Достапни линкови

logo-print

Повлекувањето на Георгиевски отвора простор за нови луѓе


Повлекувањето на досегашниот лидер на ВМРО-ДПМНЕ Георгиевски без оглед на намерите во тоа да се гледа некаква тактика е реално повлекување кое остава простор за доаѓање на нови луѓе:

„Се лажат сите тие кои мислат дека почесниот претседател од неговиот кабинет уште долго време ќе успева да ја раководи партијата. Едноставно, новите луѓе, новиот човек, ќе внесе и дел од својот стил на работа, без разлика дали ние него го знаеме или не, а случајно го познаваме стилот на работа на господинот Груевски. Во таа смисла, мислам дека ВМРО-ДПМНЕ дека е во добивка“.

оценува директорот на Форум центарот за стратешки истражувања Ѓунер Исмаил.

Праксата покажува дека во транзициски општества:

„Процесите во кои доминираше брзо проверување и на политичките партии и на државната управа се покажаа како најуспешни“.

Ова во праксата на македонските политички партии е досега непознато, вели Исмаил и оттаму е смената на лидерот на ВМРО ДПМНЕ е чин за поздравување . Тешкотиите со кои ќе се соочи новиот лидер не се мали вели Исмаил:

„Гледајќи го историјатот на ова ново, последно ВМРО во македонската историја, ќе видиме дека таа партија се уште не е имунизирана од класичните шеми на настанување. Како што знаете, службите на поранешните социјалистички држави партиципираа во создавањето на сите политички партии и во таа смисла не верувам дека ВМРО-ДПМНЕ докрај се има ослободено од тие пенетрации и дека ќе се ослободи кога и да е. Второ, во четирите години на власт покажа дека не е имуна од сите транзициски пороци – корумпирањето на партијата, расипувањето на кадрите се уште не е идентификувано, но евидентно е дека постои и во таа смисла новиот лидер ќе има работа да гуша. Се разбира, почнувајчи од самиот себе па до првите стомина на списокот на најважни членови на ВМРО-ДПМНЕ“.

Сеуште е рано да се одреди насоката или концепцијата на новиот лидер на сега најголемата опозициска партија , но извесно е дека од голема помош ќе му биде неуспешноста на актуелната власт

„бидејќи тие ја покажуваат недоволната оспособеност да ја владеат земјата на начин за кој што говореа на изборите“.
XS
SM
MD
LG