и посветено дела за „Болоња чело проект“. Еден од нив е и композиторот и виолинистот Диего Конти, кој го напиша делото „Варијации на темата Хајди“, како и три фантазии за соло виолончело и виолончелистички ансамбл.

Досега составот има соработувано со неколку пејачи од актуелната италијанска оперска сцена, но и со познати џез и поп пејачи како Џулија Барози, Ана Марија Чиури, Луиса Котифоџи и други.

На почетокот од 2010, ансамблот го објави својот прв албум „Арија“, а истата година, го сними во премиерна изведба делото “L’Abbé Agathon” од Арво Парт, кое беше ставено на носач на звук под етикетата на Sheva Collection.

Пред коцертот во Скопје „Болоња чело проект“ соработуваше и со славната британска пејачка Сара Џејн Морис при претставувањето на нејзиниот проект “Cello Songs“ во Италија.

Говорејќи за одбирот, Петрушевска вели дека за аражманите се грижат членовите на ансамблот.

„Најчесто изборот е индивидуален и секогаш имаме еден солист на пример што импровизира. Мислам дека се прилично оригинални тие аранжмани што ги изведуваме.“

Инаку, „Болоња чело проект“ наголемо работи и на материјалите за својот нов албум што треба да биде објавен есенва и на кој ќе се најдат исклучиво оригинални композиции за виолончелистички ансамбл од автори како Вила-Лобос, Форино и други.

Македонската челистка, пак, за себе како солистка вели дека во изминативе две години од нејзиниот престој во Италија, музицирала и со камерниот гудачки оркестар и квартетот „Торели“, дека има и свое дуо за современа и експериментална музика, во Португалија соработувала со една театарска компанија при изведбата на дела од Курт Веил, но едно е сигурна дека кариерата би сакала да ја продолжи од родната земја.

„Би сакала да имам можност да работам во Македонија затоа што сметам дека и тука може да се направат нови и интересни работи на музичката сцена. Би ми било чест и задоволство и јас да имам можност нешто да создадам“, вели Петрушевска.
  • 16x9 Image

    Љупчо Јолевски

    Како новинар, водител и уредник Јолевски во новинарството е безмалку 4 децении. Кариерата ја почнал во Млад Борец на почетокот од 1980-тите. Потем долги години бил во Телевизија Скопје и во Македонското радио - Втора програма, како и во други медиуми. Во Радио Слободна Европа Јолевски е од самиот почеток на емитувањето на програмата на македонски јазик.

XS
SM
MD
LG