Достапни линкови

logo-print

ВАЦ го продаде својот удел во српска „Политика“


Српскиот весник „Политика“ има нов сопственик, 50 отсто од уделот во таа компанија која беше во рацета на германската групација ВАЦ сега е во сопственост на „Ист медиа груп“ регистрирана во Москва.
Веста ја обелодени Српската напредна партија, оценувајќи дека е скандалозно што продажбата на 50 отсто од сопствеништвото е објавено „преку ноќ“ и нетранспарентно.
СНС ја обвинува Демократската партија дека стои зад одлуката за продажба на ВАЦ и оти со тоа ја нарушува медиумската слобода.
Новиот сопственик на 50 отсто од акциите во „Политика“ не и е познат на српската јавност, а на руските бизнис сајтови е наведено дека „Ист медиа груп“ е основана на 29 јануари оваа година во Москва и оти сопственик е Урош Стефановиќ.

Сопственик на преостанатите 50 отсто од сопствеништвото на белградскиот весник остана „Политика - Акционерско друштво за новинско-издавачка и графичка дејност“.
Германскиот ВАЦ во почетокот на април и понуди на државата да ги откупи нејзините 50 отсто од сопственоста во „Политика“ за 4,7 милиони евра и преземање на „одредени обврски“, не прецизирајќи кои.
ВАЦ уште пред две години најави повлекување од Југоисточна Европа, а веќе ги продаде своите компании во Македонија и во Бугарија.
XS
SM
MD
LG