Достапни линкови

Собранието ја избра новата влада


Собранието на Република Македонија по тридневна расправа вечерва со 68 гласови "за" и 12 "против" ја избра новата Влада предложена од мандатарот Хари Костов.
Потпретседателот на Собранието ги прочита имињата на претседателот на Владата и министрите што влегуваат во нејзиниот состав. Членовите на Владата дадоа свечена изјава пред Собранието на Република Македонија.

Новиот владин кабинет е со ист состав како и стариот, со измени само во Министерството за внатрешни работи, каде министерското место остана празно откако министерот Хари Костов го доби манадатот за состав на нова влада од претседателот Бранко Црвенковски. Нов министер за внатрешни работи е Сиљан Аврамовски, додека во другите ресори остануваат министрите како и пред назначувањето на Црвенковски за претседател.

Владо Бучковски е министер за одбрана, за правда Иџет Мемети, за надворешни работи Илинка Митрева, за финансии Никола Поповски, за економија Стевчо Јакимовски, за земјоделство, шумарство и водостопанство Славко Петров, за здравство Реџеп Сељмани, а за образование Азис Положани. Со Министерството за труд и социјална политика ќе раководи Јован Манасијевски, со локална самоуправа Александар Гештаковски, за министер за култура е назначен Благој Стефановски, за транспорт и врски Агрон Буџаку и за животна средина и просторно планирање Љубомир Јанев.

Министри без ресори и во овој владин состав се Радмила Шекеринска, Муса Џафери и Владо Поповски.

Во експозето пред пратениците мандатарот Хари Костов најави дека ќе се залага за подобрување на стандардот на граѓаните, реформи во судството, интегрирање на земјата во ЕУ и НАТО.

Првите задачи на новата извршна власт ќе бидат доследно реализирање на обврските од Рамковниот договое преточени во уставни амандмани, интензивирање на борбата против криминалот и корупцијата, привлекување странски инвестиции, намалување на невработеноста и сиромаштијата и интегрирање на Македонија во Европската унија и во НАТО.
XS
SM
MD
LG